MZS Rasii zajaviła, što Rasija pryznaje DNR i ŁNR u miežach ich ułady. Ale kamientaryi supraćlehłyja

Rasija pryznaje DNR i ŁNR u miežach, u ramkach jakich ich kiraŭnictva realizuje svaje ŭładnyja paŭnamoctvy i jurysdykcyju. Pra heta RBK raspavioŭ namieśnik kiraŭnika MZS RF Andrej Rudenka.

U toj ža čas pres-sakratar Pucina Dźmitryj Piaskoŭ zajaviŭ, što respubliki pryznanyja ŭ miežach, abvieščanych u 2014 hodzie (to-bok, u miežach Danieckaj i Łuhanskaj abłaściej).

Namieśnik staršyni Kamiteta Savieta Fiederacyi pa mižnarodnych spravach Andrej Klimaŭ taksama raniej kazaŭ, što Rasija pryznaje ŁNR i DNR u miežach, jakija faktyčna ŭstanoŭlenyja.

U toj ža čas deputat ad KPRF i kiraŭnik kamiteta pa spravach SND Leanid Kałašnikaŭ raniej zajaŭlaŭ, što miežy, u jakich Rasija pryznaje DNR i ŁNR, samaabvieščanyja respubliki pavinny vyznačać samastojna.

Pradstaŭnik ŁNR u kantaktnaj hrupie Radzivon Mirošnik, u svaju čarhu, śćviardžaŭ, što imknieńnie respublik na siońniašni dzień — adnavić terytaryjalnuju cełasnaść i tuju terytoryju, jakaja adpaviadaje volevyjaŭleńniu ludziej, zajaŭlenamu na refierendumie 11 maja 2014 hoda.

Jak adroźnivajucca zajaŭlenyja i faktyčnyja miežy DNR i ŁNR

Zajaŭlenyja: zhodna z zakonam DNR ab dziaržaŭnaj miažy, jana prachodzić z Ukrainaj pa administracyjnaj miažy Danieckaj vobłaści (z ulikam terytaryjalnaha mora) z Charkaŭskaj, Dnieprapiatroŭskaj i Zaparožskaj abłaściami Ukrainy; z Łuhanskaj narodnaj respublikaj — pa administracyjnaj miažy Danieckaj i Łuhanskaj abłaściej Ukrainy; z Rasijskaj Fiederacyjaj — pa linii dziaržaŭnaj miažy Ukrainy z Rasijskaj Fiederacyjaj u miežach administracyjnaj miažy Danieckaj vobłaści Ukrainy.

Zhodna z zakonam ŁNR ab miažy, jana prachodzić z Ukrainaj — pa administracyjnaj miažy Łuhanskaj vobłaści z Charkaŭskaj vobłaściu; z Danieckaj narodnaj respublikaj — pa administracyjnaj miažy Łuhanskaj i Danieckaj abłaściej Ukrainy; z Rasijskaj Fiederacyjaj — pa linii miažy Ukrainy z Rasijskaj Fiederacyjaj u miežach administracyjnaj miažy Łuhanskaj vobłaści Ukrainy.

Faktyčnyja: druhija minskija pahadnieńni zafiksavali zony biaśpieki pamiž «respublikami» i terytoryjaj, padkantrolnaj Ukrainie. Baki pavinny byli advieści ciažkaje ŭzbrajeńnie na 50 km adzin ad adnaho. Zhodna ź imi, DNR padkantrolnaja tolki častka byłoj Danieckaj vobłaści Ukrainy, a ŁNR — tolki častka byłoj Łuhanskaj vobłaści Ukrainy.

Pavialičyć

Na siońniašni dzień DNR zajmaje terytoryju 7,85 tys. km z nasielnictvam kala 2,2 młn čałaviek. ŁNR raźmieščanaja na terytoryi 8,38 tys. km z nasielnictvam u 1,4 młn čałaviek. Terytoryja administracyjnych miežaŭ Danieckaj vobłaści roŭnaja 26,5 tys. km, Łuhanskaj 26,6 tys. km.

• 0
• 0
• 0
• 0
• 0
• 0
• 0
• 0