BYPOL: Vykładčyki i kursanty Vajennaj akademii brali ŭdzieł u falsifikacyi vybaraŭ 2020 hoda
Novaje rasśledavańnie BYPOL, jak havorycca ŭ apisańni, — pra tych, «chto nie tolki nie abaraniŭ narod, ale i dapamahaŭ tapić u kryvi i hvałcie imknieńnie biełarusaŭ da svabody, a ŭ 2022-m, zabyŭšysia nie tolki na prysiahu, ale i na honar, byŭ na pabiahuškach u rasijskich akupantaŭ, pakryŭšy siabie hańbaj saŭdziełu ŭ vajnie suprać Ukrainy». Tak BYPOL anansuje svoj vypusk pra supracoŭnikaŭ i kursantaŭ Vajennaj akademii.
Adzin z hierojaŭ rasśledavańnia — namieśnik načalnika akademii pa ideałahičnaj rabocie pałkoŭnik Siarhiej Hłazyryn. Pavodle BYPOL, Hłazyryn skončyŭ Vajennuju akademiju i zrabiŭ karjeru ad kursavoha aficera da namieśnika načalnika akademii, nie vychodziačy ź jaje ścien.
U žniŭni 2020 hoda Hłazyryn byŭ staršyniom kamisii pa vybarach prezidenta Biełarusi na ŭčastku №55 na vulicy Fohiela, 1 u Minsku. U kamisii pracavali jaho padapiečnyja — kursanty akademii.
Pavodle źviestak BYPOL, uviečary 9 žniŭnia 2020 hoda Hłazyryn, karystajučysia słužbovym stanoviščam, «prymusiŭ kursantaŭ chłusić pra vyniki vybaraŭ, kraści hałasy vybarščykaŭ i zajmacca padrobkaj».
Pavodle aficyjnaha vynikovaha pratakoła, na ŭčastku №55 za Cichanoŭskuju prahałasavała 59 čałaviek. U toj čas jak tolki na płatformu «Hołas» było adpraŭlena 307 hałasoŭ na jaje karyść, ź ich 178 — z fotazdymkami biuleteniaŭ. U ramkach hramadzianskaj inicyjatyvy «Zakonnaść», paviedamlaje BYPOL, pa ŭčastku №55 byli sabranyja i dvojčy padavalisia ŭ prakuraturu śviedčańni ździajśnieńnia Hłazyrynym parušeńniaŭ. U abodvuch vypadkach adtul byli atrymanyja adpiski.
Hłazyryn nieadnarazova byŭ siarod čalcoŭ vybarčych kamisij. U 2015 hodzie na vybarach prezidenta jon byŭ sakratarom vybarčaj kamisii №79 na toj ža vulicy Fohiela, 1.
U susiedniaj kamisii №78 tady staršyniavaŭ pałkoŭnik Siarhiej Mazoŭka, na toj momant namieśnik načalnika ahulnavajskovaha fakulteta pa vučebnaj i navukovaj rabocie Vajennaj akademii. Toj samy Mazoŭka, jaki ŭ žniŭni 2020-ha addaŭ zahad kursantam na adkryćcio ahniu pa mirnych demanstrantach.
17 listapada 2019 hoda na vybarach deputataŭ Pałaty pradstaŭnikoŭ Nacyjanalnaha schodu Respubliki Biełaruś Hłazyryn staršyniavaŭ u kamisii №648 pa vulicy Fohiela, 1. U deputaty tam prajšoŭ jaho były načalnik — hienierał Ivan Hardziejčyk.
Pałkoŭnik Hłazyryn časta byŭ pramym načalnikam dla členaŭ kamisii.
Tak sfarmavaŭsia puł pravieranych členaŭ kamisij. Usie, chto ŭdzielničaŭ u kamisijach na vybarach prezidenta ŭ 2020-m u składzie kamisij №55 i №54, byli ŭ kamisijach №647 i №648 pa vybarach deputataŭ Pałaty pradstaŭnikoŭ Nacyjanalnaha schodu — za vyklučeńniem tolki adnaho čałavieka.
Na susiednim učastku ŭ abodvuch vypadkach staršynioj byŭ padpałkoŭnik u adstaŭcy Ihar Šałudkoŭ. Jon źjaŭlajecca redaktaram haziety «Čas patryjotaŭ» i «viaščaje kursantam sa staronak svajho vydańnia pra honar, abaviazak, radzimu». Tolki pa vynikach manitorynhu płatformy «Hołas» Šałudkoŭ zaniziŭ kolkaść hałasoŭ vybarščykaŭ za Cichanoŭskuju bolš čym u dziesiać razoŭ.
BYPOL nazyvaje imiony tych, chto nieadnarazova byŭ členami kamisij i vierahodnymi falsifikatarami vynikaŭ hałasavańnia.
