Viarchoŭnaja Rada zaćvierdziła ŭviadzieńnie nadzvyčajnaha stanovišča va Ukrainie z 24 lutaha
Nadzvyčajnaje stanovišča ŭvodzicca na 30 dzion, pačynaje dziejničać z 0.00 24 lutaha. Za heta prahałasavali 335 deputataŭ Viarchoŭnaj Rady, paviedamlaje Radyjo Svaboda.
Ciapier režym nadzvyčajnaha stanovišča budzie dziejničać va ŭsioj krainie. U Łuhanskaj i Danieckaj abłaściach jano nie ŭvodziłasia, ale tolki tamu, što faktyčna jano tam i tak dziejničaje ŭžo 8 hadoŭ.
Pierad hetym deputaty ŭchvalili pastanovu ab bieśpierapynnaj pracy parłamienta va ŭmovach nadzvyčajnaha stanovišča i źmieny ŭ dziaržaŭny biudžet — dadatkova vydatkavaŭšy 23 miljardy hryŭniaŭ (bolš jak 800 miljonaŭ dalaraŭ) na abaronu.
Na pieryjad nadzvyčajnaha stanovišča ŭvodzicca asablivy režym ujezdu va Ukrainu i vyjezdu ź jaje, abmiažoŭvajecca ruch hramadzian i transpartnych srodkaŭ, zabaraniajucca masavyja akcyi i strajki.
Nie vyklučajecca taksama časovaja abo niezvarotnaja evakuacyja ludziej ź niebiaśpiečnych dla žyćcia miescaŭ z abaviazkovym nadańniem im stacyjanarnych abo časovych žyłych pamiaškańniaŭ.
Pry patrebie moža dadatkova ŭvodzicca kamiendanckaja hadzina i pravierka dakumientaŭ u hramadzian, a taksama dazvoł na nadhlad rečaŭ, transpartnych srodkaŭ, bahažu, hruzaŭ, słužbovych pamiaškańniaŭ i žytła hramadzian. Ale mabilizacyja pry nadzvyčajnym stanoviščy nie pravodzicca.
Tym časam ukraincy pry pahrozie novaj ahresii znoŭ pačali aktyŭna achviaravać hrošy na armiju. Dabračynny fond «Viarnisia žyvym» paviedamiŭ, što za adzin dzień hramadzianie Ukrainy pieraličyli na patreby vajskoŭcaŭ bolš za 20,5 miljonaŭ hryŭniaŭ (bolš jak 700 tysiač dalaraŭ).
Čytajcie taksama:
Ukraina ŭviała śpiecyjalnyja abmiežavańni na miažy ź Biełaruśsiu i Rasijaj
Zialenski adkazaŭ na ŭltymatum Pucina
«Dobry lesarub, ale sa źviazanymi rukami». Dypłamaty padsumoŭvajuć vyniki pracy zvolnienaha ministra Alejnika1
Kamientary