U śpisie 92 čałavieki.
Ruskaja słužba Bi-bi-si apublikavała pajmienny śpis rasijskich vajskoŭcaŭ, jakija zahinuli ŭ noč na 1 studzienia pry ŭdary USU pa budynku PTV u anieksavanaj Makiejeŭcy Danieckaj vobłaści Ukrainy.
Na padstavie adkrytych danych, pradstaŭlenych rasijskim bokam, vydańnie vyśvietliła asoby 92 vajskoŭcaŭ, jakija zahinuli ŭ Makiejeŭcy. Bi-bi-si adznačaje, što hety śpis moža być niapoŭnym. Pradstaŭleny pajmienny śpis šmat u čym supadaje sa śpisam zahinułych, jaki viadzie vydańnie «Idel.Realii» (u im paznačany 83 proźviščy).
Bolšaja častka zahinułych — mabilizavanyja z Samarskaj vobłaści. Samamu maładomu ź ich było 22 hady, samamu starejšamu — 48 hadoŭ, adznačaje Ruskaja słužba Bi-bi-si.
Svajaki zahinułych u Makiejeŭcy raspaviali, što mnohija z vajskoŭcaŭ atrymali pozvy ŭ vojska ŭ kancy vieraśnia 2022 hoda paśla taho, jak u Rasii pačałasia mabilizacyja. Zatym kala dvuch miesiacaŭ jany prachodzili padrychtoŭku ŭ vajskovych čaściach Samarskaj vobłaści. U siaredzinie śniežnia im zahadali adpravicca ŭ zonu bajavych dziejańniaŭ, 26 śniežnia vajskoŭcy prybyli ŭ Makiejeŭku.
Poŭny śpis na sajcie Bi-bi-si.
Ruskaja słužba Bi-bi-si vyjaviła ŭ adkrytych krynicach zhadku pra 15 vajskoŭcaŭ, jakija ŭ momant abstrełu znachodzilisia ŭ Makiejeŭcy i pra los jakich paśla 1 studzienia ničoha nie viadoma. U niekalkich siemjaŭ uziali materyjał DNK, kab znajści supadzieńni z zahinułymi padčas abstrełu, pra vyniki daśledavańniaŭ nie paviedamlałasia.
Uzbrojenyja siły Ukrainy ŭ noč na 1 studzienia abstralali Makiejeŭku z RSZA HIMARS. Pad abstreł trapiŭ budynak, u jakim znachodzilisia rasijskija vajskoŭcy. 4 studzienia ŭ Minabarony RF zajavili, što padčas udaru pa Makiejeŭcy zahinuli 89 rasijskich vajskoŭcaŭ, paśla čaho viedamstva heta nie kamientavała. Ukrainski bok zajaŭlaŭ, što zahinuła kala 400 čałaviek.
Kamientary