Biełaruś prapanuje MVF «iržavaje žaleza»

Staŭ viadomy papiaredni śpis pradpryjemstvaŭ, jakija biełaruskija ŭłady hatovyja vystavić u nastupnym hodzie na adkrytyja tarhi ŭ adpaviednaści z umovami Mižnarodnaha valutnaha fondu (MVF).

U papiaredni śpis ŭniesieny AAT «Minski padšypnikavy zavod», AAT «Minski zavod pienistych vin», AAT «Babrujski mašynabudaŭničy zavod», AAT «Čyrvony mazyranin», a taksama AAT «Turystyčny kompleks» Brest — Inturyst».

Pa mierkach biełaruskaj ekanomiki, usie jany siarednija pradpryjemstvy, z hledzišča dziaržaŭnych intaresaŭ stratehičnym źjaŭlajecca tolki MPZ. Prynamsi, pa čatyroch ź ich byli raniej prajekty pa prodažy ich kantrolnych pakietaŭ inviestaram, ale jany z roznych pryčyn nie byli realizavanyja.

Pradpryjemstvy, što ŭvajšli ŭ hety pieralik, ciažka nazvać «najbujniejšymi» i tym bolš adnieści da «familnaha srebra».

Chutčej, heta «familnaje žaleza», jakoje na praciahu niekalkich hadoŭ ŭłady biespaśpiachova sprabujuć pradać.

Moža być tamu biełaruski bok vyrašyŭ prajavić dadatkovuju inicyjatyvu: zamiest piaci pradpryjemstvaŭ, na jakich nastajaŭ MVF, pieralik chutčej za ŭsio budzie pašyrany da siami abjektaŭ.

Nahadajem, što pa damoŭlenaści ab kredycie «stend‑baj» załoham praciahu supracoŭnictva MVF źjaŭlajecca vykanańnie Biełaruśsiu šerahu kantrolnych pakazčykaŭ. Pa vynikach pieršaj pravierki, praviedzienaj misijaj MVF u krasaviku‑mai, da vyznačanych u śniežni 2008 hoda kantrolnym pakazčykach dabaviłasia jašče niekalki. I ŭ ich liku — aktyvizacyja biełaruskim kiraŭnictvam namahańniaŭ u halinie pryvatyzacyi.

Kankretna ŭrad Biełarusi ŭziaŭ na siabie abaviazacielstvy stvaryć Ahienctva pa pryvatyzacyi. Jaho zadačaj, jak heta bačycca MVF, pavinna stać «nadańnie impulsu vykanańniu raspracavanaj aficyjnymi orhanami prahramy pryvatyzacyi šlacham pavyšeńnia statusu i ŭdakładnieńnia paŭnamoctvaŭ i mandata padraździaleńniaŭ, adkaznych za pryvatyzacyju».

U adpaviednaści z ŭzhodnienych ź biełaruskim uradam i Nacbankam dakumientam ŭžo da vieraśnia hetaha hoda Saŭmin pry techničnaj padtrymcy Suśvietnaha banka pavinien byŭ nakiravać u parłamient prajekt zakona «Ab pryvatyzacyi». Taksama paralelna ŭ hetyja ž terminy ŭrad abaviazaŭsia padrychtavać prajekt ukaza prezidenta ab stvareńni Ahienctva pa pryvatyzacyi, na jakoje i mierkavałasia uskłaści asnoŭnuju zadaču pa padrychtoŭcy biełaruskich zavodaŭ i fabryk da źmieny ŭłaśnika.

Zhodna z dakumientam, padpisanym MVF i biełaruskimi ŭładami, paśla svajho stvareńnia Ahienctva pa pryvatyzacyi da listapada na padstavie kansultacyj z Suśvietnym bankam pavinna było adabrać «piać najbujniejšych dziaržaŭnych pradpryjemstvaŭ u jakaści kandydataŭ na pryvatyzacyju». Nastupnym krokam źjaŭlajecca pryciahnieńnie viadomaha finansavaha kansultanta, i ŭžo ŭ lutym 2010 kantrolnyja pakiety hetych piaci pradpryjemstvach pavinny być vystaŭleny dla prodažu «na adkrytych mižnarodnych prazrystych i kankurentnych tarhach».

Užo vidavočna, što praces padrychtoŭki adpaviednaj narmatyŭnaj bazy dla pryvatyzacyi, stvareńnia samaha Ahienctva pa pryvatyzacyi krychu zaciahnuŭsia. Sprava ŭ tym, što ź piaci pradpryjemstvaŭ nivodnaje nie padpadaje pad vyznačeńnie «najbujniejšaje» i, treba mierkavać, u cełym pad bačańnie tym ža MVF pracesaŭ pryvatyzacyi ŭ Biełarusi.

Niekalki tydniaŭ tamu ŭ Litvie Alaksandr Łukašenka prapanavaŭ litoŭcam inviestavać u «Naftan» 3 młrd dalaraŭ. Miarkujučy pa ŭsim, prodaž «familnaha srebra» budzie znachodzicca ŭsio‑taki nie ŭ kampietencyi Ahienctva pa pryvatyzacyi, navat kali jano budzie stvorana.

• 0
• 0
• 0
• 0
• 0
• 0
• 0
• 0