The Times: Pucin pasprabuje ściahnuć na Danbas siły, u piać razoŭ bolšyja za ŭkrainskija

Spadarožnikavyja zdymki i spravazdačy pakazvajuć, što Rasija naroščvaje vojski i techniku jak minimum u troch miescach na miažy z Ukrainaj: u Biełharadskaj, Varoniežskaj abłaściach i vakoł paŭdniovaha horada Maćviejeŭ Kurhan. Taksama rasijskija vojski ŭzmacniajuć nastup u rajonie Iziuma na paŭdniovy ŭschod ad Charkava.

Čakajecca, što hetyja siły pasprabujuć prasunucca dalej na poŭdzień, kab zachapić Słaviansk, a adtul jany mohuć rušyć napierad na paŭdniovy ŭschod, kab akružyć ukrainskich vajskoŭcaŭ.

Taksama paviedamlajecca, što kali zabłakavany Maryupal «padzie», to da 6000 rasijskich vajskoŭcaŭ taksama zmohuć prasunucca na poŭnač Ukrainy. Adznačajecca, što ŭkrainskija abaroncy pabudavali vialikija ŭmacavańni i akapalisia na ŭschodzie.

Hienierał Ryčard Barans, były hałoŭnakamandujučy brytanskaha vojska, skazaŭ, što «ruskija buduć sprabavać kinuć bolš suchaputnych vojskaŭ, kab daviedacca pravilnyja suadnosiny siłaŭ, viedajučy, što ŭkraincy na ŭschodzie znachodziacca ŭ vielmi dobrym stanoviščy».

Jon skazaŭ, što ŭkrainskija abarončyja pazicyi, jakija dobra zarekamiendavali siabie, «sapraŭdy, ciažka pieraadoleć», i što ekśpierty kazali pra nieabchodnaść suadnosin siłaŭ nie mienš za piać da adnaho, a to i siami da adnaho pry łabavoj atacy. Ale naŭrad ci Rasiei ŭdasca sabrać stolki ludziej.

Berans ličyć, što «heta budzie vielmi ciažki boj na źniasileńnie». Jon taksama skazaŭ, što rasijskija vojski, vierahodna, pasprabujuć akružyć ukrainskija, kab prymusić ich pakinuć dobra abaronienyja pazicyi. Pavodle słoŭ hienierała, dla abarony «ŭkraincam spatrebicca zbroja vialikaj dalokaści i śmiertanosnaści».

12 krasavika zachodni čynoŭnik zajaviŭ, što 38 rasijskich bataljonnych taktyčnych hrup (BTH) kolkaściu da 1000 čałaviek u kožnaj bolš nie bajazdolnyja, u vyniku čaho zastałosia kala 90 BTH: «Mnohija ź ich albo čakajuć zahadu ab pieramiaščeńni, abo vyłučajucca dla ŭzmacnieńnia apieracyj na Danbasie».

Pry suadnosinach siłaŭ piać da adnaho 90 000 rasijskich sałdat buduć zmahacca z 18 000 ukraincami.

Ministr abarony Brytanii Džejms Chipi zajaviŭ, što bitva za Danbas budzie vieścisia pamiž dźviuma «vielmi dobra padabranymi» ŭzbrojenymi siłami, i «całkam vierahodna», što Ukraina atrymaje pieramohu.

Jon skazaŭ Radio Times: «Ukraincam dźmie viecier u śpinu. Jany nanieśli paražeńnie niekatorym z najlepšych pałkoŭ i bataljonaŭ Rasii. Nastupnaja chvala rasijskich vojskaŭ, jakaja pryjdzie da ich na Danbas, budzie nie lepšaj u Rasii».

Jon paŭtaryŭ mierkavańnie, što płan prezidenta Rasii Uładzimira Pucina pa Danbasie abumoŭleny jahonym žadańniem prademanstravać «vialiki vajenny pośpiech» da 9 maja.

• 17
• 0
• 1
• 2
• 2