Hrybnaja lichamanka. Biełarusy dzielacca ŭradžajem za vychodnyja — zajzdrosnyja FOTY
Haračy asieńni siezon hryboŭ u Biełarusi, padobna, dasiahnuŭ svajho apahieja. U minułyja vychodnyja prafiesijanały i amatary kinulisia ŭ lasy dziela «cichaha palavańnia» — i niezdarma: uradžaj biełaruskich hrybnikoŭ za apošni ŭikiend uražvaje.
Spravazdačy ź lasoŭ my prahladzieli ŭ tematyčnych supołkach i ŝ sacsietkach. Zachaplalnyja fotazdymki prylatajuć z roznych rehijonaŭ krainy.
«Biełych bolš, čym u pačatku tydnia. Atrymałasia znajści 19 štuk, taksama traplajucca padbiarozaviki i adzinkavyja čyrvonahałoviki, šmat maślakoŭ, ale brali tolki dla raznastajnaści», — piša hrybnik ab vynikach subotniaha pachodu ŭ les Vilejskaha rajonu.
Pra toje, što maślakoŭ šmat, śviedčać i inšyja hrybniki. Naprykład, taki ŭradžaj sabraŭ mužčyna ŭ lasach pamiž Ivacevičami i Biełaziorskam.
«Hryby jość! — piša inšy, jon razam ź siamjoj adpraviŭsia ŭ bok Babrujsku. — Dźvie hadziny ŭ čatyry ruki, usie apieńki znachodzilisia ŭ starych vyrazkach. Źbirać było vielmi składana, pakolki hryby byli ŭ 80% vypadkaŭ u huščy travy i praktyčna zaŭsiody byli joju nakrytyja, davodziłasia advaročvać kožny kust».
Ale ž śviežaje pavietra i razumieńnie taho, što apieniek tut vielmi šmat, uziało svajo — kampanii hrybnikoj na astatnija akaličnaści było ŭsio roŭna.
«Vynik: 80 litraŭ apieniek i 40 litraŭ maślakoŭ ź jałovaj dzialanki», — dzielicca mužčyna.
I ŭ Kobrynskim rajonie dobry rost baravikoŭ. Žančyna publikuje ŭ supołcy hrybnikoŭ pryvabnyja niadzielnyja fotazdymki.
Jašče adna biełaruska ŭvohule pajechała amal za 100 km paśla taho, jak pabačyła post pra «hrybałku» ŭ Hancavickim rajonie. Bolš za toje, spakusiła na hetuju spravu muža i baćku.
«Rašeńnie było ciažkim, pakolki ich umovaj była pajezdka z načleham. Kašmar: rana ciamnieje i pozna śvitaje, jak vyspać takuju doŭhuju noč u mašynie?! Ale luboŭ da cichaha palavańnia macniejšaja. Žadajučych akazałasia bolš, čym hryboŭ. Mnie zastałosia niašmat», — dzielicca žančyna.
Ale ž jana sabrała 18 padbiarozavikaŭ, 8 maładzieńkich baravičkoŭ, paru žmieniek maślakoŭ i adzin čyrvonahałovik.
A ŭ Mikaševičach siamja ŭčora sabrała 28 litraŭ hryboŭ na tym ža miescy, kudy jany jeździli dniom raniej.
«Sabrali za 3 hadziny ŭ 4 nažy. Biełych šmat maładych, a voś maślaki ŭžo adychodziać, čarvivaść 50%», — piša hrybnica.
A žychar Viciebska, jaki nie pabajaŭsia prahnozu nadvorja i pavioz u les siamju, vielmi ździviŭ zdabyčaj baravikoŭ.
Voś jašče niekalki zajzdrosnych hrybnych kadraŭ z sacsietak:
Ciapier čytajuć
Chto taki Maćviej Bialaj, jakoha nibyta departavali ŭ Biełaruś? Raskazvajem historyju dziŭnaha aktyvista z padazronym minułym3
Kamientary
a ź jakoj heta pary heta słova pišacca z "ŭ"? i ci nie uikEnd?