29 vieraśnia va ŭročyščy Kurapaty, što na paŭnočna‑ŭschodniaj uskrainie Minska, adbyłosia paminańnie achviar stalinizmu 1939 hoda.
Prykładna 20 udzielnikaŭ miemaryjalnaj akcyi ź bieł‑čyrvona‑biełym ściaham uskłali da pamiatnaha znaka pakutnikam Biełarusi kvietki i pastavili śviečki.
Jak adznačyŭ u svaim vystupleńni lider kaardynacyjnaha savieta pradprymalnikaŭ Minska Alaksandr Makajeŭ, akcyja źjaŭlajecca tradycyjnaj i prachodzić 29‑ha dnia štomiesiac.
«My čarhovy raz addajem daninu pavahi našym prodkam — hramadzianam našaj krainy, jakija byli biaźvinna rasstralanyja na hetym miescy, — adznačyŭ jon. — Praŭda ab Kurapatach nie vielmi padabajecca siońniašnim uładam. Adnak ja ŭpeŭnieny, što Kurapaty ciapier pieratvarajucca ŭ narodny miemaryjał i ŭ svoj čas zojmuć hodnaje miesca siarod inšych pomnikaŭ našaj historyi».
Adzin ź lideraŭ mižnarodnaj maładziožnaj arhanizacyi «Małady front» (Čechija) Mikałaj Dziemidzienka skazaŭ, što Kurapaty ŭžo stali «sakralnym miescam». «My pavinny pavažać jak svaje śviaty, tak i pamiatać pra svaje trahiedyi», — adznačyŭ Dziemidzienka. Jon nahadaŭ prysutnym, što prykładna praź miesiac budzie adznačacca Dzień paminańnia prodkaŭ (Dziady), i zaklikaŭ usich 29 kastryčnika pryjści ŭ Kurapaty ź siabrami, znajomymi, blizkimi i ŭziać udzieł u dobraŭparadkavańni ŭročyšča.
Lider arhkamiteta pa stvareńni ruchu «Razam» Viačasłaŭ Siŭčyk u svaim vystupleńni pravioŭ paralel pamiž padziejami vieraśnia 1939 hoda i vieraśnia 2009‑ha. «Jak i ŭ 39‑m hodzie, kali adbyŭsia sumiesny parad hiermanskich i savieckich vojskaŭ, na terytoryi Biełarusi siońnia prachodziać sumiesnyja rasijska‑biełaruskija manieŭry. Siudy prylacieŭ rasijski prezident Dźmitryj Miadźviedzieŭ. Hety fakt vyklikaje vialikuju zaniepakojenaść, bo śviedčyć pra toje, što roznyja impierskija siły dahetul razhladajuć Biełaruś u jakaści raźmiennaj maniety, a biełaruskija hramadzianie buduć hinuć za čužyja intaresy», — adznačyŭ jon.
Siŭčyk paviedamiŭ, što 29 kastryčnika płanujecca pravieści ŭ Kurapatach chresny chod ad pamiatnaha znaka da Kryža pakut, jaki ŭstanoŭleny ŭ nizinie ŭročyšča. Jon taksama zaklikaŭ usich uziać udzieł u hetaj cyrymonii.
Za mierapryjemstvam nazirali piać supracoŭnikaŭ milicyi ŭ formie i asoba ŭ cyvilnym, adnak jany nie ŭmiešvalisia ŭ jaho praviadzieńnie. Cyrymonija prajšła bieź incydentaŭ.
