Piać urokaŭ dla NATA: Łondanski RUSI praanalizavaŭ pačatkovuju fazu vajny
Łondanski vajenna-daśledčy instytut RUSI apublikavaŭ spravazdaču ab papiarednich vynikach i ŭrokach pieršaj fazy rasijska-ŭkrainskaj vajny (pa lipień 2022 hoda). Saaŭtary spravazdačy — eks-kiraŭnik RNBA Ukrainy Alaksandr Daniluk i były kamandujučy desantna-šturmavymi vojskami Ukrainy Michaił Zabrodski, jaje pierakazvaje The Bell.
Rasija, pa źviestkach instytuta, płanavała, što aktyŭnaja faza śpiecapieracyi va Ukrainie budzie doŭžycca 10 dzion, a akupacyja z metaj dalejšaj anieksii zavieršycca da žniŭnia. Dla hetaha płanavaŭsia vokamhnienny zachop Kijeva z adpaviednaj kampanijaj dezynfarmacyi pa adciahnieńni siłaŭ USU ad stalicy krainy.
U samym pačatku US Rasii ŭdałosia stvaryć 12-razovuju pieravahu ŭ žyvoj sile i ŭzbrajeńni na klučavych napramkach. Sakretnaść na apieratyŭnym uzroŭni była dasiahnutaja, ale akazałasia praźmiernaj, što vyliłasia ŭ niepadrychtavanaść na taktyčnym uzroŭni pry adsutnaści zapasnych płanaŭ.
Adrazu paśla taho, jak US Rasii zahruźli ŭ kanflikcie, heta dazvoliła USU («za košt stojkaści, a nie resursaŭ») pačać dziejańni na vybivańnie i źniasileńnie. Bajazdolnaść US Rasii ŭ cełym vyjaviłasia značna nižejšaj za bolšaść zachodnich acenak, pry hetym rasijskija kompleksy ŭzbrajeńniaŭ akazalisia ŭ asnoŭnym efiektyŭnymi.
Aŭtary vydzielili piać kirunkaŭ «pracy nad pamyłkami» US Rasii, uklučajučy pierahlad kancepcyi bataljonnych taktyčnych hrup (BTH) i «kultury ašukanstva» pry dakładach navierch. Hałoŭnyja vajennyja vysnovy.
- U sučasnaj vajnie niama tyłu, u tym liku dla srodkaŭ zabieśpiačeńnia vysokaha ŭzroŭniu (arsienały, ramontnyja zavody). Paražeńnie nanosicca na ŭsiu apieratyŭnuju hłybiniu — u pieršyja 48 hadzin US Rasii parazili 75% klučavych stacyjanarnych vajennych celaŭ. USU paźbiehli niepapraŭnych strat tolki za košt dezynfarmacyi i razhrupavańnia.
- U sučasnaj vajnie zastalisia całkam nieabchodnymi vialikija najaŭnyja zapasy srodkaŭ paražeńnia i reziervy mahutnaściej dla ich vytvorčaści. Ciapier z krain NATA imi vałodajuć tolki ZŠA.
- Bieśpiłotniki pieratvarylisia ŭ vyrašalny faktar vajny i pavinny być štatnaj zbrojaj na ŭsich uzroŭniach. Jany ŭ pieravažnaj bolšaści pavinny być tannymi i masavymi, pakolki ŭzrovień ich strat u apieracyi dasiahaje 90%. Prablema vyjaŭleńnia i padaŭleńnia varožych bieśpiłotnikaŭ adekvatna ŭsio jašče nie vyrašana.
- Vysokadakładnaja zbroja pavinna prymianiacca ekanomna i vybiralna, zvyčajnyja ŭzbrajeńni — zabiaśpiečvać «akno» dla prymianieńnia vysokadakładnych.
- Maskiroŭka na poli boju ad sučasnaha kompleksu srodkaŭ raźviedki i naviadzieńnia vielmi abciažaranaja. Palavyja ŭmacavańni nie abaraniajuć ad sučasnych srodkaŭ paražeńnia, asabliva vysokadakładnych. Praktyčna adzinym sposabam abarony zastałosia maksimalnaje razhrupavańnie ŭ spałučeńni z mabilnaściu, jakija dazvalajuć apieratyŭna źbirać udarnaje złučeńnie tolki na pierśpiektyŭnym učastku i tolki na čas udaru.
Vajennaja pieramoha Ukrainy mahčymaja pry adekvatnaj padtrymcy Zachadu, ale budzie vielmi ciažkaj, reziumuje RUSI.
Piać faktaŭ pra Natallu Piatkievič — samuju ŭpłyvovuju čynoŭnicu Biełarusi da źjaŭleńnia Kačanavaj i Ejsmant26
Kamientary