Pieršapačatkova sumnievy ŭ sapraŭdnaści 100-dalaravaj kupiury źjavilisia ŭ rabotnika staličnaha banka. Hrašovy bilet byŭ pieradadzieny ŭ ekśpiertna-kryminalistyčny adździeł pa Leninskim rajonie Dziaržkamiteta sudovych ekśpiertyz.
Vyśvietliłasia, što heta sapraŭdnaja kupiura Fiederalnaj reziervovaj sistemy ZŠA sieryi 1996 hoda, choć i ź vialikaj kolkaściu braku.
«Pieršapačatkova sumnievy ŭ sapraŭdnaści byli vyklikanyja nieadpaviednaściu niekatorych elemientaŭ abarony hrašovaha bileta, a mienavita inšym raźmiaščeńniem vadzianoha znaka i achoŭnaj nitki, častkovaj adsutnaściu luminiescencyi achoŭnaj nitki i najaŭnaściu raściakańnia farby ŭ asobnych malunkach», — havorycca ŭ aficyjnym pres-relizie.
Jak ustalavali ekśpierty, brak źviazany ź niuansami technałahičnaha pracesu, jakija byli dapuščanyja na vytvorčaści.
Što budzie dalej z hetaj kupiuraj?
Vierahodna, jana vierniecca ŭ toj bank, jaki vyrašyŭ pravieryć hrašovy bilet na sapraŭdnaść, raspaviali žurnalistu Onlíner u pres-słužbie Dziaržaŭnaha kamiteta sudovych ekśpiertyz.
— Kali kupiura vyklikaje sumnievy ŭ bankaŭskaha rabotnika, zvyčajna bank vyklikaje śledča-apieratyŭnuju hrupu, jakaja pryznačaje ekśpiertyzu ŭ našym kamitecie. My pravodzim techničnuju ekśpiertyzu: vykarystoŭvajučy mikraskop, ekśpiert na svaim pracoŭnym miescy paraŭnoŭvaje sumnieŭnuju kupiuru z etałonnymi ŭzorami i ŭstanaŭlivaje jaje sapraŭdnaść. Dalej hrašovy bilet viartajecca nazad inicyjataru razam z zaklučeńniem ekśpierta — apisvaje praceduru pracy z takimi kupiurami śpiecyjalist Kamiteta Hanna Baryšnikava.
U Dziaržkamitecie adznačyli, što heta dosyć redkaja situacyja, kali kupiura maje stolki braku, ale pry hetym źjaŭlajecca sapraŭdnaj.
Za kolki takuju kupiuru možna pradać?
My pacikavilisia, što dumaje pra kaštoŭnaść hetaj kupiury Siarhiej, jaki pakazvaŭ čytačam svaju kalekcyju banknot z sotni krain.
— Hetuju kupiuru možna pradać doraha, asabliva kali prykłaści dakumient ad sudovych ekśpiertaŭ, dzie pieraličvajucca ŭsie zahany. Dumaju, jaje košt minimum 1000 rubloŭ, prynamsi, tańniej ja b nie addavaŭ. Mnohaje, viadoma, zaležyć ad kolkaści zacikaŭlenych u kupli ludziej. Hetaja kupiura pavinna stvaryć ažyjataž pry prodažy, — pierakanany kalekcyjanier.