Heta:
— Siarhiej Hłazyryn, namieśnik načalnika Vajennaj akademii pa ideałahičnaj rabocie;
— pałkoŭnik Ihar Šałudkoŭ, redaktar haziety «Čas patryjotaŭ»;
— Alaksiej Ramaniuk, staršy aficer pieršaj hrupy adździeła ideałahičnaj raboty;
— Siarhiej Likarčuk, staršy vykładčyk kafiedry sacyjalnych navuk;
— Juryj Płaksicki, namieśnik kamandzira bataljona kursantaŭ pa ideałahičnaj rabocie;
— Iryna Załuckaja, staršy aficer-psichołah;
— Piotr Usaŭ, videademanstratar kłuba «Rakietčyk»;
— kursanty: Dzianis Bahdanovič, Bahdan Halibin, Raman Bandarčuk, Stanisłaŭ Dałmatovič, Cimafiej Piatruška, Mikałaj Sańko, Rusłan Skaŭronski, Jahor Biańko, Siarhiej Bahatka, Uładzisłaŭ Hałaburda, Ivan Hovin, Andrej Dzianisaŭ, Aleh Dybań, Mikita Žuraŭski, Aleh Ułazaŭ, Jaŭhien Šykunoŭ, Viačasłaŭ Šynkievič.
Kamanda kursantaŭ — členaŭ kamisij, za paśpiachovaje praviadzieńnie vybaraŭ była ŭznaharodžanaja hramataj Centralnaha kamiteta BRSM, paviedamlaje «Čas patryjotaŭ».
Refierendum
27 lutaha 2022 hoda čalcy kamisij z Vajennaj akademii znoŭ spatrebilisia ŭładzie — dla praviadzieńnia refierendumu pa źmienie Kanstytucyi.
Ułady zasakrecili asoby i proźviščy čalcoŭ kamisij, što było pramym parušeńniem Vybarčaha kodeksa. BYPOL nazyvaje niekatoryja imiony naziralnikaŭ i členaŭ kamisij №52 i №53 pa praviadzieńni refierendumu.
Heta kapitan Kirył Cichamiraŭ, staršy aficer druhoj hrupy adździeła ideałahičnaj pracy, kursanty Alaksandr Lickievič, Maksim Bahačoŭ, Arciom Jemialjanaŭ, Mikałaj Łaŭnikovič, Alaksandr Kisialoŭ, Uładzisłaŭ Šabat, Daniła Hajsionak.
Byłyja supracoŭniki akademii
Pry vyvučeńni śpisaŭ staršyń i členaŭ vybarčych kamisij pa vybarach prezidenta ŭ 2020-m BYPOL natknuŭsia jašče na adnaho namieśnika načalnika Vajennaj akademii, praŭda, byłoha — pałkoŭnika zapasu Uładzimira Ivaški.
U žniŭni 2020 hoda pałkoŭnik źjaŭlaŭsia staršynioj učastkovaj vybarčaj kamisii №19 Pieršamajskaha rajona na vulicy Parnikovaj u Minsku.
Padčas daterminovaha hałasavańnia, pa danych BYPOL, jon ukinuŭ biuleteni ŭ skryniu dla hałasavańnia. Svaje dziejańni tłumačyŭ tym, što «jon zaŭsiody tak rabiŭ, i jamu za heta ničoha nie było». Jon razharnuŭ maštabnuju kampaniju pa vyciaśnieńni naziralnikaŭ, pisaŭ pratakoły ab nibyta aburalnych ich pavodzinach, patrabavaŭ ad členaŭ kamisii padpisvać ich. Nie znajšoŭšy razumieńnia siarod apošnich, 8 žniŭnia razam sa staršynioj susiedniaha ŭčastka pałkoŭnik vyklikaŭ milicyju. Adnaho z naziralnikaŭ adpravili na dva tydni na sutki.
9 žniŭnia, pavodle BYPOL, Ivaška «admoviŭsia padpisać vynikovy pratakoł, prymušaŭ učastkovuju kamisiju skazić vyniki hałasavańnia ŭ bok pavieličeńnia kolkaści hałasoŭ za Łukašenku».
«Nie zdoleŭšy złamać supraciŭ kamisii, Ivaška vyklikaŭ AMAP, skraŭ vynikovy pratakoł i vyviez dakumienty i kamisiju ŭ śpiectransparcie praz čorny chod», — paviedamlaje BYPOL.
Potym Ivaška staŭ pisać danosy, u tym liku i na členaŭ vybarčaj kamisii, danosy byli jak u siłavyja struktury, tak i pa prafsajuznaj linii.
Ivaška taksama, pavodle BYPOL, — nieadnarazovy staršynia vybarčych kamisij adnaho i taho ž učastka pa vulicy Parnikovaj u Minsku.
BYPOL zapeŭnivaje, što heta daloka nie poŭny pieralik členaŭ kamisij z Vajennaj akademii, jość u hetym śpisie taksama i vypuskniki Akademii, i były zahadčyk kafiedry.
BYPOL abiacaje praciahnuć rabić vypuski pra «vojska falsifikataraŭ «z Uzbrojenych sił Łukašenki».
Kamientary