Kamitet pa pravach čałavieka AAN suprać departacyi Rasijaj u Biełaruś Jany Pinčuk
Kamitet pa pravach čałavieka AAN prapanavaŭ Rasii ŭstrymacca ad departacyi ŭ Biełaruś 24-hadovaj Jany Pinčuk i zabiaśpiečyć abaronu jaje žyćcia i niedatykalnaści da razhladu kamitetam jaje skarhi. Na radzimie joj pahražaje da 19 hadoŭ pazbaŭleńnia voli za ŭdzieł u stvareńni apazicyjnych telehram-kanałaŭ «Viciebsk 97%», «Vorša 97%» i «Navapołack i Połack 97%».
Heta pieršy vypadak umiašańnia struktury AAN u spravy ab departacyi z Rasii biełaruskich apazicyjanieraŭ, skazała ŭ kamientary Bi-bi-si advakat dziaŭčyny Maryja Bialajeva. Da hetaha času pravaabaroncam udavałasia prypynić departacyju z dapamohaj Jeŭrapiejskaha suda pa pravach čałavieka — ale rasijskija ŭłady admovilisia ad vykanańnia jaho rašeńniaŭ paśla vyklučeńnia Rasii z Savieta Jeŭropy.
Jana Pinčuk znachodzicca ŭ SIZA Pieciarburha ź listapada 2021 hoda. Jaje zatrymali ŭ pieciarburhskaj kvatery i praź dzień aryštavali. U Biełarusi joj zavočna pradjavili abvinavačvańnie pa piaci artykułach Kryminalnaha kodeksa.
Rasijskaja prakuratura pahadziłasia jaje vydać pa troch ź ich: ab raspalvańni sacyjalnaj varožaści, zaklikach da dziejańniaŭ suprać nacyjanalnaj biaśpieki i stvareńni ekstremisckaha farmavańnia.
Apielacyju Pinčuk na rašeńnie pieršaj sudovaj instancyi ab jaje departacyi zaŭtra razhledzić 2-hi Apielacyjny sud u Pieciarburhu. Kamitet pa pravach čałavieka AAN taksama prapanuje Rasii dać Pinčuk dostup da praceduraŭ nadańnia časovaha prytułku, pra jaki jana prasiła. Raniej rasijskija ŭłady joj u hetym admovili.
Kamientary