A1 choča spahnać 2500 rubloŭ za rekłamnyja padpiski pamierłaha abanienta
U redakcyju «Onliner» źviarnuŭsia abanient A1. Pa słovach Alaksandra, jon «sutyknuŭsia z zapazyčanaściu ŭ amal 2500 rubloŭ pierad A1, nijak nie prykłaŭšy da hetaha namahańniaŭ». Mužčyna śćviardžaje, što apieratar choča spahnać ź jaho amal 2500 rubloŭ za pamierłaha abanienta — jaho maci. Pryčym zapazyčanaść utvaryłasia ŭžo tady, kali jaje nie było ŭ žyvych.
Jak rastłumačyŭ Alaksandr, u 2018 hodzie pamierła jaho maci. «Viedaŭ pra najaŭnaść ŭ jaje adnaho numara, im karystaŭsia, nie pieraafarmlaŭ i nie zakryvaŭ», — raskazvaje mužčyna. Pavodle jaho, u 2020-m jon pryjšoŭ u ofis A1, daŭ paśviedčańnie ab śmierci i pieraaformiŭ numar na siabie.
A ŭ studzieni 2022-ha pryjšoŭ list ź infarmacyjaj ab spahnańni doŭhu na sumu amal 2500 rubloŭ z-za zapazyčanaści pierad A1.
«Spačatku ja padumaŭ, što heta niejkaja pamyłka. Nieadnarazova telefanavaŭ u A1, mnie tam uparta paŭtarali, što paśla śmierci nijakija abaviazki ad pamierłych za pasłuhi suviazi nie pierachodziać da ich svajakoŭ. Pa numary, jaki ja aformiŭ, nijakaj zapazyčanaści niama! Ja nazyvaŭ proźvišča i pašpartnyja danyja maci, što raniej byli, i ničoha, nijakich daŭhoŭ, pretenzij niama!» — raspavioŭ Alaksandr.
Paźniej mužčyna daviedaŭsia, što na jaho maci byŭ aformleny jašče adzin numar, jakim karystaŭsia jaje sužyciel-inšaziemiec. Mienavita na hety numar užo paśla śmierci žančyny, u mai — červieni 2020 hoda, aformiłasia bolš za 200 rekłamnych padpisak. Sužyciel, jak miarkuje Alaksandr, spałochaŭsia vializnych ličbaŭ zapazyčanaści, vykinuŭ SIM-kartu i nieŭzabavie źjechaŭ u rodnuju krainu.
Takim čynam, za padpiski nabiehła bolš za 1200 rubloŭ doŭhu. Plus pienia za amal dva hady i pasłuhi nataryusa — usiaho 2429 rubloŭ i 62 kapiejki. Ciapier hetuju sumu treba apłacić Alaksandru, u jakoha nazapasiłasia šmat pytańniaŭ.
«Niezrazumieła, čamu, kali ja prychodziŭ u ofis A1, mnie nichto nie paviedamiŭ, što jość jašče adzin numar, jaki naležaŭ majoj maci, na jakoj jość zapazyčanaść? Jak mnie ŭvohule daviedacca, što aformlena na rodnaha čałavieka paśla jaho śmierci?
Mnie treba abivać parohi ŭsich apierataraŭ suviazi, kab vyśvietlić, ci nie aformiŭ čałaviek niejki numar? Abivać parohi internet-pravajdaraŭ — raptam i u ich niešta aformlena na pamierłaha čałavieka? Vychodzić, kali maci pamierła i ja nie viedaŭ, što na jaje aformleny inšy numar telefona, jakim niechta karystajecca, tam utvarajecca vielizarnaja zapazyčanaść, a ja niasu za heta adkaznaść?
Usio tamu, što supracoŭniki A1 nie mohuć pa proźviščy, imieni, imieni pa baćku pravieryć infarmacyju: ci jość na pamierłym inšyja numary telefonaŭ», — aburajecca Alaksandr.
Kampanija A1 admoviła redakcyi ŭ kamientaryi, bo, pavodle jaje, «u vypadku śmierci abanienta źviestki mohuć być dadzienyja tolki pa zapytach pravaachoŭnych orhanaŭ i sudoŭ».
«Padstaŭ dla śpisańnia zapazyčanaści niama»
Alaksandr i sam źviarnuŭsia ŭ A1 z prośbaj uličyć situacyju i pierahledzieć patrabavańni ab zapazyčanaści. Abanient dasłaŭ u redakcyju kopiju adkazu apieratara. Kali ścisła, to havorycca ŭ im nastupnaje:
- Klijent niasie ŭsiu adkaznaść u vypadku vykarystańnia SIM-karty trecimi asobami.
- U vypadku śmierci abanienta abaviazacielstvy pa dahavory spyniajucca pry pradjaŭleńni paśviedčańnia ab śmierci.
- A1 nastojvaje, što kampanija nie atrymlivała paśviedčańnie ab śmierci žančyny, tamu praciahvała akazvać pasłuhi pa abanienckim numary.
- Pravieryć, što kazali Alaksandru kansultanty A1, niemahčyma, bo prajšło zanadta šmat času i zapisy razmovaŭ nie zachavalisia.
- U skład spadčyny ŭvachodziać usie pravy i abaviazki, tamu Alaksandr jak spadčyńnik pavinien pahasić zapazyčanaść.
- Padstaŭ dla śpisańnia zapazyčanaści niama.
Pry hetym apieratar pahadziŭsia nie spahaniać pieniu ŭ vypadku, kali Alaksandr pahasić asnoŭny doŭh i apłacić dziaržpošlinu — usiaho 1256 rubloŭ i 77 kapiejek.
Ciapier čytajuć
«Jany čamuści dumajuć, što ich zaraz zhvałciać». Prapahanda kinułasia tušyć abureńnie biełarusaŭ 150 tysiačami pakistancaŭ20
Kamientary