«Chacieli, kab my pamierli». Častka vajskoŭcaŭ z Paŭdniovaj Asiecii admoviłasia vajavać va Ukrainie
Častka kantraktnikaŭ 4-j hvardziejskaj vajskovaj bazy 29 sakavika admovilisia vajavać va Ukrainie. Pa paviedamleńniach paŭdniovaasiecinskich telehram-kanałaŭ, vajskoŭcy viartalisia ŭ respubliku litaralna pieššu. «Miedyjazona» raspaviadaje, jak raźvivalisia padziei i cytuje aŭdyjozapis, na jakim, jak miarkujecca, adzin z sałdat apisvaje toje, što adbyłosia.
Častka vajskoŭcaŭ z samaabvieščanaj Paŭdniovaj Asiecii admovilisia ŭdzielničać u bajavych dziejańniach na terytoryi Ukrainy i samastojna viarnułasia ŭ Cchinvali. Pieršym pra heta napisaŭ uviečary 30 sakavika tielehram-kanał «Bonvarnon» — tam źjavilisia niekalki pastoŭ pra «vajskoŭcaŭ 4-j vajennaj bazy», jakich «vysadzili na mytni», paśla čaho jany byli vymušanyja samastojna dabiracca da Cchinvali. Na fota, apublikavanych u kanale, bačnyja niekalki vajskoŭcaŭ, jakija stajać uzdoŭž trasy ŭ rasijskaj vajskovaj formie z rečavymi miaškami.
«Vajskoŭcy čaćviortaj vajskovaj bazy na KPP Nižni Zaramah — tłumačyć kanał. — Na fota nie vidać ni aŭtobusaŭ, ni transpartnych vajskovych hruzavikoŭ». Paźniej tam ža ŭdakładnili, što na paŭdniovym baku Rokskaha tunela sałdat čakała vajennaja technika.
Infarmacyju paćvierdziŭ u siabie ŭ telehram-kanale eks-prezident Paŭdniovaj Asiecii Eduard Kakojty. Nie nazvaŭšy dakładnuju kolkaść tych, chto admovizsia vajavać, Kakojty paabiacaŭ zmahacca za kožnaha ź ich i zaklikaŭ svajakoŭ vajskoŭcaŭ ustrymacca ad pratesnych akcyj da vyśviatleńnia pryčyn učynku sałdat.
«Nichto nie maje prava asudžać hetych chłopcaŭ abo vinavacić ich u bajaźlivaści, — napisaŭ Kakojty. — Varta razabracca ŭ pieršapryčynach i vyśvietlić, jakim čynam byŭ arhanizavany ich udzieł. Hetym my zojmiemsia samym surjoznym čynam».
Kakojty dadaŭ, što hetaja situacyja nie pavinna «padryvać bajavy duch sotniaŭ našych bajcoŭ u zonie bajavoj apieracyi» i nie vyklučyŭ, što sałdat, jakija viarnulisia ŭ Paŭdniovuju Asieciju, znoŭ adpraviać na vajnu «pry zabieśpiačeńni naležnaj arhanizacyi ich udziełu».
Viečaram 30 sakavika infarmacyju paćvierdzili i va Upraŭleńni stratehičnych kamunikacyj Uzbrojenych sił Ukrainy.
«Niekalki dzion tamu amal uvieś asabisty skład adnoj z bataljonnych taktyčnych hrup (dźvie motastrałkovyja roty i minamiotnaja batareja), jakija byli sfarmavanyja sa składu 4-j vajennaj bazy US RF (v/č 66431, h. Cchinvali, Paŭdniovaja Asiecija) i zadziejničany na Danieckim kirunku, admoviŭsia ad udziełu ŭ vajennaj ahresii suprać Ukrainy», — havorycca na staroncy ŭ Fejsbuku viedamstva.
