U aptekach i balnicach pieraboi ź impartnymi preparatami. Biełarusy šukajuć leki za miažoj
Pakul Alaksandr Łukašenka sprabuje dystancyjavacca ad vajny va Ukrainie, u dačynieńni da Minska pačali dziejničać ekanamičnyja sankcyi Zachadu za padtrymku vajny. Ad biełaruskaha rynku admaŭlajucca suśvietnyja farmaceŭtyčnyja brendy, z-za čaho ŭ aptekach Biełarusi ŭsio macniej adčuvajecca niedachop impartnych preparataŭ.
Pieršymi ŭ deficycie akazalisia leki dla ščytapadobnaj załozy i dla lačeńnia cukrovaha dyjabietu. Niedachop na sabie adčuli i ludzi, jakija pakutujuć na asteaparoz, raspaviadaje «Nastojaŝieje vriemia».
Minčanka Ludmiła doŭha šukała dla siabroŭki pa staličnych aptekach šviejcarski preparat «Bonviva». Heta injekcyja, jakuju robiać pacyjentam z asteaparozam kostak raz na try miesiacy.
U vyniku zmahła znajści leki tolki ŭ susiedniaj Polščy. «Palaki adpuskajuć pa našym recepcie. Nu, składana, viadoma. Paturbavali ŭsich znajomych, kab znajści hety preparat. Ciapier robim dziejańni, jak jaho adtul zajmieć. U Biełarusi z hetym pytańniem składana», — raspaviadaje Ludmiła.
Nie lepšaja situacyja i ź niamieckim preparatam harmonaŭ ščytapadobnaj załozy «Euthyrox». Kali jon znoŭ źjavicca ŭ prodažy, u aptekach nie viedajuć i ŭ lepšym vypadku prapanujuć zapisacca ŭ čarhu.
Deficyt zakranuŭ nie tolki biełaruskija apteki, ale i balnicy. Pa słovach reanimatołaha Raścisłava Savickaha, u jaho na pracy zakančvajucca žyćciova važnyja impartnyja miedykamienty. Asabliva ciažka ź lekami, jakija raniej zakuplali va Ukrainie.
«U nas zastajucca tolki rasijskija rynki, jakija ŭ poŭnym abjomie nie mohuć papoŭnić usie deficyty. Jość papaŭnieńnie analhietykami rasijskaj vytvorčaści, ale ŭ płanie atrapinu ŭ nas vialikaja prablema. Jaho mała ŭ balnicy. U pierśpiektyvie my nie bačym, kab byli vialikija pastaŭki», — kaža lekar-reanimatołah Raścisłaŭ Savicki.
Biełaruskija čynoŭniki deficytu zamiežnych lekaŭ imknucca nie zaŭvažać i paralelna nastojliva rajać pierachodzić na ajčynnyja anałahi. Pavodle słoŭ namieśnika ministra achovy zdaroŭja Dźmitryja Čaradničenka, usiamu «krytyčnamu impartu jość zamiena».
Surazmoŭcy «Nastojaŝieho Vriemieni», jakija hadami prymajuć zamiežnyja leki, pryznalisia, što sprabavali pierachodzić na ajčynnyja, ale chutka admovilisia ad hetaj idei. U asnoŭnym skardziacca na nizkuju efiektyŭnaść.
Adziny vychad, jaki zastajecca ciapier biełarusam, — šukać deficytnyja leki za miažoj: u Polščy i krainach Bałtyi.
-
Italjaniec pierajechaŭ u biełaruskuju viosku i pačaŭ piačy sapraŭdnuju picu na drovach
-
«90 čałaviek vyhnali pad piakučaje sonca i trymali tam try hadziny. Ja paŭtarała tolki adnu malitvu: niachaj im usio vierniecca»
-
Ci chopić sioleta €2000, kab adpačyć na mory? Što adbyvajecca z cenami na letni adpačynak
Jak skłaŭsia los vypusknikoŭ, jakimi žurfak hanaryŭsia 10 hadoŭ tamu? Historyja adnaho ŭračystaha kałaža31
Kamientary