Zatrymanyja žurnalisty Alaksandr Łyčaŭka i Śniažana Inaniec, imavierna, na Vaładarcy
Praz tydzień paśla zatrymańnia sužencaŭ-žurnalistaŭ Alaksandra Łyčaŭki i Śniažany Inaniec ich siabram udałosia daviedacca, što, miarkujučy pa ŭsim, jany znachodziacca ŭ staličnym SIZA №1 na Vaładarskaha. Im inkryminujuć užo sumna viadomy artykuł Kryminalnaha kodeksa za «dziejańni, jakija hruba parušajuć hramadski paradak» (art. 342), piša BAŽ.
Pra zatrymańnie ŭ Minsku sužencaŭ Alaksandra Łyčaŭki i Śniažany Inaniec stała viadoma 6 kastryčnika. Na nastupny dzień horšyja padazreńni adnosna taho, što suviaź ź imi źnikła nievypadkova, paćvierdzilisia: u adnym z telehram-kanałaŭ, blizkim da HUBAZiK źjaviłasia «pakajannaje videa». U kadry muž i žonka vymušana kažuć, što, byli padpisanyja na «destruktyŭnyja kanały», u žniŭni 2020 hoda ŭdzielničali ŭ masavych akcyjach pratestu.
Siabry zatrymanych žurnalistaŭ u razmovie sa słužbaj manitorynhu BAŽ padzialilisia, što abodvuch vinavaciać pavodle častki 1 artykuła 342 Kryminalnaha kodeksa — «arhanizacyja hrupavych dziejańniaŭ, jakija hruba parušajuć hramadski paradak».
Sankcyja za «złačynstva» praduhledžvaje aryšt albo abmiežavańnie voli na termin ad 2 da 5 hadoŭ, albo pazbaŭleńnie voli na termin da 4 hadoŭ.
Alaksandr Łyčaŭka supracoŭničaŭ z vydańniem The Village, zachaplaŭsia krajaznaŭčaj žurnalistykaj. Śniažana Inaniec pracavała ŭ redakcyi Onliner.
Na siońnia ŭ źniavoleńni znachodziacca 33 supracoŭniki miedyja.
Stała viadoma pra śmierć 22-hadovaha chłopca, jakoha asudzili pa palityčnaj kryminałcy2
Kamientary