«Rasijanie ŭnačy pačali malavać litaru «Z» na mašynach». Što adbyvajecca na miažy, dzie zabłakavali 28-kiłamietrovuju čarhu fur
Učora stała viadoma, što polskija i ŭkrainskija aktyvisty błakujuć biełaruskija i rasijskija fury na miažy pad Brestam. Čarha fur raściahnułasia na 28 kiłamietraŭ. Daviedalisia, što ciapier adbyvajecca ŭ punkcie propusku «Kazłovičy — Kukuryki».
Pra situacyju raskazvaje ŭkrainka Iryna Ziemlana, jakaja arhanizavała akcyju. Jana supracoŭnica Instytuta masavaj infarmacyi. Jak i mnohija inšyja ŭkraincy, žančyna była vymušanaja źjechać z domu z-za vajny.
«Naša akcyja trymajecca ŭžo troje sutak. Kali źjechała ŭ Polšču, tut stali havaryć, što niekatoryje sankcyi kampanii sprabujuć abychodzić, paŭpryvatnym čynam zavoziać padsankcyjnyja tavary ŭ Biełaruś i ŭ Rasiju. To-bok aficyjna kampanijam pradavać tavary ŭ hetych krainach nielha, ale jany znachodziać, jak možna ich zavieźci. Tamu my razam z ukrainskimi biežancami, z suajčyńnikami, jakija žyvuć u Polščy, vyrašyli pajści na mitynh na miažu i fizična zabłakavać prajezd hetych fur.
Što viazuć? Naprykład, dva biełarusy, jakija pryjšli da nas na razmovu, vieźli «Marcini» ź Italii, jaki byŭ pierapakavany z rasijskich fur u biełaruskija.
Takim čynam jon moh trapić ŭ Rasiju», — kaža Iryna.
Pa słovach žančyny, spačatku čarha była na 23 kiłamietry. Ciapier jana našmat bolšaja.
«My ž tut staim i dzień, i noč. Mianiajemsia z pratestoŭcami, pa hrafiku, kali tak možna skazać. Nas niašmat, kala 30 čałaviek, jakija ŭvieś čas znachodziacca na miažy. Kiroŭcy vielmi drenna na nas reahujuć. Pieršy dzień sprabavali damovicca, rasijanie dasyłali biełarusaŭ, jakija raskazvali, što jany tut ni pry čym. My heta razumiejem, ale ŭ nas idzie vajna. Rasijanie pakazvali nam čelesy z voknaŭ fur, kryčali, što my nacysty i što my zabivajem dziaciej. Pryjechała polskaja palicyja, jany stali pamiž nami, uziali dubinki. Ale siońnia ŭžo jość palicyjanty z aŭtamatami.
Taksama rasijanie ŭnačy pačali malavać litaru «Z» na furach, skazali, što jany za vajnu, jany nienavidziać ukraincaŭ i što jany buduć dušyć nas mašynami.
A my nijak nie reahujem, my staim, dla nas važna trymać miažu», — kaža jana.
Iryna Ziemlana ŭpeŭnienaja, što stajać jany buduć, pakul jeŭrapiejskaja ŭłada nie prymie jakoje-niebudź rašeńnie.
«Heta prablema nie polskaj ŭłady, heta miaža Jeŭrasajuza i Biełarusi. Polskaja ŭłada kaža, što jany hatovyja zakryć miažu, jany źviartajucca z hetym da Jeŭrasajuza. My budziem stajać i čakać rašeńnia», — kaža žančyna.
Kamientary