«U Biełarusi poŭnym chodam idzie čyhunačnaja vajna. Za try dni ŭžo druhi ciahnik syšoŭ z rejek. Ciahnik pieravoziŭ vajskovuju techniku RF», — takoje paviedamleńnie raspaŭsiudžvajuć mnohija ŭkrainskija i praŭkrainskija telehram-kanały.
Heta fejk. Čyhunačnych avaryj u Biełarusi za čas vajny va Ukrainie nie fiksavałasia, akramia sutyknieńnia ciahnika rehijanalnych linij z traktaram, jaki pieravoziŭ hnoj, pad Minskam.
Biełarusy pravodzili akty sabatažu. Na niekatorych pierahonach byli spalenyja relejnyja šafy, na inšych — zamknuli drotam rejki, tym samym vyvieli z ładu sihnalizacyju. Pad Stoŭbcami siamja vyciahnuła na rejki biarviony. Ale hetyja akcyi zapavolvajuć ruch ciahnikoŭ tolki na niekatory čas, nie ŭpłyvajuć na biaśpieku ruchu.
Niama dokazaŭ, što rasijanie abmiežavali pierasoŭvańnie svajoj techniki pa Biełaruskaj čyhuncy.
Biełaruskaje padpolle pravodziła akcyi, jakija nie niasuć pahrozu sychodu ciahnikoŭ z rejek ci čałaviečych achviar.
Tym nie mienš, navat za hetyja akty sabatažu ludzi płaciać doŭhimi terminami turemnaha źniavoleńnia, pryčym aryštavanych niaredka katujuć.
Čytajcie taksama: «Pa supracoŭnikach pracuje niepasredna KDB». Padrabiaznaści zatrymańniaŭ na čyhuncy
Stała viadoma pra aryšt nie mienš za 30 čyhunačnikaŭ, jakija byli źviazanyja z dyviersijami, u roznych rehijonach Biełarusi. Akramia taho, Kamitet dziaržaŭnaj biaśpieki Biełarusi i HUBAZiK, struktura Ministerstva ŭnutranych spraŭ, jakaja vykonvaje funkcyi palityčnaj palicyi, za apošnija tydni aryštavała niekalki dziasiatkaŭ ludziej u Mazyry i rajonie, u Śvietłahorsku i rajonie, u Baranavičach, Stoŭbcach i ŭ Dziaržynsku. Metami zatrymańniaŭ byli ludzi, jakija rychtavali akty drobnaha sabatažu na čyhuncy abo pieradavali ŭ niezaležnyja ŚMI i telehram-kanały infarmacyju ab pieramiaščeńni rasijskich vojskaŭ ci puskach rakiet pa Ukrainie. Za apošniaje aryštavanym pahražaje da 6 hadoŭ turemnaha źniavoleńnia — takija dziejańni łukašenkaŭcy interpretujuć jak «dapamohu ŭ pracy ekstremisckaha farmiravańnia».
Tym nie mienš, pa infarmacyi abjadnańnia byłych siłavikoŭ «Bajpoł», śpiecsłužbam udałosia ŭskryć tolki adnu supołku płana «Pieramoha», u inšych vypadkach prajšli randomnyja zatrymańni ludziej z apazicyjnymi pohladami abo hramadska aktyŭnaj moładzi.
Čytajcie taksama: Chronika rejkavaj vajny ŭ Biełarusi-2022. Što viadoma na siońnia
«Z 1 kastryčnika nichto pracavać nie budzie». U Biełarusi začyniajucca pryvatnyja damy sastarełych3
Kamientary