Navukova abhruntavanyja stratehii, jakija sapraŭdy dapamohuć vam jeści mienš

Jak piša The Wall Street Journal, pa stanie na 2017—2018 hady try čverci darosłych žycharoŭ ZŠA mieli lišniuju vahu. Navukoŭcy adznačajuć, što padčas pandemii ludzi jašče bolš nabrali vahu. Toje samaje nazirajecca i ŭ Biełarusi.

Daśledčyki imknucca zrazumieć, što moža padšturchnuć čałavieka da vybaru bolš zdarovaj ježy. Jany sprabujuć vyznačyć prostyja praviły, vykanańnie jakich dazvoliła b nam žyć zdaraviej.

Daktary i navukoŭcy ŭ cełym zhodnyja, što zdarovaja dyjeta pavinna ŭklučać šmat harodniny, sadaviny, celnaha zbožža, niatłustaha miasa i ryby. U toj ža čas jak maha mieniej u racyjonie maje być słodyčaŭ i sałodkich napojaŭ, zdoby.

Niezaležna ad taho, sprabujecie vy pierahledzieć svaju dyjetu, admovicca ad šakaładnych batončykaŭ na kasie ci prosta padtrymać dobryja zvyčki, jakija ŭ vas užo jość, hetaje daśledavańnie prapanuje niekalki sposabaŭ palehčyć zdarovaje charčavańnie.

Uviadzicie dla siabie adno-dva kankretnyja praviły i trymajciesia ich

Jak pakazała psichałahičnaje daśledavańnie, ludzi z bolšaj imaviernaściu buduć dziejničać pa płanie, kali jon składajecca z prostych krokaŭ. Kali meta sfarmulavanaja zanadta šyroka — naprykład, «ja budu lepš charčavacca» — heta zvyčajna nie dziejničaje.

Vybierycie adno-dva kankretnyja praviły charčavańnia i prytrymvajciesia ich — i pry hetym dumajcie pra siabie jak pra čałavieka, jaki nie robić škodnych rečaŭ. Naprykład: «ja nie pju koka-koły i fanty». Abo «ja nie jem smažanaha». Ci «ja nie jem desiertaŭ uviečary».

Kuplajcie pa śpisie i praz dastaŭku

Kuplańnie pa śpisie zaścierahaje vas ad «impulsiŭnych zakupaŭ», kali vy ŭ kramie bieracie toje, biez čaho vy možacie abyścisia, ale na što ŭ vas padaje voka, dzie vas pryvablivaje ŭpakoŭka. 

Voś u hetym pieravaha kuplańnia praduktaŭ praz słužby typu «Je-dastaŭki». 

Chto choča schudnieć i zakuplajecca praź internet, kuplajuć mienš tłustaha i sałodkaha, čym tyja, chto chodzić u kramu sam, i heta navukova dakazana. 

Ale ž i pry vybary praź internet budźcie aściarožnyja z rekłamaj, jakaja sprabuje pierakanać vas nabyć tavary, jakija vy nie płanavali kuplać. 

Dobry son sparadžaje dobraje charčavańnie

Niedastatkovy son (jak praviła, mienš za šeść z pałovaj hadzin u sutki) viadzie da pavieličeńnia vahi, pakazali navukovyja daśledavańni. Śpiecyjalisty pa śnie zvyčajna rekamiendujuć zdarovym darosłym spać ad siami da dzieviaci hadzin u sutki — u kožnaha čałavieka pa-svojmu, ale ŭ cełym nam treba vosiem hadzin, kab vyspacca. 

Kali my niedasypajem, naš arhanizm schilny kampiensavać stres jadoju, što pryvodzić da pierajadańnia. Čamu tak? Daśledavańni pakazali, što kali my niavyspanyja, u ciele vypracoŭvajucca harmony, źviazanyja z apietytam. Kali čałaviek niedasypaje, jamu chočacca tłustaha. 

Daśledavańnie, praviedzienaje ŭ 2013 hodzie, pakazała, što ludzi, jakim dazvalali spać tolki čatyry hadziny na sutki na praciahu piaci načej, źjadali ŭ siarednim 550 dadatkovych kałoryj štodnia.

Nie ježcie adny

Kali my jamo ź siamjoj i siabrami, my, jak praviła, robim bolš paŭnavartasnyja abiedy i viačery, u nas tady jość dadatkovaja matyvacyja hatavać. U kampanii my taksama schilnyja jeści pavolniej, dziakujučy čamu my raniej zaŭvažajem, kali ŭžo sytyja. 

Siarod inšaha, daśledavańni pakazali, što, kali adzin čałaviek u siamji sprabuje palepšyć svoj racyjon i schudnieć, jaho blizkija taksama trochi chudniejuć, navat kali jany sami nie stavili takoj zadačy.

• 35
• 0
• 3
• 1
• 3
• 2
• 1
• 0