Kaŭnaskaje adździaleńnie Departamienta kulturnaj spadčyny paviedamiła pra rasśledavańnie historyi vykinutych u śmiećcievy kantejnier navukovych vydańniaŭ pačatku XIX stahodździa, siarod ich — litaratura ŭniviersitetaŭ mižvajennaj Litvy. Budaŭničy kantejnier sa staradaŭnimi knihami byŭ znojdzieny kala adnaho ź internataŭ Litoŭskaha ŭniviersiteta miedycynskich navuk. Nieabyjakavyja hramadzianie źviarnulisia ŭ Departamient kulturnaj spadčyny i ŭ palicyju, paviedamlaje Delfi.lt.
«My atrymali paviedamleńnie ab vykinutych u kantejnier knihach XVIII-XIX stst., adrazu ž pajechali, kab ich ahledzieć. Na žal, da našaha pryjezdu knihi ŭžo byli źniščany. U adnu kuču byli zvalenyja vokładki, u inšaj lažali błoki spresavanych knih. Bolšaja častka źniščanych knih — pieryjadyčnyja vydańni pačatku XX st., vydadzienyja na anhlijskaj, polskaj, niamieckaj i francuzskaj movach. Heta vydańni pa miedycynie i farmaceŭtycy. Častka knih była vydadziena ŭ XIX st., bolš starych vydańniaŭ (naprykład, XVIII st.) nie vyjavili», — zaŭvažyli pradstaŭniki Departamienta.
Amal usie vydańni, pa słovach śpiecyjalistaŭ, — heta knihi ź mižvajennych biblijatek univiersiteta imia Vitaŭta Vialikaha, Stefana Batoryja (ciapier — Vilenski ŭniviersitet) i inšych ustanoŭ Vilni i Kaŭnasa taho pieryjadu.
«Ustanavić kulturnuju kaštoŭnaść źniščanych vydańniaŭ składana, ale niama sumnieńniaŭ u tym, što jany ŭjaŭlali cikavaść užo tym, što ŭ ich byli štampy ŭniviersitetaŭ taho pieryjadu, heta častka historyi hetych navučalnych ustanoŭ», — skazana na staroncy Departamienta ŭ fejsbuku.
Vypadkova acaleła kniha Hustava Haŭhiera (Gustav Gauger «Repetorium Pharmazie und praktische chemie in Rusland») 1845 h. U joj možna daviedacca pra apteki, jakija ŭ toj čas dziejničali na terytoryi Litvy.
«Naprykład, uładalnikam apteki ŭ Retavasie byŭ sam hraf Ahinski, a va Ukmierhie była asobnaja apteka jaŭrejskaj abščyny. Na ščaście, heta kniha ź cikavymi histaryčnymi danymi acaleła i budzie pieradadziena ŭ muziej dla dalejšaha analizu. Pačata rasśledavańnie pa fakcie źniščeńnia, vierahodna, kaštoŭnych abjektaŭ kultury», — paviedamili pradstaŭniki Departamienta.
Stała viadoma pra śmierć 22-hadovaha chłopca, jakoha asudzili pa palityčnaj kryminałcy2
Kamientary