U pamierłaha ŭ pałonie ŭ «DNR» brytanca byŭ dyjabiet, jamu mahli nie akazvać dapamohi
Siamja brytanca Poła Ury, jaki pamior u pałonie ŭ niepryznanaj «DNR», abvinavaciła ŭ jaho śmierci ŭrad Rasii i tych, chto niepasredna trymaŭ jaho ŭ źniavoleńni. Ich padazrajuć u nieakazańni jamu miedycynskaj dapamohi, piša «Bi-bi-si».
Pa słovach svajakoŭ brytanca, im dakładna viadoma, što ŭ momant zatrymańnia ŭ Poła pry sabie byŭ insulin, bo jon chvareŭ na dyjabiet 1-ha typu. Ułady «DNR» nie mahli nie viedać, što heta za srodak i pry jakim dyjahnazie jaho prapisvajuć.
Taksama da pałonnaha admaŭlalisia puskać pradstaŭnikoŭ Čyrvonaha Kryža i inšych mižnarodnych humanitarnych arhanizacyj, jakija niekalki razoŭ chacieli pravieryć, u jakich umovach utrymlivajucca brytancy.
Heta havoryć tolki pra toje, ličyć siamja, što ŭmovy byli žudasnymi, i deeneraŭcy nie chacieli, kab pra heta daviedalisia.
Prarasijskija ŭłady samaabvieščanaha ŭtvareńnia abvinavacili ŭ śmierci brytanca ŭrad Brytanii, jaki nibyta admoviŭsia vieści pieramovy pra los svajho hramadzianina i nie zabiaśpiečyŭ jamu miedycynskuju dapamohu. Adnak
svajaki Poła Ury adkinuli hetyja zajavy, raskazaŭšy brytanskaj presie, što ŭłady ŭ Łondanie sumiesna z Čyrvonym Kryžom rabili ŭsio mahčymaje, ale ich nieadnarazovyja zapyty nie zadavalnialisia.
Ciapier siamja choča viarnuć cieła Ury ŭ Brytaniju, adnak pravaabaroncy ličać, što šancaŭ na heta mała. Jany majuć namier prasić brytanski ŭrad padklučycca da pieramovaŭ ab vydačy cieła.
U hetym vypadku z dapamohaj sudmiedekśpiertyzy ŭ Brytanii možna było b dakładna vyznačyć pryčyny śmierci Ury. Svajaki padazrajuć, što jaho mahli katavać, choć niezaležnych paćviardžeńniaŭ ich zdahadak niama. Mienavita heta moža być hałoŭnaj pryčynaj niežadańnia «DNR» viarnuć cieła rodnym.
45-hadovy brytanski vałancior ź niekamiercyjnaj arhanizacyi Presidium Network byŭ zachopleny rasijskimi vajskoŭcami 25 krasavika na adnym z błokpastoŭ na poŭdni Ukrainy.
Kamientary