«Hienacyd ruskaha narodu, Rasija nie mieła vybaru»: što tranślujuć biełaruskija rehijanalnyja čynoŭniki i ŚMI
Siońnia publičnych asob niaredka ŭpikajuć za maŭčańnie: maŭlaŭ, jak možna ničoha nie kazać pra vajnu va Ukrainie, kali tam štodnia hinuć mirnyja žychary, padajuć bomby i ljecca kroŭ? I pakul śpievaki, akciory, biznesoŭcy zachoŭvajuć cišyniu, vykazvajucca niekatoryja biełaruskija pravincyjnyja čynoŭniki — vielmi śpiecyfična.
Hałoŭny ideołah Hrodzienščyny Ihar Bułaŭka spakojna pierakazvaje chłuśniu rasijskaj prapahandy:
«Pry aktyŭnym umiašańni ZŠA ŭ 2014 hodzie, u vyniku «Jeŭramajdana», faktyčna dziaržaŭnaha pieravarotu, va Ukrainie da ŭłady prychodzić novaje kiraŭnictva, jakoje abapirajecca na nacyjanalistyčnyja i nieanacysckija hrupoŭki.
Ideałohija dziaržavy nabyvaje vielmi nacyjanalistyčnyja formy, u tym liku datyčnyja pierahladu vynikaŭ Vialikaj Ajčynnaj vajny, hieraizacyi kałabarantaŭ i pamahatych fašystaŭ».
«Suprać žycharoŭ Danbasa ŭkrainskija ŭłady arhanizavali vajennuju apieracyju. Na praciahu 8 hadoŭ nieanacysty zabivali tam cyvilnaje nasielnictva: žančyn, dziaciej, starych. Uzbrojenyja siły Ukrainy, Nachvardyi i nacyjanalistyčnych dobraachvotnickich farmiravańniaŭ naŭmysna nanosili ŭdary pa hramadzianskich abjektach», — raskazvaje čynoŭnik.
Paśla jon pierakazvaje słovy Pucina pra denacyfikacyju i demilitaryzacyju i dadaje:
«U płany nie ŭvachodzić akupacyja ŭkrainskich terytoryj. Siońniašnija padziei źviazanyja nie z žadańniem uščamić intaresy Ukrainy i ŭkrainskaha naroda. Jany źviazanyja z abaronaj samoj Rasii ad tych, chto ŭziaŭ Ukrainu ŭ zakładniki i sprabuje vykarystać jaje suprać Rasii i jaje naroda».
Abłasnaja hazieta «Vitiebskije viesti» drukuje razmovu z abłasnym vajenkamam Rusłanam Škodzinym. Heta toj samy vajenkam, jaki staŭ zorkaj Tyktoku.
«Ja nie viedaju krainy, dzie niama zakonaŭ, i ŭ kožnaj jany svaje. Naprykład, karennaje nasielnictva Złučanych Štataŭ Amieryki, kiraŭnictva jakich bolš za ŭsich kaža ab svabodzie asoby, da hetaha času žyvie ŭ reziervacyjach. U maim razumieńni heta vialiki kancłahier. Ale taki ŭ ich ład. Kali nie budzie dakładnych ustanovak, nastupić chaos. Pra heta śviedčać padziei va Ukrainie, dzie zakony pierastali pracavać.
Ja ŭpeŭnieny, što ŭ hetaj krainie nie było praviła, jakoje dazvalaje chapać čałavieka, pryviazvać da słupa, kab kožny, chto prachodzić, biŭ jaho pałkaj. Samaje strašnaje, što ŭ samasudzie ŭdzielničali orhany ŭnutranych spraŭ i miascovaj ułady», — kaža vajenkam Viciebskaj vobłaści.
Što takoje zdaryłasia va Ukrainie, što tam raptam pačali pryviazvać ludziej da słupoŭ, Škodzin čamuści nie ŭdakładniaje. A darma — bo ukraincy pryviazvajuć da słupoŭ maradzioraŭ, jakija padčas vajny rabujuć pakinutyja chaty i kramy svaich ža suajčyńnikaŭ.
Hazieta «Ašmianski vieśnik» publikuje razvahi prakurora Ašmianskaha rajona Siarhieja Kavalčuka, jaki pierakazvaje samyja čarnasocienskija tezisy rasijskaj prapahandy pra Ukrainu:
«Imklivaja ŭkrainizacyja krainy radykalnymi elemientami z vykarystańniem instrumientaŭ prapahandy nacysckich idej na fonie źniščeńnia ruskaj kultury, movy, histaryčnaj pamiaci, u tym liku na terytoryi pražyvańnia etničnych ruskich».
«Supraćstajańnie «zachodnich» intaresaŭ i ruskamoŭnaha nasielnictva Ukrainy pačałosia navat nie ŭ 2014 hodzie, prosta «Majdanam» skarystalisia dla taho, kab «na zakonnych padstavach» asłabić ekanomiku krainy, napampavać krainu zbrojaj, zaachvocić ekstremisckija arhanizacyi nacysckaha tołku. Kraina pavinna była stać placoŭkaj dla razhortvańnia sił NATA i ZŠA, kab być «bližej» da Rasii i ŭžo ŭ adkrytuju pravodzić palityku hienacydu ruskaha naroda».
