Duda jak karaleŭski budzilnik. Niezvyčajnaja tradycyja brytanskich manarchaŭ, jakuju praciahnuŭ Karł III
Dla bolšaści ludziej mieładyčnyja, ale davoli śpiecyfičnyja huki dudy, — mahčyma, nie najlepšy sposab pačać dzień. Ale dla novaha brytanskaha karala Karła III, jak i dla mnohich jaho papiarednikaŭ na brytanskim tronie, — heta častka šmatviakovaha ranišniaha rytuału, piša Bi-bi-si.
Kožny dzień a 9 ranicy dudar na praciahu 15 chvilin hraje padborku miełodyj pad aknom manarcha, dzie b toj ni znachodziŭsia. Hetuju tradycyju pačała karaleva Viktoryja 179 hadoŭ tamu, z tych časoŭ hanarovuju rolu karaleŭskaha dudara vykonvali ŭžo 17 čałaviek.
Ciapierašni dudar manarcha Poł Bierns u paniadziełak upieršyniu vystupiŭ u Kłarens-chaŭsie — rezidencyi Karła III pobač z Bukinhiemskim pałacam, dzie karol žyŭ da karanacyi (i pakul nie śpiašajecca pierajazdžać).
Bierns, vajenny muzykant z Karaleŭskaha pałka Šatłandyi, vykanaŭ rytuał pry poŭnym paradzie: na im siarod inšaha byli zialonyja škarpetki — u ton tartana-šatłandki. Padčas vykanańnia hetaj ni z čym nie paraŭnalnaj muzyki jon maršyravaŭ u sadzie pobač z Kłarens-chaŭsam.
Štodzionnaje vystupleńnie padzielena na dźvie siesii pa siem chvilin kožnaja. Pamiž imi patrabujecca chvilina pierapynku, kab pieranaładzić tradycyjny šatłandski instrumient.
His Majesty's Pipe Major played for the first time in the Clarence House garden this morning, as The King woke up in residence.
The position was created by Queen Victoria in 1843, and Queen Elizabeth enjoyed the special tradition following her Accession to the Throne in 1952. pic.twitter.com/FuquIbBe8q
Zajzdrosnaja rola
Karaleŭski dudar — heta vielmi prestyžnaja rola, jakuju ličać adnoj z samych zajzdrosnych siarod prafiesijnych dudaroŭ. Čałaviek, jakomu dastałasia hetaja praca, źjaŭlajecca adzinym, chto nie naležyć da karaleŭskaj siamji, ale maje prava nasić tartan «Bałmarał».
Jaho funkcyi nie abmiažoŭvajucca tolki ihroj na dudzie: karaleŭski dudar časta adkazvaje za sustreču ludziej na roznych aficyjnych mierapryjemstvach da taho, jak jany buduć pradstaŭleny manarchu.
I, viadoma ž, Bierns apynuŭsia ŭ centry ŭvahi ŭsiaho śvietu, kali vykanaŭ pachavalnuju pieśniu «Sleep, Dearie, Sleep» u Vestminsterskim abactvie padčas pachavańnia karalevy Lizaviety II u vieraśni.
Žyćcio pry dvary
Niezvyčajny karaleŭski «budzilnik» upieršyniu zapracavaŭ u časy praŭleńnia karalevy Viktoryi: jana prydumała hety rytuał u 1843 hodzie.
Dudary (pakul imi byli tolki mužčyny) stanoviacca prydvornymi i žyvuć u Bukinhiemskim pałacy. Adnak jany iduć za manarcham, kudy b jon ci jana nie adpraŭlalisia.
Skot Mietvien, jaki słužyŭ manaršym dudarom z 2015 pa 2019 hod, raspaviadaŭ, što na hetaj pracy jon «raptam apynuŭsia ŭ samym blizkim kole karaleŭskaj siamji». Pa słovach Mietviena, karaleva Lizavieta II zapeŭnivała jaho ŭ svajoj lubovi da hukaŭ dudy i dała jamu mianušku Pajps (ad słova «duda», heta značyć «bagpipes»).
Pakul nie jasna, ci budzie jaho pierajemnik major Bierns sapraŭdy budzić novaha manarcha a 9 ranicy. Sprava ŭ tym, što, pavodle źviestak presy, jašče budučy pryncam Uelskim, Karł lubiŭ ustavać rana — i prystupać da svaich abaviazkaŭ da 09:00.
Ciapier čytajuć
«Jany čamuści dumajuć, što ich zaraz zhvałciać». Prapahanda kinułasia tušyć abureńnie biełarusaŭ 150 tysiačami pakistancaŭ20
Kamientary