Jak stała viadoma «Našaj Nivie», daŭni partnior «Biełaruśkalija», niamieckaja kampanija Eickhoff, nie vykonvaje pracy pa harantyjnym absłuhoŭvańni horna-techničnaha abstalavańnia. Zhornutaja dziejnaść pradstaŭnictva zamiežnaha pradpryjemstva.
Były pracaŭnik «Biełaruśkalija» i siabra niezaležnaha prafsajuza harniakoŭ raskazaŭ «Našaj Nivie», što «AjkchofBieł» zharnuŭ dziejnaść sa śniežnia 2021 hoda, paśla taho jak nabyli moc amierykanskija sankcyi suprać «Biełaruśkalija» i Biełaruskaj kalijnaj kampanii. Pavodle jaho krynicaŭ na pradpryjemstvie, Eickhoff bolš nie supracoŭničaje z «Biełaruśkalijem».
Jurydyčna biełaruskaje pradstaŭnictva Eickhoff zastajecca dziejnym. Zarehistravanaje jano było ŭ 2008 hodzie. Na sajcie Eickhoff u raździele ab mižnarodnym supracoŭnictvie kampanii nie paznačana, što jaje ofis isnuje ŭ Biełarusi.
Eickhoff i biełaruski pratest 2020 hoda
Siamiejnaja kampanija Eickhoff vyrablaje abstalavańnie dla hornazdabyŭnoj vytvorčaści. Hałaŭny ofis mieścicca ŭ Bochumie. Kampanija maje pradstaŭnictvy ŭ Polščy, Aŭstralii, Paŭdniovaj Afrycy, Kitai i ŭ samoj Hiermanii. Da vajny 2022-ha byli dva pradstaŭnictvy ŭ Rasii — u Maskvie i Kiemieraŭskaj vobłaści. Ciapier jany na sajcie kampanii nie zhadvajucca, ale ŭ raździele «absłuhoŭvańnie» na karcie paznačanyja, hetak ža, jak i Biełaruś.
U 2020 hodzie Eickhoff praihnaravała zakliki niamieckich prafsajuzaŭ prajavić salidarnaść z udzielnikami strajku na «Biełaruśkalii», jakija trapili pad pieraśled.
«Eickhoff ažyćciaŭlaje pastaŭki na «Biełaruśkalij» z 1975 hoda niezaležna ad palityčnaj situacyi ŭ krainie», — zajaŭlali tady ŭ Eickhoff.
Paźniej niamieckaja kampanija svaju pazicyju patłumačyła tym, što pierapynak u pastaŭkach abstalavańnia vialikaha ŭpłyvu na «Biełaruśkalij» nie akaža, a tolki niehatyŭna adabjecca na biaśpiecy biełaruskich šachcioraŭ i ich dachodach.
U nastupnyja dva hady supracoŭnictva niamieckaj kampanii z «Biełaruśkalijem» u dziaržaŭnaj i niezaležnaj presie nie zhadvałasia.
Za hety čas byli zvolnienyja šachciory, jakija ŭdzielničali ŭ strajku. Režym Łukašenki zabaraniŭ dziejnaść niezaležnaha prafsajuza harniakoŭ.
Staršyniu arhanizacyi Alaksandra Mišuka kinuli na 2,5 hoda ŭ kałoniju za «ŭdzieł u hrupavych dziejańniach, jakija hruba parušajuć hramadski paradak». Jamu ŭ vinu pastavili vystup pierad pracoŭnymi pradpryjemstva 17 žniŭnia 2020 hoda.
«Biełaruśkalij» i ŭpłyŭ sankcyj
Adkrytaje akcyjaniernaje tavarystva «Biełaruśkalij» — adzin z najbolšych vytvorcaŭ i eksparcioraŭ kalijnych uhnajeńniaŭ u śviecie. Pavodle Mižnarodnaj asacyjacyi ŭhnajeńniaŭ, na jaho dolu da sankcyj prypadała piataja častka suśvietnaha abjomu vytvorčaści kalijnych uhnajeńniaŭ.
Pradaje pradukcyju «Biełaruśkalija» akcyjaniernaje tavarystva «Biełaruskaja kalijnaja kampanija».
«Biełaruśkalij» — adna z asnoŭnych krynic valutnych pastupleńniaŭ u biudžet Biełarusi. Ekspart kalijnych uhnajeńniaŭ u 2020 hodzie skłaŭ $2,4 młrd. Heta kala 8 pracentaŭ ahulnaha abjomu biełaruskaha ekspartu, abo kala 4 pracentaŭ VUP krainy.
