Arastovič: Biełaruskaje pytańnie — adna z hałoŭnych našych pamyłak padčas hetaj vajny
U novaj prahramie «Fiejhin LIVE» daradca Ofisa prezidenta Ukrainy paŭtaryŭ usie tyja dovady, jakija biełarusy ad pačatku vajny adčajna i biespaśpiachova namahalisia danieści ŭ šmatlikich lutych sprečkach z ukraincami — što vorahi im nie biełarusy, a režym Łukašenki.
«U našym kalektyŭnym nieśviadomym pieramahła formuła «ŭsie biełarusy — pidarasy», — paśla niadoŭhaha padboru słova prosta sfarmulavaŭ Arastovič adnosiny ŭkraincaŭ da paŭnočnych susiedziaŭ.
«U hetym hrandyjoznaja prablema, što ŭ nas uziało vierch [mierkavańnie] niekatorych niedalnabačnych i nie vielmi razumnych krykunoŭ, častka ź jakich, na žal, była zaachvočanaja ź vielmi vysokich palityčnych kołaŭ.
Jano było padchoplenaje, tamu što vielmi vyhadna śpiekulavać na «vstavaj, strana ohromnaja», usich nienavidzim, usich pieramožam. I vielmi nierazumna pastupili ŭ dačynieńni da biełarusaŭ: raz z vašaj terytoryi stralajuć, vy ŭsie nam viečna vinavatyja, vy ŭsie niahodniki, svołačy i h.d.», — patłumačyŭ Arastovič papularnać antybiełaruskich nastrojaŭ va ŭkrainskim hramadstvie.
Pavodle Arastoviča, tyja, chto tak havoryć, nie razumiejuć biełaruskuju situacyju i nie chočuć razumieć.
«Što tam niečałaviečy režym, što ŭ čymści jon bolš biesčałaviečny, čym pucinski — bolš žorstki, bolš efiektyŭna kantraluje Biełaruś, vysunucca tam suprać — heta adrazu stać mišeńniu. I pry hetym, u vielmi niesientymientalnym varyjancie, časam heta aznačaje fizična źniknuć abo prajści praz katavańni.
Tysiačy ludziej prajšli praz turmy, tysiačy žyćciaŭ, tysiačy losaŭ skalečanyja. Kraina maleńkaja, kantralujecca šmat što. I radasna padać na rasijskija «Iskandery» i nie davać im padymacca — heta nie takaja prostaja situacyja. Pryčym hetaja situacyja doŭžycca bolš za 20 hadoŭ. Bolš, čym Pucin kiruje. Tam pakaleńnie vyrasła, vychavanaje hetym usim», — nahadvaje jon.
Pavodle jaho, lohka paŭstavać suprać dyktatara, jaki, jak Janukovič, dva hady pakiravaŭ, i jaho źnieśli.
«A kali 22 hady Janukovič — heta zusim inšaja situacyja — i mientalna, i materyjalna, i stupień kantrolu śpiecsłužbaŭ našmat vyšej. Ja zapeŭnivaju, što kali b u nas Janukovič kiravaŭ 22 hady, nam našmat składaniej było b być hierojami i padymać majdan. Jašče pytańnie, nakolki heta było b mahčyma ŭ pryncypie», — čamuści apieluje 22 hadami Arastovič, vidavočna nakładajučy na Łukašenku pucinski termin kiravańnia.
Jon pryvodzić u prykład połk Kalinoŭskaha i inšych dobraachvotnikaŭ, jakija vajujuć ciapier va Ukrainie.
«Jany demanstrujuć ekstraardynarnyja bajavyja jakaści, prosta cudoŭnyja chłopcy. I jany takuju kłasnuju sučasnuju vajnu «katajuć» — vysokaprafiesijnuju, ź bieśpiłotnikami, z celeŭkazańniem, z usim astatnim. Naohuł, supier chłopcy. Ja zaŭsiody raju hetym krykunam, što biełarusy — słabaki, pajści pałku Kalinoŭskaha heta raskazać».
Arastovič kanstatuje, što va Ukrainie nie zmahli vyrašyć hałoŭnuju zadaču, jakuju «treba vyrašyć — adździalić režym ad naroda».
«Pry tym, što ŭ naroda jość zakonna abrany prezident — Śviatłana Cichanoŭskaja, — padkreślivaje jon. — Ale ŭ nas i pa Cichanoŭskaj lubiać prajścisia asobnyja prydurki, paraskazvać, što jana słabačka, jana — ničoha i h.d. Heta zakonna abrany prezident Biełarusi. Nahadvaju, Ukraina nie pryznała Łukašenku zakonna abranym prezidentam Biełarusi. Tamu my dapuścili šerah vielmi surjoznych pamyłak u dačynieńni da Biełarusi. Jašče nie pozna ich vypravić».
Ad siabie asabista daradca Ofisa prezidenta Ukrainy dadaŭ, što zaŭsiody padzialaŭ u Biełarusi režym Łukašenki i biełaruski narod. Biełarusy dla jaho zastajucca brackim narodam.
«Biełaruski narod znachodzicca ŭ zakładnikach. Biełaruski narod akupavany pucinskim režymam u značnaj stupieni. I pucinski režym abychodzicca ź im hetak ža, jak jon abychodzicca z našymi ludźmi na akupavanych terytoryjach. Adzinaje, što tam niama masavych zabojstvaŭ, ale z hetym (kali nie z masavymi zabojstvami, to z masavym teroram) paśpiachova spraŭlajecca režym Łukašenki. Pucinskim i nie treba — za ich robiać hetuju pracu», — kaža jon.
Arastovič padkreślivaje, što niahledziačy na tatalny teror u krainie, u najbolš aktyŭnaj fazie baraćby za Kijeŭ biełarusy «ŭmudralisia zapuścić zabieśpiačeńnie ciahnikami nie naŭprost na Homiel, a až praz brescki palihon, što ŭkraincam «ekanomiła niekalki dzion».
«Abaronnaja apieracyja za Kijeŭ doŭžyłasia kala miesiaca. Niekalki sutak — heta mieła vyrašalny vyjhryš. Nieviadoma, jakaja dola vyratavanych ukrainskich žyćciaŭ za košt tych biełarusaŭ, jakija paškodzili čyhunačnuju sistemu i zapuścili rasijskija vajskovyja hruzy ŭ abychod. A ja skažu, što jana vielmi vialikaja».
U kancy jon jašče raz admysłova źviarnuŭsia da ŭkraincaŭ, jakija nie razumiejuć, jak biełarusy prapuścili rasijskija vojski praz svaju terytoryju.
«Biełarusy sapraŭdy znachodziacca ŭ takoj ža situacyi, jak našy na akupavanych terytoryjach. Vy ž nie zaklikajecie našych da masavaha paŭstańnia, razumiejučy, što heta niemahčyma dla zvyčajnaha čałavieka — zmahacca na akupavanych terytoryjach. Heta mohuć zrabić tolki śpiecyjalna padrychtavanyja ludzi, ź dziaržaŭnaj padtrymkaj, jakuju my dajem našym partyzanam, a ŭ Biełarusi heta — nievyrašalnaja zadača pakul jašče. Im niama adkul uziać hetuju padtrymku.
Tamu jašče raz kažu, biełaruskaje pytańnie — heta adna z hałoŭnych našych pamyłak na praciahu hetaj vajny», — jašče raz paŭtaryŭ svoj pačatkovy tezis Alaksiej Arastovič.
Kamientary