Kreml pastaviŭ na stop refierendumy ab «dałučeńni» akupavanych terytoryj da Rasii

Sa słoŭ dźviuch krynic «Mieduzy», blizkich da Kramla, rasijskija ŭłady adkłali na niavyznačany termin praviadzieńnie refierendumaŭ ab «dałučeńni da Rasii» samaabvieščanych «ŁNR» i «DNR», a taksama akupavanych terytoryj ukrainskich abłaściej — Zaparožskaj, Charkaŭskaj i Chiersonskaj (u kožnaj ź ich rasijskija ŭłady raniej sfarmavali tak zvanuju vajskova-cyvilnuju administracyju).

Surazmoŭcy «Mieduzy» rastłumačyli, što adzinaja pryčyna hetaha rašeńnia — paśpiachovy kontrnastup ukrainskich vojskaŭ na Charkaŭskim napramku. Krynicy padkreślili, što źviazanyja z Kramlom palittechnołahi, jakija pracavali ŭ Charkaŭskaj i Zaparožskaj abłaściach, užo adklikanyja ŭ Rasiju: «******* [paśpiešliva źjechali] ŭsie. Pastupiŭ zahad jechać dadomu». U Chiersonskaj vobłaści rasijskija palittechnołahi, jakija rychtavali refierendum, pakul zastajucca.

Jak raniej pisała «Mieduza», na pačatku vieraśnia sakratar hiensavieta «Adzinaj Rasii», pieršy vice-śpikier Savieta Fiederacyi Andrej Turčak abviaściŭ, što refierendumy budzie «pravilna i simvalična» pravieści 4 listapada — u Dzień narodnaha adzinstva. Pradstaŭniki akupacyjnych «vajskova-cyvilnyich administracyj» na padkantrolnych Rasii terytoryjach hetuju ideju padtrymali.

4 listapada stała pieršaj kankretnaj dataj refierendumaŭ, jakuju adkryta nazyvali rasijskija čynoŭniki takoha vysokaha ranhu. Pry hetym na samym pačatku vajny ŭ Kramli byli ŭpeŭnienyja, što zmohuć anieksavać novyja terytoryi ŭžo ŭ krasaviku. Zatym praź niaŭdačy na froncie dedłajn pieranieśli na maj, a potym i na 11 vieraśnia — u hety dzień u Rasii prachodziać rehijanalnyja vybary.

Adnak pravieści ich u vieraśni taksama nie ŭdałosia. U vyniku pad ciskam Uładzimira Pucina, jakomu «nie cierpicca dałučyć» novyja terytoryi, u Administracyi prezidenta RF ustalavali kančatkovuju datu — 4 listapada.

Pa słovach adnaho z surazmoŭcaŭ miedyja, užo na nastupnym tydni akupacyjnyja «vajenna-cyvilnyja administracyi» ŭkrainskich terytoryj pavinny byli aficyjna abviaścić pra pačatak padrychtoŭki da listapadaŭskaha refierendumu. Ciapier usie hetyja płany «pastaŭlenyja na stop», pra listapad havorka ŭžo nie viadziecca».

Surazmoŭcy, blizkija da Kramla, padkreślili: rasijskija ŭłady nie razumiejuć, kali zmohuć viarnucca da abmierkavańnia kankretnych dat mahčymaha hałasavańnia, — heta zaležyć ad taho, jak budzie raźvivacca kontrnastup Ukrainy. Pres-sakratar prezidenta RF Dźmitryj Piaskoŭ na pytańni «Mieduzy» pra los refierendumaŭ nie adkazaŭ.

• 10
• 0
• 18
• 1
• 0
• 1
• 2
• 0