«Biełaruś na mižnarodnaj arenie moža skacicca da statusu DNR». Ekśpierty razvažajuć, jak na Biełarusi adabjecca ŭvarvańnie va Ukrainu
Biełaruskija ekśpierty vykazali mierkavańni, jak na Biełarusi adabjecca kanflikt Rasii sa śvietam, pryznańnie «ŁNR» i «DNR», čamu tak adbyłosia i što moža być dalej.
«Dla Biełarusi heta budzie skatvańnie da uzroŭniu Asiecii na mižnarodnaj arenie»
Jahor Lebiadok miarkuje, što dla Łukašenki ciapier pytańnie pryznańnia «ŁNR» i «DNR» ‒ heta pytańnie handlu.
«Mahčymaje vypadzieńnie $2—4 młrd ekspartu va Ukrainu, pryznańnie moža paciahnuć za saboj novyja sankcyi, jakija pakul nie zusim zrazumiełyja. Kab zrazumieć ich i acanić škodu ad pryznańnia, maje sens dla Łukašenki krychu pačakać z pryznańniem, dla «vystaŭleńnia rachunka» Pucinu.
Chutkaje pryznańnie z boku Łukašenki «ŁNR» i «DNR» śviedčyła b ab tym, što abo cana ŭžo abhavoranaja i prymalnaja, abo zapasu palityčnaj i ekanamičnaj tryvałaści piarečyć voli Pucina ŭ Łukašenki niama», —miarkuje ekśpiert.
Taksama Jahor Lebiadok razvažaje pra mižnarodnyja nastupstvy pryznańnia. Na jaho dumku, dośvied pryznańnia Paŭdniovaj Asiecii i Abchazii śviedčyć, što nie chutka, ale ad hetaj situacyi rana ci pozna stomiacca, i sami zachodnija krainy buduć prasić Rasiju viarnucca da dyskusij i pieramovaŭ dla harantavańnia stratehičnaj biaśpieki.
«Cikava, ci buduć na treci raz praciahłyja stratehičnyja dziejańni suśvietnaj supolnaści, abo znoŭ prahłynuć da nastupnaha kanfliktu praź niekalki hadoŭ», — razvažaje jon.
Što tyčycca vykarystańnia hetaj situacyi dla ŭnutryrasijskaha spažyŭca i Pucina jak «źbiralnika ziamiel ruskich», to vierahodna, ličyć Lebiadok, uklučeńnie «ŁNR» i «DNR» nie ŭ skład Rasii, «kab heta pakul nie zanadta ahaliła dla śvietu rasijski nacyjanalny šavinizm», a ŭ skład tak zvanaj Sajuznaj dziaržavy Biełarusi i Rasii. Dla maštabnaści zrabić heta moža sumiesna z pryniaćciem Paŭdniovaj Asiecii i Abchazii.
Na dumku Lebiadka, u vypadku pryznańnia Alaksandram Łukašenkam «ŁNR» i «DNR», naŭrad ci varta budzie čakać z boku zachodnich krain dadatkovyja sankcyi jašče i za Asieciju i Abchaziju — «usio pojdzie ŭ sukupnaści», tamu ich praściej pryznać ciapier.
Ale kali dla Asiecii i Abchazii uvachodžańnie ŭ Sajuznuju dziaržavu stanie niejkim vialikim pryznańniem i paspryjaje palapšeńniu ekanomiki, to
«dla Biełarusi heta budzie jak raz naadvarot — skatvańnie da ich uzroŭniu na mižnarodnaj arenie z pavyšeńniem ryzyki vajny ŭ pierśpiektyvie», — miarkuje Lebiadok.
Dalejšaje raźmiaščeńnie rasijskich vojskaŭ u Biełarusi abumoŭlenaje nie tolki ciskam na zachodnija krainy i Ukrainu ŭ apisanych vyšej metach, ale i ŭ pryncypie narastajučym z 2020 hoda pašyreńniem rasijskaj vajskovaj prysutnaści ŭ Biełarusi, miarkuje ekśpiert.
«Navat paśla praviadzieńnia vučeńniaŭ kolkaść rasijskich vojskaŭ u Biełarusi — heta zakrytaje pytańnie dla biełaruskaha hramadstva. Nieviadomaja i dakładnaja kolkaść rasijskich vojskaŭ u vučebna-bajavych centrach. Nie paviedamiać i kolkaść rasijskich vojskaŭ, jakija zastanucca nadalej. Miarkujučy pa ŭsim, Łukašenka i Ko miarkujuć, što biełarusam viedać heta nie naležyć».
