U Minsku šmatdzietnaha baćku adpravili ŭ kałoniju za 5 chvilin u sčepcy ŭ žniŭni 2020 hoda
Sud Leninskaha rajona Minska asudziŭ Siarhieja Alšeŭskaha da dvuch hadoŭ pazbaŭleńnia voli ŭ kałonii ahulnaha režymu. Jaho pryznali vinavatym pavodle č. 1 art. 342 Kryminalnaha kodeksa. Spravu razhledzieła sudździa Maryna Klimčuk. Taksama ŭ kałonii jaho prymusova buduć lačyć ad ałkahalizmu, adznačajuć pravaabaroncy.
Isk «Minsktransa» na sumu 21 tysiača 667 rubloŭ 87 kapiejek budzie razhledžany ŭ hramadzianskaj vytvorčaści.
Siarhieja Alšeŭskaha pryznali vinavatym u tym, što jon braŭ udzieł u «hrupavych dziejańniach, jakija hrupa parušajuć hramadski paradak i spałučanyja ź jaŭnym niepadparadkavańniem supracoŭnikam milicyi» — mitynhu 10-11 žniŭnia 2020 hoda.
Zhodna z abvinavačvańniem, jon «publična niezakonnymi sposabami vykazvaŭ svaje hramadzianska-palityčnyja pohlady», dałučyŭšysia da «hrupy hramadzian, jakija ŭdzielničali ŭ supraćpraŭnych dziejańniach». Jon «vykrykvaŭ łozunhi, jakija byli nakiravanyja na doŭhaje parušeńnie hramadskaha spakoju, nieadnarazova admaŭlaŭsia vykanać patrabavańni supracoŭnikaŭ AUS, a taksama naŭmysna pieraškadžaŭ ruchu transpartu».
Taksama ŭ vinu jamu pastavili «ruch u składzie kałony, u tym liku, sčepcy łakciami, to bok, hrupavym skryžavańni ruk u łakcievych sustavach» pa prajeznaj častcy.
Na pasiadžeńni Alšeŭski pryznaŭ vinu. Jon raspavioŭ, što 10 žniŭnia jaho siabar prapanavaŭ pahladzieć, što adbyvajecca na pratesnych maršach u Minsku. U internecie jon daviedaŭsia, dzie buduć pravodzicca masavyja mierapryjemstvy. Jany pryjechali ŭ horad i pryparkavali aŭtamabil na adnoj z vulic, pieššu nakiravalisia ŭ rajon praśpiekta Pieramožcaŭ, dzie ŭ hety čas užo znachodziłasia vialikaja kolkaść ludziej. Alšeŭski raspavioŭ, što staŭ vychodzić na prajeznuju častku niedalok ad Pałaca sportu kala 20.00, i kali jamu prapanavali stać u sčepku, jon pahadziŭsia. Mužčyna prastajaŭ tam piać chvilin, vykrykvajučy łozunh «Žyvie Biełaruś!», ale paśla taho, jak zaŭvažyŭ nabližeńnie supracoŭnikaŭ AUS i śpiectechniki, uciok z prajeznaj častki darohi i źjechaŭ u rodny horad.
Jon udakładniŭ, što nie rabiŭ udaraŭ rukami i nie viedaŭ, što mierapryjemstva było niesankcyjanavanym. Alšeŭski taksama paznaŭ siabie na fota ź miesca padziej: jany stali asnoŭnymi dokazami pa spravie.
Viadoma, što ŭ mužčyny troje małaletnich dziaciej.
Pasoł Sidarenka pakončyŭ z saboj, nie vytrymaŭ dopytaŭ KDB33
Kamientary