Lekar — pra «spravu artapiedaŭ»: Usie pytańni pavinny być adrasavanyja viarcham, jakija prymajuć rašeńni

U Biełarusi raskručvajecca čarhovy karupcyjny skandał u miedycynie: 35 daktaroŭ i jašče 5 pradstaŭnikoŭ kamiercyjnych struktur stali fihurantami tak zvanaj «spravy artapiedaŭ». Pa viersii abvinavačvańnia, lekary ŭ roznych rehijonach krainy atrymlivali niezakonnuju ŭznaharodu ad pryvatnych kampanij, jakija pastaŭlali pratezy sustavaŭ dla impłantacyi.

Ministr achovy zdaroŭja Dźmitryj Pinievič paprasiŭ źmianić mieru strymańnia miedykam, kali tyja pryznajuć vinu, kratna pakryjuć škodu i pahodziacca pracavać u pryznačanym Ministerstvam achovy zdaroŭja miescy.

A ŭsiaho niekalki hadoŭ tamu prahrymieŭ skandał ź Ministerstvam achovy zdaroŭja, kali dziŭnym čynam u maštabnaj karupcyjnaj schiemie apynulisia zamiašanyja mnohija čynoŭniki, i tolki tahačasny ministr achovy zdaroŭja Žarko «ničoha nie viedaŭ». Čamu ž paśla žorstkich «čystak» sistema znoŭ dała zboj: mahčyma, sprava nie ŭ miedykach, a ŭ samoj sistemie?

— Viadoma, heta zdajecca dzikim, — kaža traŭmatołah-artapied Rustam Ajzatulin, unikalny śpiecyjalist, jaki straciŭ pracu ŭ Biełarusi za svaju hramadzianskuju pazicyju. — Usia hetaja situacyja «my nie vinavatyja, heta ŭsie jany» praciahvaje 28-hadovuju tradycyju pierakładvańnia viny na kahości, kab siabie abialić.

Pra biełaruskuju miedycynu, pra sistemu viertykali ŭłady ŭ miedycynie, jakaja zžyła siabie, ja kazaŭ jašče ŭ 2020 hodzie, kali mianie zvolnili z RNPC traŭmatałohii i artapiedyi, i praciahvaju paŭtarać: u hetaj sistemie niama ničoha prazrystaha, tut nie dapuskajecca nijakich samavolnych pryniaćciaŭ rašeńniaŭ, tamu ŭsie pytańni pavinny być adrasavanyja viarcham, jakija prymajuć rašeńni.

Jak by ni chacieli dabicca prazrystaści, tendarnyja zakupki nieprazrystyja. Hetaja sistema dziaržzakupak vielmi biurakratyčnaja i karumpavanaja ad samych viarchoŭ, dzie padpisvajucca dakumienty na pastaŭku miedvyrabaŭ, abstalavańnia, farmaceŭtyčnych vyrabaŭ, dazvołu na dziejnaść farmkampanij u Biełarusi i hetak dalej.

Heta taksama pytańni da tych, chto siadzieŭ učora za stałom u Łukašenki i nie moh adkazać na pytańnie, čamu nie pravodziłasia rekłamnaja kampanija našych pratezaŭ i čamu my da hetaha dažyli.

Nichto nie adkazaŭ, bo ŭsim u Minzdaroŭja było ciopła, sytna i ŭtulna. A ciapier, kali vyraśli i biez taho zdaraviennyja čerhi na pratezy, kali kampanija «Altymied», jakaja pradstaŭlaje dziaržstrukturu, skazała «nu a jak našymi pratezami nie karystacca», tady ŭsio heta razharnułasia.

 I adrazu ž stali vinavatymi tyja, chto pracavaŭ u pratezavańni. Kali pasłuchać, jakija sumy chabaraŭ znajšli ŭ ich «za kanapami», vy adrazu ŭspomnicie 2018 hod, «spravu lekaraŭ», i zrazumiejecie, što sumy ŭsio tyja ž, skrynački nie mianiajucca.

— Ajčynnyja pratezy sapraŭdy kankurentazdolnyja, jak pra heta kažuć čynoŭniki, ci heta z razradu hučnych zajaŭ «my stvorym svaju vakcynu ad karanavirusa, nie horšuju za impartnuju»?

— Biełaruskija pratezy sapraŭdy byli patrebnyja krainie ŭ svoj čas. Ja viedaju raspracoŭščykaŭ hetych pratezaŭ, viedaju ludziej, jakija pracavali inžynierami i ŭdzielničali ŭ raspracoŭcy. Tak, pratezy dobryja, ale madernizacyja i niejkija anatamičnyja asablivaści, viadoma, nie uličvalisia ŭžo vielmi daŭno.

Kali ŭ miedycynu za miažoj układvajucca vielmi vialikija hrošy: mianiajucca instrumienty, apieracyjnyja dostupy, mietały pratezaŭ, technika apieracyj i h. d., to ŭ Biełarusi jak było pieršapačatkova, tak praktyčna i zastałosia.

Mietał dla biełaruskich pratezaŭ zakuplajecca za miažoj, sterylizacyja ŭ pieravažnaj bolšaści taksama adbyvałasia nie na terytoryi Biełarusi. Tamu nazvać ich całkam biełaruskimi niemahčyma, i što budzie ciapier z hetymi pratezami — vialikaje pytańnie.

