Ukrainskija vojski ściskajuć koła vakoł Iziuma. U akružeńni moža apynucca cełaja rasijskaja armija
Rasijskija vojski ŭstupili ŭ boj z avanhardam ukrainskaj nastupalnaj hrupoŭki na paŭnočnaj uskrainie vioski Harachavatka, paviedamlaje rasijski frantavy błohier «Rybaŕ».
Stan frontu miž Bałaklejaj i Kupianskam. Karta rasijskaha TH-kanała «Rybaŕ» pa stanie na abied 9 vieraśnia.
A nižej my bačym, jak jon vyhladaŭ, u acenkach Rybaria, na ranak 9 vieraśnia. U jaho acency za niapoŭny dzień ukraincy prasunulisia kala 15 km na poŭdzień, u kirunku Harachavatki, i prykładna stolki ž na poŭnač, da ŭskrajkaŭ 50-tysiačnaha Kupianska, dzie miaściłasia maryjanietačnaja «administracyja» akupavanaj častki Charkaŭskaj vobłaści.
Harachavatka — heta nasieleny punkt, dzie staić most cieraz raku Askoł. Učora ŭkrainskija vojski zachapili inšy most, u vioscy Siańkova i pierarezali trasu Izium-Kupiansk.
Nastupalnaja apieracyja ŭkrainskaj armii adbyvajecca pamiž rekami Sievierski Daniec i Askoł, jakija abmiažoŭvajuć mahčymaści braniatechniki.
Askoł — prytok Danca, šyroki ŭ rajonie Askolskaha vadaschovišča.
Z zachopam Siańkova, a ekśpierty prahnazujuć, što ŭ najbližejšyja dni ŭkrainskija vojski mohuć zaniać i 50-tysiačny Kupiansk, pad kantrol ukrainskaj armii pierachodzić daroha Kupiansk — Izium, jakaja była hałoŭnaj arteryjaj zabieśpiačeńnia značnaj Iziumskaj hrupoŭki rasijskich vojskaŭ, što navisaje nad Słavianskam. Paśla hetaha ŭ rasparadžeńni rasijskich vojskaŭ zastaniecca tolki horšy most na druhasnaj darozie cieraz raku Askoł, jaki moža stać lohkaj cellu dla ŭkrainskich «Chajmarsaŭ».
Imavierna, kali ŭkrainskija vojski ŭtrymajuć Siańkova i voźmuć Kupiansk, rasijanie vymušanyja buduć adstupić ź Iziuma i Śviatahorska, što źnimie pahrozu sa Słavianska i Kramatorska.
U toj ža čas, kali ŭkrainskaja armija maje dastatkova reziervaŭ, jana moža pasprabavać zamknuć vialikaje kołca vakoł Iziuma na levym bierazie Askoła. Hałoŭnaje pytańnie — u avijacyi i supraćpavietranaj abaronie. Rasija maje tatalnuju pieravahu ŭ pavietry, tamu ŭkrainskija vojski vymušanyja nastupać pavoli, padciahvajučy najaŭnyja ŭ ich niešmatlikija procipavietranyja kompleksy.
Rasijskija šavinistyčnyja błohiery kštałtu Rybara dazvalajuć sabie bolš, čym aficyjnyja ŚMI. Apošnim časam asiarodak błohieraŭ pačynaje ŭsio bolš havaryć ab prablemach i pravałach rasijskaj armii.
Błohier «Brodiaha sierych zon» paviedamlaje, što ŭkrainskaja artyleryja źniščyła treci most cieraz Askoł — u Kupiansku. «Pavodle papiarednich źviestak, most cieraz Askoł u Kupiansku raźbity. Taksama ŭdary nanosiacca pa Vialikim Burłuku. Mahčyma, praciŭnik rychtujecca pašyrać płacdarm», — piša «Brodiaha».
Vialiki Burłuk — heta rajcentr na poŭnač ad Kupianska, na podstupach da Vaŭčanska, apošniaha akupavanaha ŭkrainskaha horada ŭ hetaj častcy Charkaŭskaj vobłaści. Učora ŭkrainskaja artyleryja abstralała i rasijskija vajskovyja abjekty ŭ samim Vaŭčansku, a taksama ŭ Iziumie i vakoł jaho.
Aficyjna pra vyzvaleńnie Siańkova i prasoŭvańnie da Harachavatki ŭkrainskaje kamandavańnie pakul nie paviedamlała. Učora ŭkrainski ściah byŭ uźniaty nad horadam Bałakleja. Rasijski harnizon z horada źbieh u kirunku Iziuma.
Kamientary