Znachodžańnie rasijskich vojskaŭ u Biełarusi, pavodle Lebiadka, vierahodna, pasłužyć nahodaj dla ŭzmacnieńnia krain NATA i Ukrainy.
«Takim čynam, nas ŭsio bolš zaciahvaje ŭ varonku eskałacyi, usio bolš padviarhajem siabie ryzycy vajny», — reziumuje Lebiadok.
«Demanstracyja taho, jak važna dapamahać byłym impieryjam vyjści z posttraŭmatyčnaha sindromu»
Arciom Šrajbman miarkuje, što «pramova Pucina — heta vielmi vyraznaja demanstracyja taho, jak važna dapamahać byłym impieryjam adrazu paśla kałapsu vyjści z posttraŭmatyčnaha sindromu (ci nie ŭvajści ŭ jaho)».
Šrajbman miarkuje, što dla Biełarusi nie tak važny «danbaski čyžyk, jakoha, zdajecca, vyrašyŭ źjeści Pucin, nie damohšysia ad Zachadu zapatrabavanych sastupak», jak važny padychod Pucina i jaho atačeńnia da sučasnaha status-kvo jak druhasnaha.
Važna zapomnić pamyłki pracy z hetymi traŭmami ŭ toj čas, pakul ich možna było lačyć, ličyć Šrajbman.
«Mahčyma, našamu pakaleńniu daviadziecca praduchilać takija ž prablemy ŭ tych, čyjoj traŭmaj budzie kaniec Rasii Pucina i Biełarusi Łukašenki», — havoryć jon.
«Varyjantaŭ nie pryznavać niama»
Piotr Kuźniacoŭ u svaim telehram-kanale robić prahnoz, što ciapier u žyvym efiry ŭsie nazirajuć pačatak finalnaha etapu skonu «saŭka».
Jon stavić pytańnie, ci jość varyjanty ŭ aficyjnaha Minska nie pryznać «ŁNR» i «DNR».
Na dumku ekśpierta, va ŭmovach tatalnaj zaležnaści paśla 2020-ha, poŭnaj błakady na Zachadzie i vajennych vučeńniaŭ z prysutnaściu rasijskich vojskaŭ, varyjantaŭ nie pryznavać niama.
Jak na heta adreahuje Ukraina? Tut, pavodle ekśpierta, taksama ŭsio prahnazujema.
«Jakija varyjanty ŭ Zialenskaha, kali takoje pryznańnie adbudziecca? Nijakich. Tolki ŭvodzić sankcyi i całkam spyniać handal. Alternatyva — palityčnaja śmierć»,— ličyć Kuźniacoŭ.
Dalej, pavodle jaho, usio budzie taksama prosta. I sumna.
«Kalijem chutka možna budzie zarpłaty ŭ zalik vydavać, a tut jašče i płoščy Mazyrskaha NPZ možna budzie zdavać pad ofisy. Dadamo siudy nieminučyja novyja ekanamičnyja sankcyi i atrymajem albo chutki kałaps u adzinočku, albo bolš pavolny, ale razam z Maskvoj».
Bo Rasija pry takim raskładzie sama traplaje ŭ kanfrantacyju, u pieršuju čarhu ekanamičnuju, z Zachadam. Akramia taho, jana budzie vymušanaja finansavać novazdabytych «niezaležnych» susiedziaŭ, i byłych «sajuźnikaŭ», jakija svajo sajuźnictva paćvierdziać pryznańniem.
«Tamu finał, rańni abo poźni, kryvavy abo biaskroŭny, usio roŭna pradkazalny. U śpirali eskałacyi vyjhraje zaŭsiody bolš ekanamična ŭstojlivy ‒ tak było zaŭsiody ŭ historyi roŭna z taho momantu, jak ludzi pierastali vajavać dubinami i pierajšli na inšy ŭzrovień», — kaža Piatro Kuźniacoŭ.
Rasija pryznała niezaležnaść «DNR» i «ŁNR». Što budzie dalej? Vajna?
«Sajuznaja dziaržava ciapier narešcie i praŭda isnuje». Što rasijskija ŚMI pišuć pa vynikach sustrečy Pucina i Łukašenki
Były palitviazień z žonkaj adkryli kramu suvieniraŭ — jak idzie sprava?4
Kamientary