Havorka pra 31-ju šturmavuju bryhadu, čyj podźvih patrabavaŭ uviekaviečyć Prylepin. Ale ciapier načalstva pahražaje im turmoj.
Pa prapanovie Zachara Prylepina na centralnaj vulicy Uljanaŭska źjaviŭsia murał, kab uviekaviečyć udzieł desantnaj bryhady va ŭkrainskaj vajnie, u pryvatnaści ŭ bajach za aeraport «Antonaŭ» u Hastomieli. Ale adlustravali tam maksimalna abstraktnych vajskoŭcaŭ — z sapraŭdnymi ŭdzielnikami vajny ŭ načalstva surjozny kanflikt, raspaviali «Možiem objaśniť» surazmoŭcy, znajomyja ź situacyjaj u 31-j bryhadzie. Prablemy nastolki surjoznyja, što zahavaryli pra jaje chutkaje rasfarmavańnie.
Paśla bajoŭ za Hastomiel bryhadu pierakinuli ŭ Łuhanskuju vobłaść, u mai jana ŭdzielničała ŭ bajach za Sievieradanieck. I adzin z bajcoŭ atrymaŭ najvyšejšuju ŭznaharodu: stała viadoma pra prysvajeńnie zvańnia «Hieroi Rasii» paśmiarotna zahinułamu 21 maja hvardyi kapitanu Adamu Chamchojevu — plamieńniku namieśnika ministra abarony Junus-bieka Jeŭkurava. Vypadak Chamchojeva — adno ź niamnohich publičnych uznaharodžańniaŭ bajca 31-j ADŠB.
«Načalstva ŭ bryhadzie zaŭsiody drenna staviłasia da sałdat i da ich žonak. Amal ničoha nie paviedamlałasia pra zahinułych i paranienych. Paśla bajoŭ za Hastomiel desantnikam dali niepraciahły adpačynak u Biełharadskaj vobłaści. Nichto nie paśpieŭ tołkam adpačyć i pryjści ŭ siabie — raspaviadaje adzin z surazmoŭcaŭ «MO».
U Łuhanskaj vobłaści bryhada paniesła vialikija straty. Pavodle padlikaŭ «Miedyjazony», na 1 červienia ŭ bryhadzie zahinuli 52 čałavieki. Pavodle źviestak adnoj z krynic, straty na sto čałaviek bolšyja, pryčym bolš za 400 desantnikaŭ paranienyja.
U adnoj z rot, u jakoj zastalisia žyvymi i nie paranienymi 25 čałaviek, prynamsi 10 vajskoŭcaŭ napisali zajavy na zvalnieńnie, ale ich nie padpisvajuć, kaža surazmoŭca «MO». Robiać heta i mnohija inšyja ich kalehi, jakija viarnulisia z Danbasa.
«Kamandavańnie admoŭščykaŭ uhavorvaje, zapałochvaje, nazyvaje zdradnikami radzimy, kaža im, što kali vy napišycie rapart, to heta, naturalna, kryminalnaja sprava. Ale vajskoŭcy ličać, što jany zvyčajnyja najomnyja rabotniki. Vajna nie abvieščanaja, idzie śpiecapieracyja. Čamu jany nie mohuć zvolnicca? Žonki šukajuć sposaby, jak vyvieźci svaich mužoŭ», — praciahvaje surazmoŭca.
Ukrainskaja vajskovaja raźviedka publikavała pierachop razmovy vajskoŭca sa svajoj žonkaj. U joj jon paviedamlaje, što adzin z kamandziraŭ 31-aj bryhady, pałkoŭnik Maćkoŭski, nibyta zdaŭ u pałon 76 svaich ža tavaryšaŭ pa słužbie.
Jašče adna pryčyna masavaha žadańnia zvolnicca — nizkija vypłaty. Bajavyja ŭ sałdackaha i siaržanckaha składu redka pieravyšajuć 100-150 tysiač rubloŭ na miesiac (4250-6500 biełaruskich rubloŭ). Choć u rastyražavanaj rekłamie Minabarony RF, jakaja jość u tym liku va Uljanaŭsku, sumy dla kantraktnikaŭ nazyvajucca ad 220 tysiač rubloŭ (9350 biełaruskich).
«Mnohija ŭ bryhadzie drenna vykazvajucca pra kamandziraŭ. Što ich adpraŭlali tudy, dzie byli USUšniki. Nie razumiejuć, čamu jany z takoj ciažkaściu i stratami brali abjekty, a potym im zahadvali pakidać ich», — raspavioŭ krynica «MO».
Načalstva uhavorvaje viarnucca ŭ stroj navat paranienych, u tym liku invalidaŭ. Im, praŭda, abiacajuć, što jany zastanucca ŭ tyle.
Zhadžajucca, pa słovach surazmoŭcy vydańnia, u asnoŭnym, pieradpiensijaniery i maładyja, tłumačačy, što ŭ cyvilnym žyćci nikomu nie patrebnyja. Ciažkaści sa zvalnieńniem adčuvajuć i tyja, u kaho zakančvajecca termin dziejańnia kantrakta.
Vypadki masavych zvalnieńniaŭ z-za vajny va Ukrainie ŭ rasijskaj armii nie adzinkavyja. U sakaviku 300 dahiestanskich vajskoŭcaŭ z v/č 63354 samavolna źjechali z Ukrainy. U krasaviku redaktar vydańnia «Novy fokus» Michaił Afanaśjeŭ paviedamiŭ pra 11 admoŭščykaŭ-rashvardziejcaŭ z Chakasii. U lipieni na terytoryi 205-aj asobnaj motastrałkovaj kazackaj bryhady ŭ Budzionaŭsku źjaviłasia doška hańby z partretami i imionami vajskoŭcaŭ častki, jakija admovilisia ŭdzielničać u śpiecapieracyi.
«Pavinien vyjści Pačobut». Polski ministr Sikorski znoŭ zahavaryŭ pra mahčymaje zakryćcio miažy dla hruzaŭ14
Kamientary