Mahutny ziemlatrus u Turcyi i Siryi: sotni zahinułych, abrynulisia budynki
Mahutny ziemlatrus adbyŭsia na paŭdniovym uschodzie Turcyi, niedaloka ad miažy ź Siryjaj. U Turcyi abvieščana nadzvyčajnaje stanovišča, piša Bi-bi-si.
Hieałahičnaja słužba ZŠA paviedamiła, što ziemlatrus mahnitudaj 7,8 adbyŭsia ŭ 04:17 pa miascovym časie na hłybini 17,9 km, pablizu horada Hazijantepa.
Niekalki budynkaŭ abrynulisia, pad zavałami šukajuć tych, chto vyžyŭ.
Ministr unutranych spraŭ Turcyi Sulejman Sału paviedamiŭ, što paciarpieli 10 haradoŭ: Hazijantep, Kachramanmaraš, Chataj, Asmanije, Adyjaman, Małatyja, Šanłyurfa, Adana, Dyjarbakyr i Kilis.
Telekampanii TRT i Haberturk pakazali kadry ludziej, jakija sabralisia vakoł razburanaha budynka ŭ Kachramanmarasie ŭ pošukach tych, chto vyžyŭ.
U Dyjarbakyry abrynuŭsia handlovy centr.
Šturški adčuvalisia ŭ stalicy Ankary i inšych tureckich haradach, a taksama pa ŭsim rehijonie — na Kipry, u Livanie i ŭ Siryi, dzie, jak i ŭ Turcyi, šmat zahinułych.
Jak pieradaje Reuters, Siryjskija dziaržaŭnyja ŚMI paviedamili, što ŭ pravincyi Alepa abrynułasia vialikaja kolkaść budynkaŭ, krynica ŭ hramadzianskaj słužbie Chamy paviedamiła, što tam taksama abrynułasia niekalki budynkaŭ.
«Sa ścien u domie ŭpali karciny», — skazaŭ ahienctvu Reuters Samier, žychar Damaska. «Ja pračnuŭsia ŭ žachu. My ŭsie apranulisia i staim kala dźviarej».
Pa słovach vidavočcaŭ, ludzi ŭ Damasku, a taksama ŭ livanskich haradach Biejrut i Trypali, vybiahali na vulicy i sadzilisia ŭ mašyny, kab adjechać ad svaich damoŭ na vypadak abvalvańnia.
Rušdzi Abuałuf, pradziusar BBC ŭ siektary Haza, skazaŭ, što dom, u jakim jon žyŭ, tresła kala 45 siekund.
Tureckija siejsmołahi acanili moc ziemlatrusu ŭ 7,4. Pa ich słovach, praź niekalki chvilin u rehijonie adbyŭsia druhi šturšok.
Kiraŭnik tureckaha Čyrvonaha Paŭmiesiaca Kierem Kinik zajaviŭ, što mabilizuje resursy dla dapamohi paciarpiełamu rehijonu, pakolki majucca surjoznyja paškodžańni i razburanyja budynki, i skazaŭ, što Turcyja hatovaja pryniać mižnarodnuju dapamohu.
Turcyja znachodzicca ŭ adnoj z samych aktyŭnych siejsmaniebiaśpiečnych zon u śviecie.
Pavodle apošnich źviestak, u Turcyi zahinuli 283 čałavieki, 2383 paranienyja. U Siryi zahinuli 237 čałaviek.
Ciapier čytajuć
U Połk Kalinoŭskaha na tydzień pralez milicejski stukač. Ciapier jaho vykryli, i dobra vidać, chto sprabuje abialić ahienta4
Kamientary