Jakija impartnyja tavary moža stracić Biełaruś, ci ŭdasca ich zamianić i čym

Jakija tavary ŭ małapryjemnaj dla spažyvieckaha rynku Biełarusi karcinie ŭ pieršuju čarhu akazvajucca ŭ hrupie ryzyki, dajuć zrazumieć impartazamiaščalnyja pieraliki, jakija štohod składaje Ministerstva antymanapolnaha raźvićcia i handlu. U zvyčajnym žyćci — heta rekamiendacyi ajčynnym vytvorcam, jakich MARH takim čynam na praciahu ŭžo mnohich hadoŭ sprabuje padšturchnuć da vypusku nieabchodnych tavaraŭ.

Ale ŭ ciapierašniaj situacyi rekamiendacyi nabyvajuć novy sens: faktyčna heta śpisy patencyjnaha deficytu na palicach ajčynnych handlovych ustanoŭ, paviedamlaje Officelife media.

MARH abnaviŭ śpisy na 2022 hod: adzin pieralik pryśviečany tamu, što zusim nie vyrablajecca ŭ krainie; druhi — što jość, ale ŭ niedastatkovaj kolkaści i nie toj jakaści.

Impartazamiaščeńnie — jak u šaŭkach

U pieralik tavaraŭ, jakija MARH rekamiendavaŭ vypuskać z metaj impartazamiaščeńnia ŭ 2022 hodzie, uvajšli 219 pazicyj. Ź ich 209 — heta niecharčovaja hrupa. U paraŭnańni z 2021-m, pieralik amal nie źmianiŭsia — u minułym było 220 pazicyj. U niecharčovym siehmiencie ŭdałosia naładzić vypusk i, adpaviedna, vyklučyć sa śpisu na 2022 hod chustki, šali z naturalnaha i štučnaha šoŭku. U charčovym siehmiencie źnikli rybnyja kansiervy dla dziciačaha charčavańnia, ale z-za spynieńnia vytvorčaści znoŭ źjavilisia fasavanyja ŭ blašanki suchija małočnyja sumiesi na asnovie kazinaha małaka.

Ad sumak-kalasak da bulby fry

Z deficytam jakich tavaraŭ ryzykuje sutyknucca biełaruski spažyviec u najbližejšy čas? Heta moža zdarycca, kali, viadoma, našy transpartniki i łahisty nie raźviedajuć novyja tranzitnyja napramki z Kitaja ci Turcyi i tavar adtul pa darozie nie raschapajuć u Rasii, dzie imkliva spustašajucca pryłaŭki.

219 pazicyj, pa jakich, zhodna ź pieralikam MARH kraina ŭ hetym hodzie całkam zaležnaja ad impartu, raźbityja na 15 hrup. Najbolšy asartymient — pa haspadarčych tavarach i instrumientach, a taksama pa cackach i tavarach dla dziaciej (31 pazicyja). U pieršuju ŭklučanyja, naprykład, bienzapiły, bienzinavyja hazonakasiłki, šłanhi da pralnych mašyn, ščotki i švabry, sumki-kalaski. U druhuju — akramia raznastajnych cacak, radyjo— i videaniani, dziciačyja aŭtamabilnyja kresły i inš. Pa zamiaščeńni vypadajučych z-za zachodnich sankcyj tavaraŭ usia nadzieja na kitajcaŭ, jakija i biez hetaha zajmajuć tut daminujučaje stanovišča.

Dziciačy asartymient — adzin z hałoŭnych prablemnych napramkaŭ u biełaruskim impartazamiaščeńni. Na praciahu mnohich hadoŭ MARH nie hublaje nadziei, što znojducca miascovyja ŭmielcy na 22 vidy školna-piśmovych tavaraŭ i kancylarskich pryład (ad asadak da školnych hłobusaŭ) i aksesuary dla novanarodžanych (8 pazicyj). Pradukcyja dla dziaciej prysutničaje i ŭ hrupie tavaraŭ dla fizičnaj kultury, sportu i turyzmu (23). Biełaruś impartuje kardyjotrenažory, kańki, šlemy, maski dla chakieja, a taksama šmatlikija pryłady dla hulni ŭ tenis, dla płavańnia i himnastyki, miačy.