«Pakolki Zachad pastajanna adchilaje prapanovy Rasii pa pytańniach biaśpieki, Uładzimir Zialenski zajaviŭ ab mahčymym pierahladzie płana pa admovie ad jadziernaj zbroi, to ŭ Rasii nie zastałosia vybaru».
Voś vam i pravincyjny biełaruski prakuror.
Usie hetyja zajavy achvotna drukuje rehijanalnaja presa. Pry hetym słova «vajna» abłasnyja i rajonnyja ŚMI vykarystoŭvajuć u dačynieńni da čaho zaŭhodna, akramia sapraŭdnaj vajny. Suprać Biełarusi idzie i «sankcyjnaja vajna», i «infarmacyjnaja vajna». A voś va Ukrainie nijakaj vajny niama: tam albo «kanflikt», albo «śpiecapieracyja».
Hety «kanflikt» u rehijanalnaj presie aśviatlajecca ŭ asnoŭnym pieradrukami. Rajonki šmat cytujuć Łukašenku, publikujuć materyjały ź BiełTA, pierastaŭlajuć siužety dziaržtelebačańnia pra «ukrafejki». Ale sami jany temu vajny va Ukrainie amal nie kranajuć ci robiać heta vielmi aściarožna. Časam pišuć pra ŭkrainskich biežancaŭ, ale tak i nie zhadvajuć, ad čaho tyja raptam biahuć. Vyklučeńnie chiba cytaty čynoŭnikaŭ.
Ale i tut znachodziacca tyja, chto nie moža strymacca.
«Homielskaja praŭda» publikuje padborku historyj biežancaŭ z Ukrainy. Fota i proźvišča surazmoŭcy tolki ŭ adnoj z historyj, ŭsie astatnija ananimnyja. I, samo saboju, pryśviečanyja «źvierstvam ukraincaŭ». U hetych historyjach «Azoŭ» stralaje ŭ śpiny, ukrainskija vajskoŭcy prykryvajucca mirnymi žycharami albo prosta stralajuć u ich. Časam vyhladaje prosta trahikamična:
«Ja hraju na huślach, i ŭ jakaści muzykanta mianie časta zaprašali na pryvatnyja vystupy. Jašče da lutaŭskich padziej rehularna jeździŭ na bazu adpačynku ŭ vioscy Alešnia, dzie žyli biełarusy, jakija ŭciakli na Ukrainu pa palityčnych matyvach, — bačyŭ tam bčb-ściah. Tudy ž jašče pryjazdžali «azoŭcy» z Kijeva. Apošnim časam zrazumieŭ, što heta niejkija radykały i staraŭsia paźbiahać zaprašeńniaŭ».
Ci voś jašče cytata:
«Ukrainskija vajskoŭcy i pamiežniki nikoha nie vypuskajuć u bok Biełarusi, adkryvajuć ahoń na parazu».
«Bandytam davalisia bonusy: ilhoty z boku dziaržavy. Ich nie karali za supraćpraŭnyja dziejańni, asabliva kali jany ździajśnialisia pa nacmatyvach. Voś tak vyroščvali nacyjanalistaŭ», — takija apoviedy publikuje dziaržaŭnaja hazieta.
Rajonka «Babrujskaje žyćcio» ŭvohule cytuje «ekśpierta» ź pieradačy rasijskaha prapahandysta Sałaŭjova:
«Pačałasia suśvietnaja vajna suprać ruskamoŭnych ludziej i ŭsiaho ruskaha. Heta nie hienacyd, a etnacyd. Hitler nie zabaraniaŭ Ułasavu, Krasnovu i inšaj svołačy, jakaja za im pajšła, havaryć na ruskaj movie. Chłopcy, jakija ciapier nami zanialisia, hety nacyzm horaj budzie».
A «Žodzinskija naviny» tranślujuć rasijskuju chłuśniu pra raspracoŭku bijałahičnaj zbroi va Ukrainie, paŭtarajuć za rasijskaj prapahandaj, što razbomblenaja radzilnia ŭ Maryupali — heta nibyta fejk.
Vyhladaje, što ŭ rehijanalnaj presie ciapier dazvolenyja dźvie pazicyi: łukašenkaŭskaja i rasijskaja. Možna cytavać «SB», a možna i Sałaŭjova. Možna pierakazvać słovy Łukašenki pra «hienacyd biełaruskaha naroda», a možna i Pucina pra «hienacyd ruskich na Danbasie».
Soram.
Čytajcie taksama:
U Minabarony Rasii admaŭlajuć dačynieńnie da abstrełu Kramatorska. I «Točki-U» ŭ ich nibyta niama. Ale prapahandysty znoŭ «spalilisia»
Što viadoma pra biełarusa Viktara Paviełku, jakoha ŭ Polščy padazrajuć u arhanizacyi napadaŭ na rasijskich apazicyjanieraŭ3
Kamientary