Cichanoŭskaja da hadaviny Płoščy-2010: Usie my siońnia praciahvajem pracu tych, chto byŭ da nas

Śviatłana Cichanoŭskaja piša:

«Siońnia 12 hadoŭ z dnia Płoščy-2010. Ščyra kažučy, u 2010 hodzie ja jašče nie razumieła, nakolki važna toje, što adbyvałasia ŭ hety dzień na płoščy.

Ale zaraz, uzhadvajučy hety dzień, ja baču: šlach biełarusaŭ da svabody pačaŭsia nie ŭ 2020 hodzie — i navat nie ŭ 2010-m, jaho biełarusy pačali prakładać užo daŭno.

I ŭsie my siońnia praciahvajem pracu tych, chto byŭ da nas. Chto stajaŭ la vytokaŭ Biełaruskaj Narodnaj Respubliki. Chto razam ź Zianonam Paźniakom adkryŭ praŭdu pra Kurapaty. Chto byŭ pobač sa Stanisłavam Šuškievičam i padaravaŭ Biełarusi niezaležnaść ad SSSR. Śmiełych deputataŭ, jakija abviaścili haładoŭku suprać niezakonnaha refierendumu ŭ 1995 hodzie, i tych, chto vyjšaŭ na Čarnobylski Šlach pobač z Alesiem Bialackim. Chto supraćstajaŭ dyktatury usie hetyja hady: načavaŭ u namiotavym haradku ŭ 2006-m, słuchaŭ pramovu Niaklajeva ŭ 2010-m, padtrymlivaŭ Siarhieja Cichanoŭskaha, Viktara Babaryku i Maryju Kaleśnikavu ŭ 2020-m.

Kožnamu pakaleńniu ŭ niejki momant zdavałasia, što, mahčyma, namahańni byli daremnymi. Ale kožny raz na miesca adnaho niespraviadliva asudžanaha ci źbitaha čałavieka prychodziła niekalki novych. Štoraz źjaŭlalisia novyja i novyja ludzi, hatovyja praciahnuć šlach papiarednikaŭ i razam adstojvać praŭdu.

Usie my siońnia razumiejem, što biełaruski ruch nie moža spynicca. Heta doŭhi šlach, jaki my pavinny prajści ahulnymi namahańniami. I kali my budziem pamiatać, na čyich plačach staim siońnia, my možam być upeŭnienyja: pobač z nami na hetym šlachu abaviazkova buduć źjaŭlacca novyja volnyja biełarusy.

Bo navat siarod tych, chto čytaje hety tekst, jość tyja, chto tolki ŭ 2020-m, u 2021-m ci navat u 2022 hodzie zrazumieŭ, što adbyvajecca ŭ našaj krainie i što tak praciahvacca bolš nie moža. Mnohija tolki zaraz razumiejuć, čym pahražajuć nam takija rečy, jak siońniašniaja sustreča Łukašenki i Pucina, cynična pryznačanaja ŭ histaryčny dla biełaruskaha naroda dzień.

Na svaim šlachu my ryzykujem usim. Siońnia my ryzykujem stracić niezaležnaść, heta značyć — stracić svaju krainu, svoj lubimy dom. Ale ja viedaju, što my nie dazvolim hetamu adbycca.

Da našaha šlachu da svabody, raspačataha jašče da nas, pavinny dałučycca jak maha bolš novych ludziej. A naša z vami zadača — być dastatkova adkrytymi i sumlennymi, kab jany mahli paźbiehnuć našych minułych pamyłak i, abapirajučysia na raniejšy vopyt, być z nami — i być lepšymi za nas».

• 31
• 1
• 2
• 0
• 0
• 0