Kolki čałaviek zahinuła na Danbasie ad bajavych dziejańniaŭ za papiarednija hady? Pryvodzim ličby
Dla apraŭdańnia ahresii suprać Ukrainy rasijskaja prapahanda šyroka vykarystoŭvaje termin «hienacyd» u adnosinach da situacyi, što skłałasia na Danbasie z 2014 hoda pa siońniašni dzień. Na padstavie štohadovych dakładaŭ, apublikavanych na staroncy «ŭpaŭnavažanaj pa pravach čałavieka DNR», pasprabavali razabracca, što tam adbyvałasia.
Aktyŭnyja bajavyja dziejańni na Danbasie prachodzili ŭ 2014 — 2015 hadach. Pačalisia jany sa sproby rasijskich sił zachapić Danbas śledam za Krymam. Pačynajučy z 2015-ha i da 24 lutaha 2022-ha kantaktnaja linija praktyčna nie źmianiałasia. Adpaviedna, u VSU, jakija pavodle rasijskaj prapahandy adkaznyja za «hienacyd», nie było dostupu da terytoryi kantralavanaj DNR.
2016 hod
U dakładzie ŭpaŭnavažanaha DNR pa pravach čałavieka prysutničajuć takija źviestki: z 1 studzienia pa 1 śniežnia 2016 hoda ŭ DNR zahinuła 314 čałaviek, ź jakich 303 mužčyny, 11 žančyn, zahinuła troje dziaciej. U dakładzie nie adznačana, kolki z zahinułych mužčyn byli vajskoŭcami, a kolki — cyvilnym nasielnictvam. Ale sama praporcyja mužčyn i žančyn śviedčyć, što havorka była pieravažna pra sutyknieńni na froncie.
U tym ža dakładzie adznačajecca: «Kolkaść zahinułych istotna skaraciłasia, heta źviazana sa źnižeńniem eskałacyi kanfliktu, a taksama damoŭlenaściami ab spynieńni ahniu, praduhledžanymi kompleksam mier pa vykanańni Minskich pahadnieńniaŭ».
2017 hod
Na praciahu 2017 hoda kolkaść zahinułych vajskoŭcaŭ skłała 222 čałavieki, mirnych hramadzian — nibyta 32 čałavieki. Siarod zahinułych — 13 žančyn i dvoje dziaciej. Iznoŭ ža dola, žančyn i dziaciej ukazvaje na toje, što bai išli na froncie.
«Kolkaść žycharoŭ Danieckaj Narodnaj Respubliki, jakija zahinuli ŭ vyniku ŭzbrojenaj ahresii z boku Ukrainy ŭ 2017 hodzie źmienšyłasia na 94», — adznačajecca ŭ dakładzie.
2018 hod
Pa stanie na 1 śniežnia 2018 hoda zahinuli 135 vajskoŭcaŭ i 19 cyvilnych. Siarod zahinułych 10 žančyn i 5 dziaciej.
2019 hod
Za 2019 hod zahinuła 160 čałaviek — 154 mužčyny i 6 žančyn. Siarod zahinułych 151 — heta vajskoŭcy, 9 — cyvilnyja asoby.
U dakumiencie adznačajecca, što ź lipienia 2019 było dasiahnuta stabilnaje pieramirje.
2020 hod
U dakładzie za 2020 hod adznačana: «Za pieryjad z 1 studzienia pa 1 śniežnia 2020 hoda na terytoryi Danieckaj Narodnaj Respubliki ŭ vyniku ŭzbrojenaj ahresii z boku Ukrainy zahinuła 39 vajskoŭcaŭ respubliki i 5 hramadzianskich asob. Takim čynam, 2020 hod vyznačyŭsia samym nizkim pakazčykam śmiarotnaści za ŭvieś pieryjad uzbrojenaha kanfliktu. Padobny prahres staŭ šmat u čym mahčymy dziakujučy ŭstupleńniu ŭ siłu z 27 lipienia 2020 dadatkovych mier režymu biesterminovaha spynieńnia ahniu pamiž DNR i dziaržavaj Ukraina».
Jak vidna, ahulnaja kolkaść zahinułych mieła tendencyju da źmianšeńnia hod ad hodu, a bolšaja ich častka — heta mienavita vajskoŭcy, a nie cyvilnaje nasielnictva. Heta situacyja pry ŭsioj trahičnaści nie maje ničoha supolnaha z hienacydam, a raździmańnie hetaj temy nieabchodnaje Rasii vyklučna dla apraŭdańnia ahresii suprać Ukrainy.
Ale nie treba zabyvać, što korań prablemy na Danbasie — sproba Rasii adarvać hetuju terytoryju ad suvierennaj Ukrainy. Nahadajem, što sama Rasija padaŭlała sprobu Čačni adździalicca z našmat bolšaj žorstkaściu. Hrozny paśla čačenskaj vajny byŭ prosta ściorty ź ziamli. Danieck i Łuhansk ža ŭjaŭlajuć saboj narmalna funkcyjanujučyja harady.
«Jon užo doma». Dačka Ryhora Kastusiova raskazała pra pieršuju hutarku z baćkam paśla vyzvaleńnia1
Kamientary