Akcior z «9-aj roty» zajaviŭ, što vajavaŭ by za Ukrainu i nie suprać, kab Rasija razvaliłasia. Suprać jaho zaviali kryminałku
Staršynia Śledčaha kamiteta RF Alaksandr Bastrykin daručyŭ raspačać kryminalnuju spravu ŭ dačynieńni da akciora Artura Smaljaninava.
Kiraŭnik Śledčaha kamiteta Rasii Alaksandr Bastrykin daručyŭ raspačać kryminalnuju spravu suprać akciora Artura Smaljaninava paśla jaho zajaŭ pra vajnu.
«U intervju adnamu z zachodnich vydańniaŭ Smaljaninaŭ zrabiŭ šerah zajaŭ, nakiravanych suprać Rasii», — havorycca ŭ paviedamleńni SKR u telehram-kanale.
U im nie ŭdakładniajecca, kali i jakomu zachodniamu vydańniu Smaljaninaŭ daŭ intervju, jakoje Bastrykin paličyŭ padstavaj dla zaviadzieńnia kryminalnaj spravy. Na minułym tydni Smaljaninaŭ daŭ intervju hałoŭnamu redaktaru vydańniu «Novaja hazieta Jeŭropa».
Smaljaninaŭ — viadomy rasijski akcior, papularnaść jamu pryniesła rola Lutaha ŭ filmie «9-ja rota» (2005 hod) Fiodara Bandarčuka. Jon pakinuŭ Rasiju i vystupiŭ suprać uvarvańnia va Ukrainu.
Smaljaninaŭ u intervju «Novoj hazietie Jeŭropa» Kiryłu Martynavu zajaviŭ, što kali b udzielničaŭ u vajnie, to na baku Ukrainy. Na pytańnie žurnalista, ci nie vyklučaje mahčymaści «pajści vajavać za Ukrainu», akcior dasłoŭna adkazaŭ tak: «Biezumoŭna, viadoma. Jašče raz, emacyjna heta mienavita tak dla mianie. Tolki tak. Kali b ja i pajšoŭ na hetuju vajnu, to mienavita na baku Ukrainy». Akramia taho, u videaintervju jon vymaviŭ takija słovy: «Mnie, ščyra kažučy, naplavać, u jakoj formie zastaniecca Rasija. Razvalicca jana, nie razvalicca…»
Intervju vyklikała rezanans. Rasijskija palityki patrabavali pakarać Smaljaninava.
U pryvatnaści, raspačać kryminalnuju spravu patrabavaŭ deputat Dziarždumy Sułtan Chamzajeŭ.
«Liču, što hety biehły artyst pavinien paŭtaryć šlach Niaŭzorava z kryminalnaj spravaj. U takich akcioraŭ pavinna być nieadkładnaje anulavańnie kantraktaŭ pa ŭsich dziaržaŭnych zakazach, filmach. Sa svajho boku źviarnusia ŭ Śledčy kamitet z prośbaj raspačać kryminalnuju spravu na hetaha zdradnika», — skazaŭ Chamzajeŭ RIA Naviny (publicyst Alaksandr Niaŭzoraŭ byŭ abvieščany «zamiežnym ahientam», a spravu suprać jaho pa artykule ab «vajennych fejkach» zaviali ŭ sakaviku minułaha hoda).
Ciapier čytajuć
Jak skłaŭsia los vypusknikoŭ, jakimi žurfak hanaryŭsia 10 hadoŭ tamu? Historyja adnaho ŭračystaha kałaža30
Kamientary