Chto taki Alaksandr Syrski, kamandujučy ukrainskim nastupam pad Iziumam
Ukrainskaja armija imklivym udaram vyzvaliła Charkaŭskuju vobłaść. 10 vieraśnia na hałoŭnaj płoščy Bałaklei padniali ŭkrainski ściah. U cyrymonii ŭziaŭ udzieł ścipły i niepubličny kamandujučy Suchaputnymi vojskami USU Alaksandr Syrski. Mienavita Syrski kiravaŭ nastupam, značeńnie jakoha paraŭnoŭvajuć ź bitvaj pad Mukdenam padčas rasijska-japonskaj vajny 1905 hoda. Raskazvajem, što viadoma pra Syrskaha.
The town of Balakliya, Kharkiv region, is liberated by Ukrainian troops!
The Commander of Ukrainian Land Forces, Hero of Ukraine, Colonel General Oleksandr Syrskyi is leading the Ukrainian offensive in this sector.
The Ukrainian flag has been raised in the town centre. pic.twitter.com/zQ8ngDitZw
«My siońnia zaviaršajem vyzvaleńnie Bałaklei, pieršaha vialikaha horada padčas našaha nastupu. I ja ŭpeŭnieny ŭ tym, što heta nie apošniaje miesca… Siońnia aficyjna stavim kropku ŭ začystcy hetaha horada i padymajem naš dziaržaŭny ściah», — skazaŭ Syrski padčas cyrymonii.
Ukrainskija vajskoŭcy zachapili sotni adzinak techniki, bojeprypasy navat dakumientacyju. Maskva nazvała hetaje biehstva «pierahrupiroŭkaj».
Ideja ŭdaru na Kupiansk u abychod Iziuma i Bałaklei vyjaviłasia hienijalna trapnaj. Rasijski front razvaliŭsia za try dni.
Apieratyŭnaje kiravańnie hetaj bliskučaj apieracyjaj ažyćciaŭlaŭ kamandujučy Suchaputnych vojskaŭ Ukrainy Alaksandr Syrski.
Alaksandr Syrski — heta asoba numar dva ŭkrainskaj armii. Syrski svabodna havoryć pa-anhlijsku, trenirujecca razam sa svaimi padnačalenymi ŭ sportzale i ŭjaŭlaje saboj žyvy kantrast z rasijskimi hienierałami.
Alaksandru Syrskamu 57 hadoŭ, jon na słužbie z 1986 hoda i kamanduje suchaputnymi ŭzbrojenymi siłami z 2019 hoda.
Cikava, što Syrski — uradženiec Uładzimirskaj vobłaści Rasii. U 1982 hodzie Syrski skončyŭ Maskoŭskaje vyšejšaje ahulnavajskovaje kamandnaje vučylišča.
Admietna, što Syrski dahetul havoryć pa-ŭkrainsku ź vielmi mocnym rasiejskim akcentam.
U 1996 hodzie jon skončyŭ z adznakaj Akademiju Uzbrojenych sił Ukrainy (apieratyŭna-taktyčny ŭzrovień), u 2005 hodzie — Nacyjanalnuju akademiju abarony Ukrainy (apieratyŭna-stratehičny ŭzrovień) z załatym miedalom.
U 2000-ch hadach Alaksandr Syrski kamandavaŭ 72-j miechanizavanaj bryhadaj. Dasłužyŭsia da zvańnia hienierał-majora.
Niepasredna pierad pačatkam kanfliktu na ŭschodzie Ukrainy, u listapadzie 2013 hoda, jon staŭ pieršym namieśnikam načalnika hałoŭnaha kamandnaha centra USU. Mienavita Syrski, jaki svabodna havoryć pa-anhlijsku, ad imia Ministerstva abarony Ukrainy ŭ štab-kvatery NATA aljansu abmiarkoŭvaŭ pierachod ukrainskaj armii na nataŭskija standarty.
