U Rasii pałkoŭnika Hienštaba aryštavali za chabar u vyhladzie pralnaj mašyny
Pałkoŭnik Miartviščaŭ zapatrabavaŭ ad vajenkama chabar u vyhladzie pralnaj mašyny nie tańniej za 70 tysiač rasijskich rubloŭ (kala 1100 dalaraŭ) za pravierku vosieńskaha pryzyvu, ličyć śledstva. Toj pryznaŭ svaju vinu. Jaho źmiaścili pad chatni aryšt na dva miesiacy, piša «Kommiersant».
U Maskvie 235-y harnizonny vajskovy sud adpraviŭ pad chatni aryšt na dva miesiacy adkaznaha za pryzyŭ na vajskovuju słužbu supracoŭnika Hałoŭnaha arhanizacyjna-mabilizacyjnaha ŭpraŭleńnia Hienštaba pałkoŭnika Ivana Miartviščava.
Jak piša vydańnie, u suviazi z raspačatym ź listapada pryzyvam na terminovuju słužbu Miartviščaŭ płanavaŭ pravieryć abjadnany vajskovy kamisaryjat, u jaki ŭvachodzić šerah mikrarajonaŭ Zachodniaj administracyjnaj akruhi Maskvy.
Za tydzień da pravierki pałkoŭnik źviazaŭsia z vajskovym kamisaram, paviedamiŭ jamu pra budučuju pravierku, pakazaŭ, što, pavodle jaho infarmacyi, situacyja z naboram pryzyŭnikoŭ u vajenkamacie drennaja, i paabiacaŭ pryčapicca navat pry najaŭnaści narmalnaha stanu dakumientacyi. Miartviščaŭ, pa słovach krynicy haziety, taksama adznačyŭ, što takaja situacyja niehatyŭna adabjecca na reputacyi kiraŭnictva vajenkamata i karjery vajenkama, i prapanavaŭ vyrašyć prablemy za košt kupli dla jaho pralnaj mašyny koštam nie mienš za 70 tys. rubloŭ.
Vajenkam u hutarcy z pałkoŭnikam pahadziŭsia, adnak źviarnuŭsia z zajavaj ab vymahańni ŭ Departamient vajskovaj kontrraźviedki FSB, jaki ŭziaŭ pad kantrol dalejšuju razmovu ź Miartviščavym ab vybary pralnaj mašyny. Supracoŭniki viedamstva zatrymali jaho pry atrymańni pryłady.
Śledčy kamitet zavioŭ u dačynieńni da Miartviščava kryminalnuju spravu pa č. 5 art. 290 (atrymańnie chabaru, spałučanaje z vymahańniem). Jaho dastavili na dopyt. Pałkoŭnik całkam pryznaŭ svaju vinu.
Kamientary