«Mianie ŭratavała toje, što ja moh biehać». Alimpijski čempijon pryznaŭsia, što maje druhoje imia i jaho trymali ŭ rabstvie

Imia Machamied Fara jamu dali ludzi, jakija pryvieźli jaho ź nievialikaj ŭschodnieafrykanskaj krainy Džybuci, a jaho sapraŭdnaje imia — Chusejn Abdzi Kain. Jamu było 9 hadoŭ, kali nieznajomaja žančyna pryviezła jaho ŭ Łondan, dzie jamu daviałosia hladzieć čužych dziaciej.

«Šmat hadoŭ ja staraŭsia nie ŭspaminać pra heta, — kaža spartoviec. — Ale niemahčyma rabić heta viečna».

Pavodle aficyjnaj viersii, jakuju padavaŭ dahetul atlet, jon pryjechaŭ u Brytaniju z baćkami z Samali jak biežaniec.

Adnak u dakumientalnym filmie, źniatym sumiesna «Bi-bi-si» i kampanijaj Red Bull Studios, Mo raspaviadaje, što jaho baćki nikoli nie byli ŭ Brytanii.

Maci z dvuma jaho bratami dahetul žyvie ŭ niepryznanym Samaliłendzie, a baćka zahinuŭ ad vypadkovaj kuli padčas hramadzianskaj vajny ŭ Samali, ad jakoha Samaliłend adkałoŭsia ŭ 1991 hodzie.

Pa słovach samoha Mo Fary, u 8 abo 9 hadoŭ jaho adpravili da svajakoŭ u Džybuci, i ŭžo adtul jon razam z žančynaj, jakuju da hetaha nie viedaŭ i jakaja nie była jamu radnioj, trapiŭ u Vialikabrytaniju.

Hetaja žančyna skazała jamu, što jon adpraŭlajecca ŭ Jeŭropu da svajakoŭ, i heta jaho vielmi ŭzradavała. «Ja da hetaha nikoli nie lotaŭ na samalocie», — kaža Mo.

Hetaja ž žančyna skazała jamu, kab jon nazyvaŭ siabie Machamiedam. Pa słovach Mo, u jaje byli padroblenyja dakumienty ź jaho fatahrafijaj i imiem «Machamied Fara»

Kali jany pryjechali da jaje ŭ kvateru ŭ Chaŭnsłoŭ na zachadzie Łondana, žančyna zabrała ŭ chłopčyka zapisku z adrasam i telefonam jaho svajakoŭ.

«Prosta ŭ mianie na vačach jana parvała hetuju zapisku i vykinuła ŭ śmiećcievaje viadro. Ja adrazu zrazumieŭ, što ja papaŭ», — raspaviadaje jon.

Pa słovach sera Mo, kab nie zastacca hałodnym, jamu daviałosia vykonvać pracu pa domie i hladzieć dziaciej.

«Kali chočaš znoŭ pabačyć svaich rodnych, nikomu ničoha nie kažy», — navučała jaho žančyna. «Časta ja zamykaŭsia ŭ vannym pakoi i płakaŭ», — uspaminaje jon.

Pieršyja niekalki hadoŭ jaho nie puskali ŭ škołu, ale kali jamu spoŭniłasia 12, Mo pastupiŭ u 7-y kłas miascovaha Fiełtamskaha kaledža. Nastaŭnikam było skazana, što Mo — biežaniec z Samali.

Jak raspaviała «Bi-bi-si» jaho byłaja nastaŭnica Sara Reni, chłopčyk byŭ niedahledžany, zamknuty i drenna viedaŭ anhlijskuju.

Ludzi, jakija nazyvali siabie jaho baćkami, nikoli nie źjaŭlalisia na baćkoŭskich schodach.

Adnak jaho nastaŭnik fizkultury Ałan Uotkinsan adrazu zaŭvažyŭ, jak źmianiaŭsia padletak, kali pačynalisia zaniatki sportam.

«Padobna na toje, što adzinaja mova, jakuju jon dobra razumieŭ, była mova fizkultury i sportu», — uspaminaje Uotkinsan.

I nasamreč, jak kaža Mo, sport byŭ jaho žyćciom: «Usio, što ja moh zrabić, kab vybracca z toj žyćciovaj situacyi, heta vyrvacca na volu i biehčy».

Urešcie jon raspavioŭ Uotkinsanu pra toje, chto jon nasamreč, pra svajo minułaje i pra ludziej, na jakich jon vymušany byŭ pracavać.

Nastaŭnik paviedamiŭ pra ŭsio sacyjalnym słužbam, i tyja zrabili tak, što Mo ŭsynaviła inšaja samalijskaja siamja.

«Viadoma, ja sumavaŭ pa majoj sapraŭdnaj siamji, ale z taho momantu ŭsio stała lepš, — uspaminaje ser Mo. — U mianie jak byccam hruz zvaliŭsia ź plačej, i ja znoŭ staŭ samim saboj. Voś tady i źjaviŭsia Mo. Sapraŭdny Mo».

Mo pačaŭ stvarać sabie imia ŭ spartyŭnym śviecie i va ŭzroście 14 hadoŭ byŭ zaprošany vystupać za škoły Anhlii na spabornictvach u Łatvii. Adnak u jaho nie było nijakich dakumientaŭ.

Tady jaho nastaŭnik Uotkinsan dapamoh chłopčyku padać dakumienty na brytanskaje hramadzianstva pad imiem Mo Fara, i ŭ lipieni 2000 hoda Mo staŭ paŭnapraŭnym brytanskim hramadzianinam.

U dakumientalnym filmie juryst Ałan Brydak tłumačyć Mo, što, stroha kažučy, toj atrymaŭ pašpart šlacham machlarstva abo padrobki, i ź jurydyčnaha punktu hledžańnia ŭłady mahli b pazbavić jaho brytanskaha hramadzianstva. Adnak u vypadku z seram Mo heta vielmi małavierahodna.

Sa słoŭ sera Mo, jon navažyŭsia raspavieści svaju historyju, kab źmianić ujaŭleńnie ludziej pra nielehalnuju mihracyju i rabstva.

«Ja navat nie ŭjaŭlaŭ, jak šmat ludziej prajšło praz toje ž, što i ja. I heta kaža pra toje, jak mnie pašancavała, — pryznajecca jon. — Što pa-sapraŭdnamu vyratavała mianie, što zrabiła mianie nie takim, jak usie, — heta toje, što ja ŭmieŭ biehać».

• 17
• 0
• 1
• 6
• 7
• 11
• 1
• 0