Pamiž Rasijaj i Azierbajdžanam razharajecca miedyjnaja vajna z-za Ukrainy i Karabacha
Ź viasny rasijskija ŭłady zakryvajuć dostup da azierbajdžanskich navinnych sajtaŭ za nibyta niedakładnaje aśviatleńnie vajny va Ukrainie, a Azierbajdžan zabłakavaŭ sajt ahienctva RIA «Naviny». U piatnicu stała viadoma, što Baku admoviŭ u dazvole na žycharstva supracoŭnikam rasijskaha ahienctva «Sputnik». Što adbyvajecca, sprabavała razabracca ruskaja słužba BBC.
Azierbajdžanskija ŚMI pačali błakavać u Rasii jašče ŭ pieršyja dni vajny va Ukrainie. Kiraŭnictva azierbajdžanskich sajtaŭ Minval.az, Haqqin.az i Oxu.az raspaviało žurnalistam, što jany byli zabłakavanyja bieź jakoha-niebudź apaviaščeńnia z boku Raskamnahladu. Na sajcie samoha viedamstva, dzie možna pravieryć, ci abmiežavany dostup da sajta, jość tolki infarmacyja pra dva ź ich — Minval.az i Oxu.az. Dostup da resursaŭ zabłakavany, jak skazana, pa Zakonie ab abaronie infarmacyi, ale kankretnyja pryčyny nie paznačanyja. U Baku heta źviazvajuć z aśviatleńniem vajny va Ukrainie.
Patrabavańnie vydalić adzin z tekstaŭ pryjšło ad Raskamnahladu taksama ŭ papularnaje miascovaje ahienctva 1news.az. U liście rasijskaha viedamstva havorycca, što adna z publikacyj na sajcie destabilizuje hramadska-palityčnuju abstanoŭku ŭ RF.
U Azierbajdžanie sapraŭdy šmat chto spačuvaje Ukrainie, u Baku prachodzili praŭkrainskija mitynhi, a azierbajdžanskija ŚMI časta cytujuć suśvietnyja i ŭkrainskija ŚMI pry aśviatleńni rasijskaha ŭvarvańnia.
Ź inšaha boku, u Azierbajdžanie mnohija niezadavolenyja padychodam rasijskich ŚMI da aśviatleńnia karabachskaha kanfliktu z susiedniaj Armienijaj.
Dva deputaty parłamienta Azierbajdžana, a taksama kiraŭnik Asamblei azierbajdžancaŭ śvietu Rašad Hulijeŭ prapanoŭvali zakryć azierbajdžanskaje adździaleńnie rasijskaha ahienctva «Sputnik». Hulijeŭ napisaŭ, što Marharyta Simańjan nie raz vykazvałasia ŭ svaim telehram-kanale suprać terytaryjalnaj cełasnaści Azierbajdžana.
Paśla paražeńnia Armienii ŭ vajnie ŭ Karabachu 2020 hoda Simańjan u sacyjalnych sietkach pisała: «Krytykavać hramadzianie Armienii mohuć tolki siabie. Za toje, što pryviali da ŭłady nacyjanalnaha zdradnika, jaki, pasvaryŭšysia z adzinym histaryčnym zastupnikam armianskaha naroda, stvaryŭ pieradumovy dla hetaj vajny».
A ŭžo na pačatku červienia ŭ Azierbajdžanie zabłakavali dostup da sajta RIA «Naviny», dzie było apublikavanaje intervju z adnym z pradstaŭnikoŭ niepryznanaj Nahorna-Karabachskaj respubliki. U MZS Azierbajdžana heta nazvali «raspaŭsiudžvańniem infarmacyi, jakaja vystupaje suprać terytaryjalnaj cełasnaści Azierbajdžana i prapahanduje paklopnicki charaktar i sieparatysckija tendencyi».
Pradstaŭniki Rasii błakavańnie sajta nie kamientavali, adnak azierbajdžanskija ŚMI zaŭvažyli, što z sajta RIA «Naviny» intervju źnikła.
10 červienia stała viadoma, što hramadzianam Biełarusi, šef-redaktarcy «Sputnik-Azierbajdžan» Vieranicy Antonavaj-Tryzna i jaje mužu, pradziusaru pres-centra Sputnik Paŭłu Antonavu, admovili ŭ praciahnieńni dazvołu na pracu ŭ krainie. Miedyjaekśpiert i kiraŭnik azierbajdžanskaha infarmahienctva «Turan» Miechman Alijeŭ nazyvaje toje, što adbyvajecca, «schavanym dvubojem». Pavodle jaho słoŭ, Rasija viadzie ŭ dačynieńni da Azierbajdžana dvaistuju palityku.
«Z adnaho boku, Rasija dekłaruje ŭstalavańnie doŭhaterminovaha miru pamiž Azierbajdžanam i Armienijaj, vystupaje za mirnaje suisnavańnie, terytaryjalnuju cełasnaść Azierbajdžana. Ale z druhoha — u srodkach masavaj infarmacyi ŭžyvajecca fraza «Nahorna-Karabachskaja respublika», nie nazyvajuć heta niezakonnym utvareńniem, i jany praciahvajuć heta rabić», — kaža jon.
Pavodle słoŭ Alijeva, u Baku razumiejuć, što presa ŭ Rasii nie samastojnaja, i rasceńvajuć heta jak sprobu cisku na Azierbajdžan, a Baku ŭ adkaz taksama ŭździejničaje na rasijskija ŚMI.
Piać faktaŭ pra Natallu Piatkievič — samuju ŭpłyvovuju čynoŭnicu Biełarusi da źjaŭleńnia Kačanavaj i Ejsmant10
Kamientary