Va ŭradzie zaklikali bolš aktyŭna pryciahvać ludziej da ŭborki śniehu
Siońnia vice-premjer Anatol Sivak sabraŭ naradu pa pytańniach ramontu daroh, ŽKH i baraćby z pavodkaj. Jon ukazaŭ na niedachopy ŭ rabocie miascovych uładaŭ, u tym liku i ŭ śfiery taho, jak jany pryciahvajuć biełarusaŭ da ŭborki śniehu, paviedamlaje reform.by.
«Nie va ŭsich 118 rajonach krainy pryniatyja rašeńni ab zamacavańni za subjektami haspadarańnia i hramadzianami terytoryi ahulnaha karystańnia nasielenych punktaŭ dla vykanańnia rabot pa ich padtrymańni ŭ naležnym sanitarnym stanie. Hetuju praktyku nieabchodna brać na ŭzbrajeńnie. Heta značyć, 100% hetaje rašeńnie pavinna być vykananaje pa respublicy nieadkładna. Nieabchodna aktyŭna pryciahvać hramadzian da ŭborki śniehu na dvarovych terytoryjach i zabiaśpiečvać ich nieabchodnym invientarom. Na heta nam nieadnarazova pakazvaŭ kiraŭnik dziaržavy, premjer ministr i kiraŭnictva Savieta Respubliki», — skazaŭ jon.
Sivak zaznačyŭ, što drennaja ŭborka dvarovych terytoryj vyklikaje skarhi hramadzian i niezadavolenaść uładaj.
«Abhruntavanyja narakańni i niehatyŭnyja vodhuki hramadzian vyklikajuć pytańni stanu aŭtamabilnych daroh, vulic, nasielenych punktaŭ, uborki dvarovych terytoryj nasuprać žyłych damoŭ, unutrykvartalnych prajezdaŭ, piešachodnych suviaziaŭ. U studzieni miesiacy ŭ niekatorych rehijonach skłałasia niespryjalnaja hidramietearałahičnaja abstanoŭka, źviazanaja z padtapleńniem tałymi vodami asobnych učastkaŭ daroh i mastoŭ, žyłych damoŭ, pryvatnych padvorkaŭ. Razam z tym narakać tolki na nadvorje nie davodzicca, va ŭmovach parušeńniaŭ i sistemnych niedapracovak, banalnaj chałatnaści na miescach. Čaściakom miascovyja vykanaŭčyja rasparadčyja orhany, u zonie adkaznaści jakich znachodziacca pytańni ŭtrymańnia i ramontu vulična-darožnaj sietki, nasielenych punktaŭ i ŭborki terytoryi, nie nadajuć hetamu naležnaj uvahi. Naležnaje płanavańnie biahučych kapitalnych ramontaŭ vulic ažyćciaŭlajecca na niedastatkovym uzroŭni. Arhanizacyja i kantrol za ŭborkaj terytoryi ŭ poŭnaj miery ŭ poŭnym abjomie nie zabiaśpiečvajecca. U vyniku majem rost zajavak i pretenzij ad nasielnictva. Heta farmuje niehatyŭny emacyjny fon, pierš za ŭsio, na adras miascovych orhanaŭ ułady», — dadaŭ jon.
Sivak padkreśliŭ, što takija narady ciapier buduć pravodzicca štomiesiac, a na ŭzroŭni abłasnych i rajonnych vykankamaŭ — pastajanna.
Ciapier čytajuć
U Połk Kalinoŭskaha na tydzień pralez milicejski stukač. Ciapier jaho vykryli, i dobra vidać, chto sprabuje abialić ahienta4
Kamientary