Z pačatkam bajavych dziejańniaŭ na ŭschodzie Ukrainy byŭ načalnikam štaba Antyterarystyčnaj apieracyi.
U aktyvie Alaksandra Syrskaha — vychad ukrainskich vajskoŭcaŭ z Debalcava ŭ 2015 hodzie i arhanizacyja abarony Kijeva ŭ pieršyja dni šyrokamaštabnaha rasijskaha ŭvarvańnia va Ukrainu ŭ lutym 2022 hoda.
U pryvatnaści, Syrski byŭ adnym z hałoŭnych kamandziraŭ sił ATA padčas bajoŭ za Debalcava zimoj 2015 hoda. Jon udzielničaŭ u bajach u Vuhlahorsku, u vioscy Redkaduby i niaŭdała sprabavaŭ adbić Łohvinava. Jon ža kaardynavaŭ vyvad ukrainskich vajskoŭcaŭ z Debalcava.
Pad jaho kiravańniem ažyćciaŭlalisia padryvy mahčymych šlachoŭ pierachodu cieraz raku Karapulku. Adnak kiraŭnik siektara, pa słovach hienierała, nie daŭ pravieści ŭsie padryvy, z-za čaho pierapravy byli zachoplenyja praciŭnikam. Mienavita sfarmiravanaja Syrskim hrupa «Bars» prykryvała vychad ukrainskaj armii z Debalcava.
Za bai na Debalcaŭskim płacdarmie Alaksandr Syrski ŭznaharodžany ordenam Bahdana Chmialnickaha III stupieni i paśla atrymaŭ zvańnie hienierał-lejtenanta i praciahvaŭ padymacca pa vajennaj ijerarchii.
U 2016 hodzie jon uznačaliŭ Abjadnany apieratyŭny štab USU, jaki kaardynavaŭ apieratyŭnyja dziejańni roznych ukrainskich siłavikoŭ na Danbasie. A ŭ 2017 hodzie staŭ kamandziram usioj Antyterarystyčnaj apieracyi na ŭschodzie Ukrainy, jakaja paźniej stała nazyvacca Apieracyjaj abjadnanych sił.
U 2019 hodzie jaho pryznačyli kiravać ukrainskaj piachotaj — jon staŭ kamandujučym Suchaputnych vojsk.
Mienavita Syrski kiravaŭ paśpiachovaj abaronaj ukrainskaj stalicy, za što ŭ krasaviku jamu dali zorku Hieroja Ukrainy.
«Kab kiraŭnictva Rasii raźviazała takuju nachabnuju, šyrokamaštabnuju ahresiju, ja, ščyra kažučy, navat ujavić sabie nie moh. Mnie zdavałasia, što kali i pačnucca aktyŭnyja bajavyja dziejańni, to, chutčej za ŭsio, jany pačnucca na ŭschodzie, vakoł abo ŭ miežach Danieckaj i Łuhanskaj abłaściej. Ale my vajskoŭcy. Tamu, niezaležna ad taho, uva što ja vieryŭ ci nie vieryŭ, ja ŭsio roŭna vykonvaŭ nieabchodnyja dziejańni», — pryznajecca Syrski ŭ razmovie z The Washington Post.
Dla abarony Kijeva Alaksandr Syrski arhanizavaŭ dva kalcy abarony — u pryharadzie stalicy i na ŭskrainach samoha horada. Pavodle zadumy hienierał-pałkoŭnika, unutranaja linija abarony pavinna była znachodzicca jak maha dalej ad źniešniaj, kab rasijskaja armija nie abstrelvała centr stalicy z artyleryi.