Pavodle ŭkrainskich źviestak, 29 sakavika vajskoŭcaŭ z Paŭdniovaj Asiecii arhanizavana pieravieźli na vajskovy palihon «Kuźminski» ŭ Rastoŭskaj vobłaści, dzie ź imi pahutaryŭ namieśnik kamandujučaha 58-j armii. «Adnak jaho zakliki da praciahu pastaŭlenych zadač nie ŭviančalisia pośpiecham», — havorycca ŭ paviedamleńni.
Pra toje, što paŭdniovaasiecinskija kantraktniki adpraŭlajucca na vajnu va Ukrainu, 16 sakavika paviedamlała «Recha Kaŭkaza».
Praź niekalki dzion prezident samaabvieščanaj respubliki Anatol Bibiłaŭ u telehramie tak prakamientavaŭ adpraŭku paŭdniovaasiecinskich vajskoŭcaŭ va Ukrainu: «Vy pytajeciesia ŭ mianie, što ja dumaju pra udzieł vajskoŭcaŭ 4-j vajennaj bazy ŭ śpiecapieracyi va Ukrainie? Ja dumaju, što inšaha vyjścia i inšaha rašeńnia ŭ asiecinskaha mužčyny niama i być nie moža! Nie ja addaŭ zahad 4-j vajennaj bazie, tamu što heta armija RF, ale kali naš siabar pad prycełam, kali naš siabar u biadzie, my ŭstaniem pobač i budziem bicca plačom da plača. Mnie kažuć, što našych chłopcaŭ adpraŭlajuć na śmierć. Nie! Nie — ich adpraŭlajuć za pieramohaj!»
* * *
16 sakavika Minabarony Paŭdniovaj Asiecii paviedamiła ab hibieli 35-hadovaha siaržanta Andreja Bakajeva z Cchinvali, jaki słužyŭ u adnym z padraździaleńniaŭ 58-j armii. Na nastupny dzień jaho ŭračysta pachavali.
«Andrej Bakajeŭ pry vykanańni bajavych zadač padčas śpiecyjalnaj vajennaj apieracyi na terytoryi Ukrainy, prajaviŭšy ŭzory mužnaści i hieraizmu, z honaram i hodnaściu vysoka nios imia voina-vyzvaliciela, voina-abaroncy. Jon da apošniaha ŭzdychu zastavaŭsia viernym vajennaj prysiazie i voinskamu abaviazku», — havorycca ŭ paviedamleńni ministerstva.
Paranieny kamandzir ekipaža Alaksiej Habarajeŭ raspavioŭ pra zahinułaha Bakajeva. Pavodle jaho słoŭ, na Danbas jany «zajazdžali, uśmichajučysia, usie byli ŭ zbory», zachapili siało Vinahradaŭka. Bakajeŭ byŭ navodčykam: jon pamior ad atrymanych ran paśla abstrełu pad Horłaŭkaj. «Uvieś ekipaž 266-j mašyny vielmi ŭdziačny Andreju!» — kaža ŭ intervju Habarajeŭ.
* * *
Prablemy z udziełam paŭdniovaasiecinskich vajskoŭcaŭ u vajnie pačalisia z momantu adpraŭki, śćviardžaje krynica «Miedyjazony» ŭ Paŭdniovaj Asiecii.
«Skandał byŭ, kali ich jašče tolki adpraŭlali tudy. Adpraŭlali absalutna biez usiaho, pustymi. Ludzi na svaje hrošy kuplali im broniekamizelki i inšaje», — kaža jon.
25 sakavika vydańnie «Sputnik-Asiecija» paviedamlała, što žychary Paŭdniovaj Asiecii adpravili suajčyńnikam, jakija ŭdzielničajuć u bajavych dziejańniach va Ukrainie, humanitarnuju dapamohu — pradukty, adzieńnie i vajennuju ekipiroŭku, nabytyja na hrošy «nieabyjakavych da losu vajskoŭcaŭ» ludziej i miascovych pradprymalnikaŭ. Taksama vajskovy ryštunak dla vajskoŭcaŭ pieradało Ministerstva ŭnutranych spraŭ Paŭdniovaj Asiecii.
