Pradprymalnaja haradzienka padmanuła dzieviać čałaviek, u tym liku svajho syna
Hrodzienskim mižrajonnym adździełam Śledčaha kamiteta rasśledujecca kryminalnaja sprava ab machlarstvie ŭ bujnym pamiery ŭ dačynieńni da 43-hadovaj žycharki Hrodna.
Pavodle śledstva, z kastryčnika 2020 hoda pa krasavik 2022 hoda žančyna pad roznymi padstavami prasiła znajomych pazyčać hrošy i afarmlać u jaje intaresach kredyty na nabyćcio techniki.
Jana čaściej za ŭsio kazała, što joj nieabchodnyja srodki dla raźvićcia biznesu albo technika ŭ padarunak svaim dzieciam. U kožnym vypadku zapeŭnivała paciarpiełych, što vypłacić usio ŭ bližejšy čas. Pryčym dla stvareńnia bačnaści vykanańnia abaviazacielstvaŭ jana ŭnosiła niekatoryja sumy dla pahašeńnia zapazyčanaści pa kredytach.
Ustanoŭlena dzieviać paciarpiełych. Ahulnaja suma škody skłała 45 tysiač rubloŭ.
Śledstvam ustanoŭlena, što adnym z paciarpiełych źjaŭlajecca 19-hadovy syn abvinavačanaj. Žančyna paabiacała synu kupić televizar, adnak skazała, što nie moža aformić kredyt na svajo imia, bo ŭ jaje ŭžo majucca kredyty, i bank prosta joj admović. Maci paprasiła syna aformić kuplu na jaho, pry hetym abaviazałasia vypłačvać unioski samastojna. Małady čałaviek pahadziŭsia. Paśla afarmleńnia kredytu žančyna ŭ toj ža dzień pradała techniku.
Dziejańni žančyny kvalifikavanyja pa čč. 2, 3 art. 209 (machlarstva, ździejśnienaje paŭtorna, u bujnym pamiery) Kryminalnaha kodeksa. Raniej da kryminalnaj adkaznaści žančyna nie pryciahvałasia.
Kamientary