Tak, biełaruskaja kampanija «Altymied» jeździła pa ŭsich krainach, pakazvała siabie na mnohich rynkach ES i na postsavieckaj prastory, i sapraŭdy mieła šmat zaklučanych damoŭ na pastaŭku miedvyrabaŭ. Ale hetaja kampanija vyrablaje nie tolki pratezy, i ekspart pratezaŭ składaŭ vielmi nievialikuju častku ich prybytkaŭ.

A kali kazać pra impartnyja pratezy ‒ byŭ by ja dyrektaram jakoj-niebudź zamiežnaj kampanii, to paśla hetaha ja b dziesiać razoŭ padumaŭ, ci pastaŭlać štości ŭ Biełaruś, navat biez uliku sankcyj.

— Horš ad usiaho taho, što adbyvajecca, stanie pacyjentam, užo stała, bo zatrymanyja nie čynoŭniki, a ŭračy-praktyki. Ci možna sprahnazavać, da čaho heta pryviadzie ŭ pierśpiektyvie?

— Voźmiem ludziej, jakich zatrymali. Akramia taho, što jany vykonvali vysokatechnałahičnyja apieracyi, jany ŭsie byli zadziejničanyja ŭ navukovych prajektach. Viadoma, kali jany vyjduć na volu, to nichto ŭ krainie z takim staŭleńniem dalej ruchać navuku nie budzie. Heta pa-pieršaje.

Pa-druhoje, jany byli kiraŭnikami navukovych prajektaŭ i majuć vučniaŭ, jakija, hledziačy na ​​heta, taksama nie buduć ničoha rabić. Takim čynam, my pachavajem i tak užo pachavanuju navuku.

A tyja lekary, jakija ciapier zastalisia, tak by mović, «na voli», ni za što ŭ žyćci ŭžo nie buduć zajmacca ni ŭstanoŭkaj zamiežnych impłantaŭ, kab advieści ad siabie padazreńni, ni padpisvać papiery, ni ŭdzielničać u jakich-niebudź zakupkach.

Usia sistema, jakaja trymałasia na ludziach inicyjatyŭnych, umiełych i daśviedčanych, abrynułasia. Zastalisia čynoŭniki, jakija nibyta voźmuć spravu ŭ svaje ruki. Jak tam było zajaŭlena: «Nijakich pasiarednikaŭ».

Ale pasiaredniki, tłumačyć urač, usio roŭna buduć. Nielha prosta pryjści na zavod i nabyć pratezy. Jość ludzi, jakija pastaŭlajuć ich u Biełaruś, pryčym nie adrazu ŭ balnicy — va ŭsich krainach, u tym liku i ŭ Biełarusi, prachodziać peŭnyja pracedury zakupki i ŭzhadnieńni.

— Adnaznačna, ad Ministerstva achovy zdaroŭja pryznačać čałavieka, jaki budzie łajalna stavicca da jakich-niebudź vytvorcaŭ, abo za peŭnuju ŭznaharodu budzie łabiravać tych ci inšych vytvorcaŭ, — ličyć Rustam Ajzatulin. — Jak heta było litaralna paru hadoŭ tamu, kali adna z balnic zachacieła kupić aniestezijałahičnyja aparaty napramuju ŭ vytvorcy, ale ŭ Ministerstvie achovy zdaroŭja skazali: maŭlaŭ, nie, u nas jość čałaviek, jaki pastaŭlaje voś takija aparaty, ich vy i budziecie kuplać…

Tak pabudavanaja ŭsia sistema, i jana nikudy nie sydzie, i jana ŭsio bolš pieratvaraje lekaraŭ u niejkich raboŭ, hatovych pracavać za talerku supu i kavałak chleba. Ludzi, jakija heta bačać i razumiejuć, u hetaj sistemie pracavać nie buduć, tamu i praciahvajecca adtok admysłoŭcaŭ ź miedycyny.

Zrešty, miarkuje lekar, praź niejki čas miedpiersanał mohuć zrabić nievyjaznym z krainy. Ambasady i konsulstvy ŭ Biełarusi zakryvajucca, i nie vyklučana, što chutka dazvoł na vyjezd budzie vydavać niejki adziny centr, dzie ludzi ź Ministerstva achovy zdaroŭja i KDB buduć stavić albo nie stavić dazvolnyja štampy.

— Pacichu, pačynajučy ź miedycyny i adukacyi, Biełaruś pieratvarajecca ŭ kancłahier, i heta stanovicca ŭsio bolš vyraznym, — ličyć lekar.

Čytajcie taksama:

Kiraŭnik Minzdaroŭja nazvaŭ try ŭmovy dla vyzvaleńnia zatrymanych daktaroŭ

«Pa 300—650 tysiač jeŭra vyjavili», trapiŭsia navat doktar Łukašenki. Aficyjna — pra zatrymańni traŭmatołahaŭ

Što ciapier z čerhami na endapratezavańnie? Voś što adkazali ŭ Minzdaroŭja

«Sprava traŭmatołahaŭ»: ludziej nie vypuskajuć praz 10 sutak, stali viadomyja detali abvinavačvańnia

Chto z zatrymanych lekaraŭ moh abśledavać Łukašenku? Jość niekalki viersij

• 0
• 0
• 1
• 1
• 2