Hrybaŭskajcie pra kalininhradski tranzit: U litoŭskich palitykaŭ zatreślisia kalenki
Były prezident Litvy Dala Hrybaŭskajcie ličyć, što situacyja z kalininhradskim tranzitam śviedčyć pra niazdolnaść litoŭskaj palityčnaj elity prymać stratehičnyja rašeńni, piša Delfi.lt.
«Litoŭskija palityki z kalenkami, jakija trasucca, vykonvajuć partyju ŭ palityčnym balecie», — napisała byłaja prezidentka Litvy. Paśla taho, jak Jeŭrakamisija (JEK) u sieradu daručyła dazvolić tranzit padsankcyjnych rasijskich tavaraŭ u Kalininhrad dla patreb hetaha ekskłava, Hrybaŭskajcie zajaviła, što litoŭskija palityki pavinny byli paviedamić pra hetaje rašeńnie, nie prykryvajučysia Jeŭrakamisijaj.
«I treba było adkryta skazać, što rašeńnie było pryniataje paśla kansultacyj z partniorami i JEK. I nie treba było chavacca za śpinu Jeŭrakamisii», — napisała Hrybaŭskajcie.
«Pakul kirujučaja palityčnaja elita demanstruje niazdolnaść prymać stratehičnyja rašeńni ŭ śfiery źniešniaj palityki. Voś čamu my bačym kidańni i nikčemnuju kamunikacyju», — ličyć jana.
Litva prypyniła tranzit niekatorych rasijskich tavaraŭ u Kalininhrad paśla ŭstupleńnia ŭ siłu sankcyj ES, abvieščanych u suviazi z uvarvańniem Maskvy va Ukrainu, i zajaviła, što zrabiła heta na padstavie papiarednich dyrektyŭ ES, jakija zabaraniajuć tranzit.
Pradstaŭniki Litvy i Jeŭrapiejskaj kamisii ŭ apošnija tydni pravodzili kansultacyi pa novych kirujučych pryncypach paśla abureńnia Rasii z nahody prypynieńnia tranzitu stali ŭ červieni. Premjer-ministr Inhryda Šymanicie zajaviła ŭ čaćvier, što było b nieracyjanalna praciahvać sprečku pra Kalininhradski tranzit z zachodnimi partniorami i zaklikała da dalejšaj padtrymki Ukrainy, jakaja abaraniajecca ad Rasii, i da novych sankcyj suprać Maskvy.
Litoŭski viaskovy padvorak na miažy ź Biełaruśsiu vyhladaje, jak aŭtasałon pa prodažy premijalnych aŭto VIDEA1
Kamientary