Abvieščanyja novyja drakonaŭskija prysudy: hetym razam siabram inicyjatyvy «Busły laciać»
Sudździa Anastasija Papko siońnia pryznačyła vialikija terminy šaści fihurantam spravy inicyjatyvy «Busły laciać». Jany dasiahajuć 15 hadoŭ kałonii, piša «Viasna».
Alaksieju Ivanisavu prysudzili 14 hadoŭ kałonii i štraf u 500 bazavych.
Alaksieju Hamiezu — 14,5 hadoŭ kałonii i štraf u 500 bazavych.
Mikałaju Biblisu — 8,5 hadoŭ kałonii i štraf u 300 bazavych.
Andreju Budaju — 15 hadoŭ kałonii i štraf u 500 bazavych.
Alaksandru Muraŭjovu i Alaksandru Sidarenku — pa 12 hadoŭ kałonii kožnamu.
U zaležnaści ad roli kožnaha ŭ roznym spałučeńni chłopcaŭ abvinavačvajuć va:
- udziele ŭ inicyjatyvie «Busły laciać», jakaja pryznanaja strukturami łukašenkaŭskaha režymu terarystyčnaj;
- udziele ŭ akcyjach pratestu;
- paškodžańni aŭtamabila sudździ Barysaŭskaha rajona i šyn aŭtamabila aktyvista-karespandenta centralnaha ŚMI;
- kidańni kamianioŭ u vokny kvatery minskaha prakurora i praŭładnaj aktyvistki;
- źniščeńni sistemy videanazirańnia ŭ Frunzienskim rajonie Minska.
Sud pa spravie pa chadajnictvu prakurorki zrabili zakrytym, jon išoŭ amal 4 miesiacy.
Pierad siońniašnim sudovym pasiadžeńniem pamiž «paciarpiełymi» i 76-hadovaj maci Ivanisava Natallaj adbyŭsia kanflikt. Hrupa padtrymki «paciarpiełych» pačała narakać, što, maŭlaŭ, z-za takich jak abvinavačvanyja «ŭsio adbyvajecca i moža pačacca vajna».
Maci Ivanisava nie vytrymała i niešta im adkazała. Na jaje vyklikali narad milicyi. Na 76-hadovuju žančyny milicyjanty skłali pratakoł ab administracyjnym pravaparušeńni.
Kamientary