Pa nabyćci mocy amierykanskich sankcyj Litoŭskaja čyhunka admoviłasia transpartavać uhnajeńni «Biełaruśkalija». Z 1 krasavika 2022 hoda supracoŭnictva z «Biełaruśkalijem» spyniła narviežskaja kampanija Yara, jakaja zakuplała ŭ siarednim 15% ad ahulnaha abjomu biełaruskaha kaliju.
«Biełaruśkalij» znachodzić kampanii, jakija ryzykujuć i kuplajuć pradukcyju, ale značna tańniej
Ekśpiertka centra ekanamičnych daśledavańniaŭ BEROC Nastaśsia Łuzhina kaža, što acanić nastupstvy sankcyj suprać «Biełaruśkalija» składana, bo dostup da infarmacyi pra abjomy i vyručku ad prodažu jaho pradukcyi zrabili abmiežavanym.
Pa jaje słovach, u spakojnyja časy pradpryjemstva pradavała kalijnych uhnajeńniaŭ na bolš čym 2,5 miljarda dalaraŭ.
Najbolš adčuvalnymi dla «Biełaruśkalija» stali sankcyi, uviedzienyja sioleta, bo jany ciapier raspaŭsiudžvajucca ŭ cełym na pradukcyju, a nie na asobnyja jaje katehoryi. A kampanii, jakija navažacca kuplać biełaruski kalij, ryzykujuć trapić pad druhasnyja sankcyi.
Akramia taho, paśla straty dostupu da porta ŭ Litvie pradpryjemstva akazałasia ŭ niaprostaj situacyi i vymušana było znachodzić alternatyŭnyja kanały prodažu pradukcyi. Ciapier havorka idzie pra pastaŭku kaliju kupcam praz rasijskija party.
Ekśpiert zaŭvažaje: zychodziačy z dastupnaj infarmacyi, biełaruskija ŭhnajeńni mohuć pradavacca sa źnižkaj ad 30 da 50 pracentaŭ — heta bonus kupcu za ryzyku.
«Viadoma ž, isnuje stračanaja vyhada, bo ceny na ŭhnajeńni dachodzili da 550 dalaraŭ za adnu tonu. Kali hladzieć na danyja 2000 hoda, to tady ŭhnajeńni pradavali za 200 dalaraŭ. Kali dapuścić, što dyskont (źnižka) składaje 30—50 pracentaŭ, to pradpryjemstva, kali pradaje abjom 2000 hoda, maje takuju ž vyručku. Adnak abjomy, chutčej za ŭsio, skaracilisia», — miarkuje Łuzhina.
Pa jaje słovach, spynieńnie całkam prodažu biełaruskaha kaliju pryviadzie da rostu cen na suśvietnym rynku. Uletku košt uhnajeńniaŭ składaŭ 600 dalaraŭ za tonu i krychu źmienšyŭsia.
«Heta moža śviedčyć pra toje, što pastaŭki biełaruskaj pradukcyi iduć. Horš na rynku nie stanovicca dakładna, ale hetyja pastaŭki mohuć być u peŭnaj stupieni abmiežavanyja. Chutčej za ŭsio, «Biełaruśkalij» vykarystoŭvaje dempinh i za košt jaho ažyćciaŭlaje handal», — adznačaje ekśpiert.
Nastaśsia Łuzhina ličyć, što «Biełaruśkalij» znachodzić kampanii, jakija hatovyja mirycca z ryzykaj patrapić pad druhasnyja sankcyi i kuplajuć pradukcyju značna tańniej.
Čytajcie taksama:
«Sankcyi adčuli na ŭłasnaj skury». Rabotniki «Biełaruśkalija» raskazali pra situacyju na pradpryjemstvie
Try ź piaci rudaŭpraŭleńniaŭ u Salihorsku spynilisia, «Biełaruśkalij» upieršyniu biare kredyty na zarobki
Litoŭski sud kančatkova pryznaŭ, što damova «Biełaruśkalija» ź Litoŭskimi čyhunkami pahražała nacyjanalnaj biaśpiecy Litvy
«Naša Niva» — bastyjon biełaruščyny
PADTRYMAĆŽyvahłod pryznała rassyłku praz čat-bot «Sumlennych ludziej» karystalnikam u Biełarusi: Ale nie ŭ pracoŭny čas, paśla 18 hadzin12
Kamientary