Prakuror zaprasiŭ ad 14 da 20 hadoŭ kałonii fihurantam «spravy AHSB»
U žniŭni minułaha hoda Viarchoŭny sud pryznaŭ «Atrady hramadzianskaj samaabarony Biełarusi» terarystyčnaj arhanizacyjaj.
U Minskim sudzie na pasiadžeńni pa «spravie AHSB» prakuror zaprasiŭ usim fihurantam ad 14 da 20 hadoŭ pazbaŭleńnia voli.
Prakuror zaprasiŭ pryznać Natallu Maćviejevu vinavataj i pryznačyć joj 14 hadoŭ pazbaŭleńnia voli ŭ papraŭčaj kałonii ahulnaha režymu, a taksama štraf u pamiery 400 bazavych vieličyń. Mienavita Maćviejevu dziaržabvinavačańnie ličyć arhanizataram złačynstvaŭ. Prakuror paprasiŭ sud uličyć u jakaści źmiakčalnaj akaličnaści pryznańnie viny, a taksama vykanańnie Maćviejevaj umoŭ dasudovaha pahadnieńnia sa śledstvam.
Dla Vadzima Huleviča prakuror zaprasiŭ 18 hadoŭ kałonii ŭzmocnienaha režymu, a taksama štraf u pamiery 600 bazavych vieličyń.
Dla Kiryła Ašurka prakuror zaprasiŭ da 15 hadoŭ kałonii ŭzmocnienaha režymu i štraf u pamiery 400 bazavych vieličyń.
Alaksieju Hłotavu zaprasili pryznačyć 20 hadoŭ pazbaŭleńnia voli z adbyvańniem u kałonii ŭzmocnienaha režymu i štraf u 700 bazavych vieličyń.
Taki ž prysud prakuror zaprasiŭ dla Dźmitryja Sasnoŭskaha.
Kožnamu ź ich vystaŭlenyja abvinavačańni ŭ sumie pa dziesiaci artykułach. Siarod ich — udzieł u arhanizacyi, stvoranaj dla ažyćciaŭleńnia terarystyčnaj dziejnaści (častka 2 artykuła 290-4 KK); padrychtoŭka i saŭdzielnictva ŭ akcie teraryzmu i ŭdzieł u akcie teraryzmu (častka 1 artykuła 13 i častka 2 artykuła 289 KK, častka 6 artykuła 16 i častka 2 artykuła 289, častka 2 artykuła 289 KK); zakliki da dziejańniaŭ suprać nacbiaśpieki (častka 3 artykuła 361 KK); raspalvańnie sacyjalnaj varožaści abo varažniečy (častka 1 artykuła 130 KK).
Kamientary