Jak ciapier vyhladaje znutry «eks-Kempinski» kala minskaha cyrka
Čatyry budynki na praśpiekcie Niezaležnaści pobač z cyrkam płanavali vykarystać jak haściničny kompleks. Usie raboty pavinny byli zaviaršyć da čempijanatu śvietu pa chakiei 2014 hoda. Ale niešta pajšło nie tak. U 2016-m «Kiempinski» vykupiŭ Śbier Bank. Niadaŭna tam skončyŭsia ramont i adkryŭsia ofis. Jak jon vyhladaje znutry, pakazvaje Myfin.by.
Fota tut i dalej: Śbier Bank
«My atrymali «hoły» fasad z voknami». U jakim stanie budynak pierajšoŭ da banka
Što tut było ŭ 2016 hodzie, kali bank tolki vykupiŭ budynak?
«My atrymali «hoły» fasad z voknami. Niazručnaściaŭ było vielmi šmat: u padvałach z-za vołkaści pachła jak pobač z pazielaniełymi rekami, pakoi byli bolš prystasavanyja pad hatel, heta značyć, amal u kožnym — svaja prybiralnia i dušavaja, što taksama nie vielmi dobra dla ofisnaha pamiaškańnia. Plus pamier haściničnaha numara adroźnivajecca ad standartaŭ ofisnych kabinietaŭ, tamu pryjšłosia znosić ścieny i ŭsio pierarablać», — raspaviadaje pradstaŭnik zabudoŭščyka Kanstancin.
Samaj vialikaj prablemaj akazałasia padtapleńnie budynka. Rabotniki raspaviali, što na likvidacyju niepryjemnaha pachu i vołkaści ŭ padvalnych pamiaškańniach i na padziemnaj parkoŭcy (zajmaje 2 pavierchi) spatrebiłasia amal dva hady. Prablemu z pravodkaj i ŭładkavańniem ofisaŭ vyrašyli z dapamohaj falšyvych padłoh.
«Falšyvyja padłohi robiać ofis vielmi mabilnym. Naprykład, kali spatrebicca pierastanoŭka, to možna padniać nievialiki ŭčastak padłohi, prakłaści dadatkovyja kabieli, pastavić novyja razietki i zakryć padłohavaje pakryćcio», — kaža Kanstancin.
Trenažory ŭ kalidorach i šklanyja ofisy: u kolki abyšoŭsia ramont
Aktyŭnaja faza ramontu pryjšłasia na 2019-2021 hady, kali z-za COVID-19 va ŭsim śviecie pačalisia prablemy z pastaŭkami budmateryjałaŭ.
«My dumali, nas heta mocna zakranie, ale jakoje ž było ździŭleńnie, kali ŭ dyzajn-prajekcie ad zamiežnych zakazčykaŭ 70% mebli akazałasia biełaruskaj. Heta dapamahło skaracić vydatki na ramont i čas na transparciroŭku materyjałaŭ. Mahu skazać, što biełaruskaja mebla vyhladaje nie horš za zamiežnuju», — kamientuje pradstaŭnik zabudoŭščyka.
Ciapier usie pavierchi, akramia dziaviataha, nahadvajuć open space: 2 kuchni na pavierch, raspranalni, prybiralni, pakoj adpačynku, niekalki pieramoŭnych i paračka trenažoraŭ u kalidorach. Na 9-m paviersie raźmiaščajucca pa pierymietry kabiniety kiraŭnictva. Usie ofisy top-mieniedžmientu šklanyja.
Nazvać kankretny košt ramontu pradstaŭniki banka paabiacali bližej da listapada, a pakul prakamientavali ŭ ahulnych rysach.
«Možna skazać, što hety ramont abyšoŭsia ŭ niekalki dziasiatkaŭ miljonaŭ biełaruskich rubloŭ», — udakładniaje staršynia kiravańnia banka Ihar Miarkułaŭ.
Jak bank płanuje adbić układańni
Pa słovach Miarkułava, u banka jość płan, jaki dapamoža akupić vydatki na ramont. Pavodle acenak, pieršyja dachody pryniasie nie arenda ofisaŭ, a arenda pamiaškańniaŭ pad kramy i kafe ŭ dvuch budynkach kompleksu na nabiarežnaj raki Śvisłač.
«Miarkujem, što na pamiaškańni na bierazie raki ź vidam na park, dy jašče i ŭ samym centry Minska, pavinna być šmat žadajučych. Bližej da listapada my praviadziom manitorynh rynkavych cen i adkryjem zapis na arendu», — aceńvaje pierśpiektyvy pradstaŭnik zabudoŭščyka.
Ciapier unutranaje azdableńnie hatovaje tolki ŭ hałoŭnym ofisie. Try astatnija budynki pakul u čarnavym ramoncie. Unutry prakładzienyja takija ž falšyvyja padłohi, jak i ŭ hałoŭnym ofisie, a voś bałkony ŭžo prydatnyja dla kaktejlnych viečarynak na terasach. Taksama dadatkovy prybytak banku pryniasie i admova ad raniejšaha ofisu na vulicy Mulavina.
Płanujecca, što na pačatku listapada aficyjna buduć zdadzienyja ŭsie 4 budynki i całkam skončanaje ŭładkavańnie prylehłych terytoryj.
Kamientary
Po etim urodlivym karikaturam na architiekturu vidno,naskolko kołchoźniku čužd Minsk, naskolko i Minsku sam kołchoźnik čužoj.