Uzbrojenyja siły Azierbajdžana abstralali armianskija pazicyi pa troch napramkach, paviedamiła pres-słužba Minabarony Armienii.
Jak zajavili ŭ vajskovym viedamstvie Armienii, paśla paŭnočy 13 vieraśnia vajskoŭcy Azierbajdžana pačali abstrelvać armianskija pazicyj kala nasielenych punktaŭ Horysa, Sotka i Džermuka z artyleryi i bujnakalibiernych harmat, a taksama z dapamohaj bieśpiłotnikaŭ.
U svaju čarhu, u Minabarony Azierbajdžana zajavili, što padraździaleńni Uzbrojenych siłaŭ Armienii ździejśnili dyviersii na Daškiesanskim, Kielbadžarskim i Łačynskim kirunkach azierbajdžanska-armianskaj dziaržaŭnaj miažy.
«Dyviersijnyja hrupy Uzbrojenych siłaŭ Armienii ŭ ciomny čas sutak zaminiravali rajony i šlachi zabieśpiačeńnia pamiž pazicyjami padraździaleńniaŭ azierbajdžanskaj armii ŭ roznych napramkach, vykarystoŭvajučy horny reljef miascovaści i isnujučyja jary», — havorycca ŭ paviedamleńni.
«U vyniku pryniatych našymi čaściami terminovych mieraŭ pa nieadkładnym praduchileńni hetych aktaŭ adbyŭsia boj», — dadaje Minabarony Azierbajdžana.
Paviedamlajecca pra straty z abodvuch bakoŭ kanfliktu.
Važna, što kali mierkavać pa ciapierašnich paviedamleńniach, bai iduć nie na terytoryi Nahornaha Karabacha, jaki pavodle mižnarodnaha prava źjaŭlajecca častkaj Azierbajdžana, choć častkova i kantralujecca Armienijaj užo try dziasiatki hadoŭ, a na mižnarodna pryznanaj armianskaj terytoryi. Kali heta tak, to moža stvarycca zusim novaja vajenna-palityčnaja situacyja.
Armienija źjaŭlajecca členam Arhanizacyi Damovy ab kalektyŭnaj biaśpiecy. U adpaviednaści z umovami hetaj damovy, inšyja členy arhanizacyi Biełaruś, Rasija, Kazachstan, Kyrhyzstan i Tadžykistan pavinny prychodzić na dapamohu, kali niechta napadzie na Armieniju.
Čytajcie taksama:
Vojski Azierbajdžana zajšli ŭ Łačyn, jaki 30 hadoŭ kantralavała Armienija
Chto toj palitviazień ź Ivanava, jaki vypłaciŭ $600 tysiač kampiensacyi za danaty i ŭsio adno atrymaŭ vialiki termin?7
Chto toj palitviazień ź Ivanava, jaki vypłaciŭ $600 tysiač kampiensacyi za danaty i ŭsio adno atrymaŭ vialiki termin?
«Na praciahu 30 hadoŭ niezaležnaści biełaruskamoŭnyja biuleteni zadavalniali ŭsich». Kamunisty abvinavacili Bondaravu ŭ raspalvańni varožaści na moŭnaj hlebie1616
Kamientary