Pavialičyć

Na hety hod MARH taksama prapanavaŭ biznesu 26 pazicyj pa elektratavarach (siarod ich — posudamyjnyja mašyny, drobnaja kuchonnaja technika, elektrapyłasosy i elektraprasy, elektrasamakaty), 20 — pa tele-, radyjo-, fotatavarach i vyličalnaj technicy (smartfony, ličbavyja fotaaparaty i videakamiery, płanšety i noŭtbuki) i 16 — pa hałantarejnym asartymiencie (epilatary, elektrabrytvy, manikiurnyja nabory, soncaachoŭnyja akulary). U hrupie tavaraŭ bytavoj chimii ŭsiaho 4 punkty, i ŭ ich liku — sintetyčnyja myjnyja srodki ŭ vyhladzie tabletak i kancentrataŭ.

Siarod dziasiatkaŭ charčovych pazicyj pa-raniejšamu fihurujuć karamiel, bulonnyja kubiki, zamianialniki cukru i zamarožanaja bulba fry z ajčynnaj syraviny dla hramadskaha charčavańnia. Mnohija z hetych tavaraŭ vyrablalisia suśvietnymi brendami na fabrykach u Rasii. U suviazi z zakryćciom hetych vytvorčaściej Biełaruś, jakaja ŭvachodziła ŭ zonu kampietencyi rasijskich filijałaŭ, u bližejšy čas adčuje prablemy z pastaŭkami.

Plus miedycynskija maski i hrušy

Jašče adzin pieralik MARH, u jakim značacca vyrablenyja, ale ŭ niedastatkovym abjomie i nie tych spažyvieckich ułaścivaściaŭ tavary, zvyčajna nievialiki. Ale na biahučy hod jon prykmietna vyras. U im 158 pazicyj (145 ź ich — niecharčovyja), tady jak hodam raniej było 134 (128).

Pryrost źviazany z vonkavymi abstavinami. Viedamstva, adreahavaŭšy ŭ tym liku na situacyju z pandemijaj, zakłapaciłasia, kab u krainie pa mahčymaści była naładžanaja vytvorčaść miedycynskich masak ź filtrami i samich filtraŭ. Hrupa vyrabaŭ sanitarna-hihijeničnaha pryznačeńnia, u jakuju ŭvachodziać hetyja tavary, u cełym razrasłasia na 15 novych pazicyj. Siarod ich — nasoŭki, žanočyja prakładki, kaśmietyčnyja dyski i vatnyja pałački, pialuški dla chatnich žyvioł, a taksama bavaŭnianaja abo bavaŭniana-lnianaja vata.

Pavialičyć

U krainie, miarkujučy pa novych rekamiendacyjach MARH, ciapier nie chapaje (abo jość pytańni pa arhanaleptyčnych i inšych ułaścivaściach) ajčynnych syroŭ niekatorych vidaŭ i harodniny. Pa syrach — heta ćviordyja i zvyšćviordyja, miakkija ź biełaj ćvillu, błakitnyja i inšyja syry, jakija źmiaščajuć prožyłki, ciortyja syry abo ŭ parašku. Siarod harodniny z hetaha hoda fihurujuć asobnyja vidy cybuli (šałot, parej), kapusta (kalarovaja, brokali, brusielskaja, čyrvonakačannaja, sałaty (łatuk kačanny i łatuk inšy), sałodki pierac, sparža, sieldarej, kavuny, zamarožanyja harodnina i jaje sumiesi, hrušy roznych sartoŭ.

Źjaŭleńnie hetych tavaraŭ u śpisie stała adnym sa śledstvaŭ uviedzienych biełaruskim uradam u 2021 hodzie antysankcyjnych mier u dačynieńni da šerahu niedružalubnych krain. Ciapier syry i harodnina ŭstali ŭ adzin šerah z televizarami «z tonkim i ŭltratonkim korpusam» i «kankurentazdolnymi, ekanamičnymi, nadziejnymi» lehkavymi aŭtamabilami, jakija MARH daŭno choča bačyć na kanviejerach ajčynnych zavodaŭ.

• 3
• 0
• 8
• 36
• 1
• 5
• 1
• 0