Rasija pačała padrychtoŭku evakuacyi Armianska — horada na poŭnačy Kryma
Aficyjnaha paviedamleńnia pra evakuacyju nie było, ale fakt staŭ viadomy rasijskim vajenkaram.
Pra padrychtoŭku evakuacyi Armianska, samaha paŭnočnaha horada Kryma, aficyjnaj infarmacyi niama, ale pra heta paviedamlajuć rasijskija vajenkary.
«Rychtujucca da vyvazu administracyjnyja i vajskovyja abjekty. Armiansk moža apynucca ŭ zonie dziejańnia chajmarsaŭ, — piša vajenkar Raman Sapańkoŭ, jaki maje šmat krynic u pryfrantavoj zonie. — Skadoŭsk užo ŭ zonie paražeńnia. Taksama pobač zavod «Tytan» [najbolšy vytvorca dyjaksidu tytanu]. Taksama ŭ rajonie Armianska vialikaja kolkaść vajskovych abjektaŭ».
Miarkujučy pa paviedamleńniach, havorka nie idzie pra vyvaz ludziej, a pra padrychtoŭku da vyvazu ŭsiaho samaha kaštoŭnaha ŭ vypadku praryvu ŭkrainskaj armijaj linii frontu pad Zaparožžam i Danieckam.
Armiansk — horad, jaki razrośsia vakoł zavoda «Tytan» na miescy daŭniaha armiana-hrečaskaha pasielišča. Da akupacyi Kryma Rasijaj u 2014 hodzie ŭ horadzie žyło 22 tysiačy čałaviek, na siońnia — kala 20 tysiač čałaviek.
Armiansk i Džankoj, transpartny vuzieł na paŭdniovy ŭschod ad Armianska, — dźvie bramy na Krymski paŭvostraŭ.
Kiraŭnictva Ukrainy zajaŭlała pra namier vyzvalić usiu terytoryju krainy ŭ miežach da 2014 hoda, ale ŭ toj ža čas hatovaje na pieramovy ŭ vypadku kali Rasija adviadzie vojski na pazicyi pa stanie na 24 lutaha 2022 hoda.
Kamientary