U Viciebsku adbyłasia kansiekracyja novaha kaścioła + fotarepartaž
Upieršyniu za 124 hady.
U Viciebsku 10 kastryčnika, upieršyniu za 124 hady, byŭ aśviečany novy kaścioł — chrama Jezusa Miłasernaha pa vulicy Voinaŭ Internacyjanalistaŭ.
Budynak maje formu kryža vyšynioj 32 m, daŭžynioj 28 m i šyrynioj 18 m. Na ŭračystaści prysutničali śviatary ź Biełarusi, Ukrainy, Polščy, Litvy, Hiermanii, Francyi, Anhlii, ZŠA, Indyi, Čechii, pradstaŭniki miascovych dziaržaŭnych uład, dabračynnaha fondu «Karytas» z Čechii, Aŭstryi i Polščy, a taksama šmatlikija vierniki.
Na pačatku kluč ad chrama byŭ uručany pradstaŭniku Śviatoha Ajca, i dźviery kaścioła adčynilisia dla narodu Božaha. Śviatoju Imšu ŭznačaliŭ Apostalski nuncyj u Biełarusi arcybiskup Marcin Vidavič.
Uračystamu momantu kansiekracyi kaścioła papiaredničała liturhija słova. Hamiliju pramoviŭ biskup Hrodzienski Alaksandr Kaškievič. «Addadzim va ŭłasnaść Bohu hetuju śviatyniu», — zaklikaŭ ijerarch i pry hetym adznačyŭ, što novapabudavany chram źjaŭlajecca «viancom vialikich supolnych namahańniaŭ biskupa, probašča parafii, architektaraŭ, budaŭnikoŭ i achviaradaŭcaŭ».
Na ŭračystaści pa zaprašeńni biskupa Uładzisłava Blina prysutničaŭ biskup Maryjadas Devadas Ambrose z dalokaj Indyi. Jon padaryŭ kožnamu ijerarchu šal — elemient nacyjanalnaha indyjskaha adzieńnia. Na kansekracyi, miž inšym, prysutničali studenty ź Indyi, navučency Viciebskaha dziaržaŭnaha miedycynskaha univiersiteta, jakimi duchoŭna apiakujecca biskup Uładzisłaŭ Blin. Taksama novaj śviatyni pradstaŭnikami «Karytas» u Čechii ad imia kardynała Miłosłava Vłka, arcybiskupa Pražskaha, była pryniesiena ŭ dar fihura Dziciatka Jezus, Vaładara suśvietu, a archimandryt Siarhiej Hajek, Apostalski Vizitatar dla hreka‑katolikaŭ Biełarusi padaryŭ ładan — simvał malitvy.
Kamientary