Rasijski samalot, źbity ŭkrainskaj SPA 5 sakavika ŭ Čarnihaŭskaj vobłaści. Fota: Press service of the State Emergency Service of Ukraine/Handout via REUTERS
Niaŭdača VPS RF źjaŭlajecca, badaj, samaj važnaj, choć ci nie najmienš abmiarkoŭvajecca, kali idzie havorka pra hetuju vajnu. Ukraincy pakazali dzivosnyja zdolnaści ŭ płanavańni pavietranaj abarony i adaptavalisia da boju. U pavietry zastajecca svojeasablivy parytet, jaki nie daje nivodnamu baku 100% pieravahi.
Čamu tak stałasia? Choć ruskija pavinny byli pravieści madernizacyju svaich VPS, kab być hatovymi da sučasnaj vajny, heta adbyłosia bolšaj častkaj na papiery. Pijar-kampanii rekłamavali ŭdarnyja samaloty SU-34, pakul zvyčajnyja VPS ciarpieli ad łahistyčnych prablem, a ŭ piłotaŭ nie było mahčymaści narmalna treniravacca.
Kali ž pačałosia ŭvarvańnie, rasijskija VPS akazalisia niazdolnyja pravodzić pradumanuju kampaniju. Jany byli skancentravanyja nie stolki na zachopie nieba, kolki na padtrymcy naziemnych vojskaŭ i bambavańni haradoŭ. Heta moža spracavać, kali ŭ vas biaskoncaja kolkaść sałdat, jakich vy hatovyja hublać, ale ŭ sučasnaj vajnie heta bieskarysnaje vykarystańnie siłaŭ.
Eksperty ŭpeŭnienyja: Rasija nie zmahła źmianić svajo bačańnie vajny jak nastupleńnia vialikich piachotnych chvalaŭ paśla začystki artyleryjaj, a pra bolš šyrokaje ŭžyvańnie pavietranych sił navat nie pačynała dumać. Piłotam zastavałasia vykonvać standartnyja, prostyja misii: adzinkavyja paloty biez padtrymki, adna mišeń, niekiravalnyja bomby, sproba chutka ŭdaryć pa celi i pasprabavać nie być źbitym. Drennaja kamunikacyja pamiž VPS i vyviedkaj paharšała situacyju.
Zatoje ŭkraincy raspracavali aryhinalnuju i šmatuzroŭnievuju supraćpavietranuju abaronu. Navat z tannymi, partatyŭnymi pieranosnymi rakietami kłasa «ziamla-pavietra» jany zmahli abmiežavać manieŭry rasijskaj avijacyi niekalkimi ŭschodnimi i paŭdniovymi rajonami.
Rakietnyja sistemy S-300 zrabili rasijan jašče bolš uraźlivymi, prymušajučy piłotaŭ lotać vielmi nizka. I heta imhnienna robić ich uraźlivymi dla rakiet «ziamla-pavietra». Rasijskija piłoty zrazumieli, što mohuć stać mišeńniu ŭ lubym miescy, i ad taho ich nievysokaja efiektyŭnaść pahoršała jašče bolš.
Kreatyŭnaść ukraincaŭ možna ŭbačyć na prykładzie apieracyi pa zatapleńni krejsiera «Maskva». Pakul Bajraktar pryciahvaŭ uvahu SPA na siabie, rakiety «Nieptun» udaryli pa krejsieru raniej, čym ekipaž paśpieŭ adreahavać. Takaja vynachodlivaść pakazvaje, što ŭkraincy majuć bolš daskanałaje razumieńnie pavietranych apieracyj, čym navat mnohija ekśpierty krain NATA.
Toje, što jany robiać — mienšymi siłami adstojvajuć nieba ŭ baraćbie z mahutnym voraham — nadzvyčaj ciažkaja zadača. Zachadu jość čamu pavučycca va ŭkraincaŭ.