Syrski padzialiŭ horad na siektary i pryznačyŭ kiravać kožnym rajonam hienierałaŭ z vajskova-navučalnych centraŭ. Taktyčnyja rašeńni prymali aficery na miescach nieadkładna, bieź nieabchodnaści kansultavacca sa štabam. Prykładna za tydzień da ŭvarvańnia ŭkrainskija vajskoŭcy pieramiaścili ŭsie kamandnyja punkty. Syrski taksama addaŭ zahad vyvieści srodki armiejskaj avijacyi, u pryvatnaści, viertaloty i samaloty, z asnoŭnych baz.
U rasparadžeńni USU ŭ bajach za Kijeŭ była tolki 72-ja asobnaja miechanizavanaja bryhada, adnak jaje tankavaj mocy nie chapała dla paŭnavartasnaj abarony horada. Syrski zahadaŭ usim vajskovym navučalnym centram stvaryć śpiecyjalnyja impravizavanyja bataljony. Taksama hienierał-pałkoŭnik rasparadziŭsia dastavić u Kijeŭ artyleryjskija sistemy, jakija zvyčajna vykarystoŭvajucca dla navučańnia.
«Ukrainskaja nacyja ŭ 2014 hodzie zrabiła svoj vybar na karyść hramadstva, jakoje kirujecca svabodaj, demakratyjaj i zakonnaściu: na karyść Jeŭropy i NATA. Mienavita ŭ hetym kirunku ruchajemsia z tych časoŭ. Tamu dla nas siabroŭstva ŭ Aljansie — heta nie tolki cyvilizacyjny vybar, ale i žyćciovaja nieabchodnaść dla isnavańnia niezaležnaj Ukrainy», — havaryŭ jon u adnym ź intervju.
Jašče ŭ žniŭni 2021 hoda Syrski papiaredžvaŭ, što Rasija moža pierajści da adkrytaj ahresii.
«Vajenna-palityčnaja abstanoŭka ŭ Jeŭropie abvastrajecca. (…) Majem situacyju, pry jakoj vajenna-stratehičnaja abstanoŭka źbierahaje tendencyju da dalejšaj eskałacyi. Ahulnaja kolkaść vojskaŭ pablizu dziaržaŭnaj miažy Ukrainy (z ulikam ich naroščvańnia) składała bolš za 100 tysiač čałaviek. Pad markaj padrychtoŭki da supolnych vajskovych vučeńniaŭ Rasii i Biełarusi znoŭ nazirajecca pieramiaščeńnie vojskaŭ i naroščvańnie hrupovak na roznych apieratyŭna-stratehičnych kirunkach. My razumiejem, što pry peŭnych umovach Rasija moža pierajści i da adkrytaj ahresii», — kazaŭ hienierał.
Mienavita Syrski zajmaŭsia pytańniami palapšeńnia jakaści kiravańnia i adukacyi, šmat havaryŭ pra źmienu mientalnaści i vajennaha myśleńnia. Hienierał ukaraniaŭ pryncypy, padychody i kaštoŭnaści NATA, što dazvoliła źmianić mientalnaść ukrainskaha vajennaha myśleńnia — z šabłonnaj na kreatyŭnuju.
Ukraincy całkam parvali z savieckaj spadčynaj i stvaryli novaja pakaleńnie kvalifikavanych, inicyjatyŭnych vajskoŭcaŭ z raźvitymi lidarskimi jakaściami, jakim nie treba ŭzhadniać kožnaje rašeńnie sa štabam.
Alaksandr Syrski samoj svajoj bijahrafijaj abviarhaje rasijskija štampy pra ŭkrainskich «nacyjanalistaŭ» i «nacystaŭ». I, u toj ža čas, pakazvaje, kolki dała ŭkrainskaj armii źmiena fiłasofii i ideałohii i mietadyčnaja supraca z NATA.
Što da Iziumskaj apieracyi, to jana maje šancy ŭvajści ŭ padručniki vajskovaj spravy.
Kubrakoŭ davodziŭ, što milicyjant Zhirski nie datyčny da bandy nalotčykaŭ. Ciapier taho sudziać — pahražaje da 20 hadoŭ3
Kamientary