Nacyjanalnaja zbornaja praviadzie 14 kastryčnika apošni matč adboračnaha turniru da čempijanatu śvietu — 2010. Samaje ž cikavaje budzie adbyvacca ŭ inšych hrupach.
Nacyjanalnaja zbornaja Biełarusi praviadzie 14 kastryčnika apošni matč adboračnaha turniru da čempijanatu śvietu — 2010.
Hulnia projdzie ŭ Łondanie, na znakamitym stadyjonie «Uembli». Pačatak a 22‑j pavodle minskaha času. Pramaja tranślacyja budzie vieścisia na BT.
Hod tamu ŭ Minsku anhličanie pieramahli - 3:1.
Z turnirnaha hledzišča siońniašni matč ničoha nie vyrašaje. Biełarusy — ci vyjhrajuć ci prajhrajuć — zastanucca na 4‑m miescy ŭ hrupie. Anhlija jašče miesiac tamu daterminova zavajavała pucioŭku na čempijanat śvietu.
Ale kali biełarusy vyjhrajuć, jany nabiaruć 16 bałaŭ (ciapier u našych 13 bałaŭ, čatyry pieramohi, adna ničyja, čatyry parazy), heta budzie naš najlepšy vynik u adboračnych cykłach.
U turniry da čempijanatu śvietu — 2002 biełarusy nabrali 15 bałaŭ, ale zaniali 3‑ie miesca, śledam za Polščaj i Ukrainaj. U adboračnym turniry da čempijanatu Jeŭropy — 2008 naša zbornaja taksama zaniała 4‑ie miesca, ale 13 bałaŭ nabrała ŭ 12 hulniach.
U sieradu ŭ našaj adboračnaj hrupie zbornaja Ukrainy ŭ haściach hulaje z Andoraj (pačatak u 18:30).Ukraincam, kab trapić u stykavyja matčy, dastatkova pieramohi. Taksama 14 kastryčnika zhulajuć Kazachstan i Charvatyja (18:30).
Turnirnaje stanovišča: Anhlija — 24, Ukraina — 18, Charvatyja — 17, Biełaruś — 13, Kazachstan — 6, Andora — 0.
***
Intryha ŭ Jeŭropie zachoŭvajecca ŭ 3‑j adboračnaj hrupie, dzie na 1‑ie miesca pretendujuć zbornyja Słavakii i Słavienii.
Turnirnaje stanovišča: Słavakija — 19, Słavienija — 17, Čechija — 15, Paŭnočnaja Irłandyja — 14, Polšča — 11, San‑Maryna — 0.
Słavaki ŭ haściach zhulajuć z Polščaj, a słaviency — z San‑Maryna.
***
U 2‑j adboračnaj hrupie šviejcarcam dastatkova doma nie prajhrać Izrailu, kab zaniać pieršaje miesca.
Šviejcaryja — 20, Hrecyja — 17, Izrail — 15, Łatvija — 14, Luksiemburh — 5, Małdova — 3.
14 kastryčnika: Šviejcaryja — Izrail, Hrecyja — Luksiemburh, Łatvija — Małdova.
***
Hałoŭnaja intryha 14 kastryčnika — heta Paŭdniovaamierykanskaja hrupa.
Pierad apošnim turam tut takoje stanovišča:
Brazilija, Parahvaj — pa 33, Čyli — 30, Arhientyna — 25, Uruhvaj — 24, Ekvador — 23, Vieniesueła — 21, Kałumbija — 20, Balivija — 15, Pieru — 10.
Brazilija, Pahahvaj, Čyli ŭžo zabiaśpiečyli sabie pucioŭki na suśvietnaje pieršynstvo.
Kamanda, što zojmie 4‑ie miesca, taksama braniruje pucioŭku napramuju, a voś kamanda, što zojmie 5‑ie miesca budzie hulać z kamandaj, jakaja finišuje 4‑j u turniry KONKAKAF (heta budzie abo Kosta‑Ryka, abo Handuras).
Intryha ŭ tym, što Arhientyna i Uruhvaj syjducca ŭ vočnym pajadynku (matč u Montevidea). Pryčym toj, chto prajhraje, moža naohuł zastacca biez stykavaha matču, jaho apiaredzić Ekvador, kali vyjhraje ŭ haściach u niematyvavanaj zbornaj Čyli.
***
Na čempijanatu śvietu pa futbole, što projdzie letam 2010 hoda, trapili ŭžo 19 zbornych:
PAR (jak arhanizatar),
Jeŭropa: Hałandyja, Anhlija, Ispanija, Niamieččyna, Danija, Italija, Sierbija. Dźvie kamandy vyznačacca ŭ sieradu, čatyry - praz stykavyja matčy ŭ listapadzie
Azija: Japonija, KNDR, Respublika Kareja, Aŭstralija.
Afryka: Hana, Kot DJIvuar (jašče try zbornyja vyznačacca ŭ apošnim tury 14 listapada),
Paŭdniovaja Amieryka: Brazilija, Parahvaj, Čyli.
Paŭnočnaja i Centralnaja Amieryka: ZŠA, Mieksika.
Najlepšaja kamanda Akijanii — zbornaja Novaj Ziełandyi — asprečvaje prava za pucioŭku z 5‑j kamandaj Azii — kamandaj Bachrejna.
Pieršy matč u Bachrejnie skončyŭsia ź likam 0:0. Matč u adkaz — praź miesiac.
Kamientary