Akramia taho, eks-kiraŭnik Paŭdniovaj Asiecii Eduard Kakojty, jaki abviaściŭ u lutym pra namier znoŭ bałatavacca na prezidenckich vybarach, na sustrečy z prychilnikami kazaŭ, što respublika pavinna abjadnacca, kab «vyratavać chłopcaŭ», u jakich pavinny być «elemientarnyja ŭmovy» dla ŭdziełu ŭ bajavych dziejańniach. «Heta nie harmatnaje miasa, nas i tak mała. My hienafond [ŭžo] praktyčna stracili», — pryvodzić jaho słovy «Recha Kaŭkaza».
Sa słoŭ krynicy «Miedyjazony», paŭdniovaasiecinskija vajskoŭcy-kantraktniki 4-j hvardziejskaj vajskovaj bazy ŭ Cchinvali viarnulisia ŭ respubliku 30 sakavika.
«Nakolki ja zrazumieŭ, prablema ŭźnikła, kali adzin z sałdat padarvaŭsia na minie, — kaža krynica.
— I jany chacieli jaho cieła zabrać, kab adpravić dadomu. Prosta dla nas, asiecinaŭ, cieła pamierłaha siabra — śviatoje. A im ich hienierał, načalnik skazaŭ: jakoje cieła, my pustuju trunu adpravim. Jany kažuć: my voiny, my nie trusy, ale voś tak, kab ciabie na zaboj adpraŭlali, a potym jašče tvoj trup nie zabirali — nam heta nafih nie treba. I jany vyjšli. I ŭčora viarnulisia ŭ Paŭdniovuju Asieciju».
Pa jaho słovach, u respubliku viarnulisia kala 300 vajskoŭcaŭ.
Surazmoŭca «Miediazony» spasyłajecca na aŭdyjozapis, na jakim na asiecinskaj movie pra situacyju raspaviadaje nibyta adzin z sałdat:
«Heta ****** [katastrofa]. Nas pavieźli i chacieli, kab my pamierli, a našy staršyja atrymali «hierojaŭ». Chłopiec tam pamior, mnohija zahinuli. Ich abstralali, potym jany adyšli. Adzin chłopiec byŭ uvieś zaminavany. Jon pamior, a jaho piachotnaja hrupa vyjšła nazad. Potym [kalehi zahinułaha] zajšli da staršaha i kažuć — davajcie padydziem da jaho i vyciahniem jaho, jaho razarvała na častki. I choć jakija-niebudź častki cieła jaho zabiarem, nu tam hałavu, kab niešta adpravić dadomu. A staršy kaža tak: «Adpraŭcie pustuju skrynku, cynkavuju pustuju, kab jany viedali, što jon zahinuŭ». I našy chłopcy ašaleli. Chacieli jaho tam zabić. A ŭ jaho achova 10—12 čałaviek, kab jamu nichto jaho mamu nie ****** [zhvałciŭ]. Jany nas na śmierć viali. Voś pryjedziem i pahavorym ź ludźmi, i navat na płošču možam vyjści — skazać, što nas viali na viernuju śmierć».
Aŭtar paviedamleńnia padkreślivaje, što paŭdniovaasiecinskija bajcy nie źbiehli ź miesca bajavych dziejańniaŭ: «My piać dzion vajavali pa-sapraŭdnamu. A nas potym prosta pasyłali na śmierć. Kožny heta viedaje. I my heta dakažam».
Krynica «Miediazony» nie vyklučaje, što tyja, chto viarnuŭsia z Ukrainy, apynucca «pad presinham».
«Što ź imi budzie — nichto nie viedaje. Heta pa fakcie deziercirstva, na ich kryminałku pavinny zavieści. Ale kali tak zdarycca, to padziei ŭ Paŭdniovaj Asiecii mohuć raźvivacca niepradkazalna».
«My byli družnyja z Ejsmantam». Viadučy Aleh Citkoŭ addaŭ BT amal 20 hadoŭ, ale zvolniŭsia paśla vybaraŭ — pahutaryli ź im8
Kamientary